Yeni naziri büdrətməyə çalışan köhnə heyət...
18-08-2020, 08:54
Xəbər verdiyimiz kimi Rubrika.az saytı 20 saylı məktəbə yenicə direktor təyin edilmiş Esmira Ağayeva tərəfindən məhkəməyə verilib və barəmizdə 50 min manatlıq təzminat davası açılıb. Təbii ki, baş verənlərin E.Ağayevanın iradəsinin təzahürü olmadığını biz də bilirik. Təzə direktor onun təyinatında böyük rol oynamış Təhsil nazirinin müavini Məhəbbət Vəliyevanın tapşırıqlarını yerinə yetirir və məhkəməyə verilmək də məhz onun sifarişidir. Hər halda zamanında mühəndis ixtisasına sahiblənən, lakin sonradan müxtəlif kursların sertifikatları ilə pedaqoqa çevrilən E.Ağayeva haqqında hər yazılana görə məhkəməyə müraciət etsə idi, indi gərək Ginnesin rekordlar kitabından da bir sertifikasiya alaydı.
Saytımızda nazir müavini haqqında silsilə yazılar dərc olunub və səsləndirilən tənqidlərdən qurtulmaq üçün Məhəbbət xanım məhkəmə yolunu seçib. Biz nə vaxtdır deyirik ki, M.Vəliyeva nazirlikdə qruplaşma yaradır, məktəblərə öz yaxınlarını yerləşdirməklə onları öz nəzarətində saxlayır. E.Əmrullayevin imzaladığı ilk qərarla paytaxtın 20-yə yaxın məktəbinin direktoru dəyişdirldi. Siyahı əvvəlcədən M.Vəliyeva tərəfindən hazırlanmışdı və yeni nazir sadəcə imza atmaqla hazır planın icraçısına çevrildi. Beləliklə, əlavə olaraq Bakının 20-yə yaxın məktəbi M.Vəliyevanın sırf nəzarəti altına keçdi.
Rubrika.Az saytına verilən məlumatlara görə, M.Vəliyeva yeni nazirin təyinatından sonra xüsusi tapşırıqla xaos yaratmaqla məşğuldur. Nazirlikdə hökm sürən ikitirəlik daha da dərinləşdirilib. M.Vəliyeva özünə sadiq rayon təhsil şöbələrinin müdirləri, eləcə də nazirlikdəki komandası vasitəsilə E.Əmrullayevin fəaliyyətini sabotaj edir. Yəqin ki,qısa zaman kəsiyindən sonra bunun “səsi” çıxacaq və o zaman Emin müəllim əslində nə qədər böyük təhlükə ilə üz-üzə qaldığını anlayacaq. Odur ki, yeni nazir cəmiyyətdə müsbət imicini qorumaq, islahatlar həyata keçirmək istəyirsə, M.Vəliyevanın komandasından nazirliyi təmizləməlidir.
Əvvəlki yazılarımızda da məlumat vermişik ki, M.Vəliyeva BŞTİ-ni bütünlüklə nəzarətdə saxlayır. Necə deyərlər onun xəbəri olmadan paytaxt təhsilində quş belə uça bilməz. Bütün şagird yerdəyişmələri, məktəblərə qəbul, müəllimlərin işə qəbulu onun monopoliyasındadır. İ.Abdullayeva vasitəsilə BŞTİ-ni idarə edən M.Vəliyeva hər həftənin cümə axşamları idarəyə gələrək müvafiq “tövsiyələrini” verir. Paytaxtın prestijli təhsil ocaqlarında “şagird əməliyyatları” və onların nəticələri bu zaman ona təqdim edilir. Məktəblərə şagird qəbulu prosesində əsas icraçı olan İ.Abdullayeva məktəb direktorları və özünə yaxın olan adamlarla, daha çox sürücüsü vasitəsilə “əlaqə yaradır”. Hətta bu barədə İ.Abdullayevanın iş otağında BŞTİ-nin İctimaiyyətlə əlaqələr şöbəsinin müdiri B.Məmmədovun yanında haqlı iradlarımı bildirmişəm. Lakin hər kəsin bildiyi kimi, iradımı bildirdiyim şəxs qəfildən Bakının «prestijli» 7 nömrəli məktəbinə direktor təyin edilir.
Rubrika.Az saytına verilən məlumata görə, nüfuzlu liseylərə şagird qəbulu zamanı hər sinifə 20 şagird yeri göstərilir. 20 şagird qəbulundan sonra sistem bağlanır və artıq yer yoxdur deyilir. Daha sonra həmin siniflərdə sehirli əllərin köməkliyi ilə şagird yeri 30-a çatdırılır və yenidən qəbul başlanır. Bu yeni yerlər uğrunda mübarizə isə valideynlərə çox baha başa gəlir. Bütün bunlar isə M.Vəliyevanın bilavasitə nəzarətindədir və rəhbərliyi altında həyata keçirilir.
Əvvəlki yazılarımızda M, Vəliyevanın hələ mərhum Z.Əliyevanın adını daşıdığı liseydə direktor olarkən törətdiyi korrupsiya əməlləri nə mərhum akademikin, nə də təhsilimizin adına yaraşan hərəkətlər olmayıb. Hətta 2013-cü ildə liseydə aparılan yoxlamadan sonra M.Vəliyeva infarkt keçirir, ağır vəziyyətə düşür. Amma bu dəfə də gözəgörünməz əllər onu xilas edə bilir, Nazirliyin Daxili nəzarət şöbəsi, adaşım Nicat müəllim “söhbəti bağlayır”.
Hər halda M.Vəliyeva Əli Həsənovun həyat yoldaşı Sona Vəliyeva ilə qohumluq əlaqələrindən, Ramiz Mehdiyevin qızı ilə rəfiqə olmasından, SOCAR rəhbərliyindən mühüm şəxslərlə daim yaxın ünsiyyətdə olmağından, son vaxtlar isə özündə R.Mehdiyev demişkən «paxazuka» yaratmaq istəyən Azərbaycan yəhudi icmaçısının arxasında durmasından iftixarla danışıb. Elə indi də Mərdəkandakı bağ evində dincələn nazir müavini geniş əlaqələrinə arxalanaraq təhsildə öz hegomon mövqeyini qorumağa çalışır. Amma bilmir ki, onun güvəndiyi dağlara qış çoxdan gəlib!
Geri qayıt