““Cəllad Məmməd” hər ay rüvşət və korrupsiya yolu ilə 6 milyon manat toplayır”
17-05-2023, 01:17
“Hüquqları Pozulmuş Məhkumların Müdafiəsi” İctimai Birliyinin təsisçiləri, müdafiə nazirinin sabiq müavini Mehman Səlimov, Böyükağa Abdullayev və Əliabbas Rüstəmov tərəfindən “Hürriyyət” qəzetinin redaksiyasına şikayət məktubu daxil olub. Qəzetimiz vasitəsilə Prezident İlham Əliyevə müraciət edən şikayətçilərin məktubunu olduğu kimi dərc edirik:
“Cənab Prezident!
İlk öncə, 08.05.2023-cü il tarixdə vermiş olduğunuz əfv sərəncamına görə, “Hüquqları Pozulmuş Məhkumların Müdafiəsi” İctimai Birliyinin, eləcə də məhkumların və məhkum ailələrinin adından Sizə dərin minnətdarlığımızı bildiririk.
Eyni zamanda, bizim üçün sevindirici haldır ki, Siz 30 il işğal altında olan torpaqlarımızı 44 gün ərzində azad etdiniz, parlaq qələbənizlə işğala son qoydunuz. Ulu öndər Heydər Əliyevin Fəxri Xiyabanda məzarını ziyarət etdiniz və Sizə etdiyi vəsiyyətinə, verdiyiniz sözə əməl etdiyinizi, Şuşanı azad etdiyinizi dünya ictimaiyyətinə çatdırdınız.
Siz, Azadlıq Meydanında Qələbə Paradı keçirdiniz.
Siz Ermənistanı məğlub etdiniz.
Siz Qarabağın xilaskarı kimi tarixə düşdünüz.
Siz 2023-cü ili “Heydar Əliyev İli” elan etdiniz, hansı ki, bu tarix əbədi yaşayacaqdır.
Bundan başqa, bütün hakimiyyət nümayəndələri, bütün məmurlar Sizin qələbələrinizə, uğurlarınıza sevinən, Sizinlə qürür duyan 8 milyonluq Azərbaycan xalqına “Heydar Əliyevin 100 illiyi ilə bağlı möhtəşəm əfv sərəncamı veriləcəkdir”, - deyərək, ali kürsülərdən çıxışlar etdilər və insanları sevindirdilər.
Hörmətli Prezident!
Təəssüf ki, çox keçmədi, bu pafoslu çıxışlar edən məmurlar əfv sərəncamı ilə bağlı yenə də Sizi aldatdılar və Sizi sevən, Sizə güvənən insanları məyus etdilər. Çünki, bu sərəncamın bundan öncə verilmiş əfv sərəncamlarından heç bir fərqi olmamışdır. Hesab edirik ki, “möhtəşəm əfv sərəncamı” veriləcəkdir deyənlərdən, ağız dolusu, pafosla danışanlardan bir gün soruşacaqsınız ki, deyin görək, bu sərəncamın öncəkilərdən möhtəşəm olmasının fərqi nədədir? Əlbəttə, cavab verə bilməyəcəklər.
“Hüquqları Pozulmuş Məhkumların Müdafiəsi” İctimai Birliyi olaraq daima düşünürük ki, bu əfv sərəncamı nəyə görə Ulu öndərin adına layiq, möhtəşəm olmadı? Bu möhtəşəmliyin qarşısını kimlər aldı? Heydar Əliyevin adı ilə, 100 illiyi ilə bağlı olan layihələrə əngəl törədənlər, dedi-qodu yayanlar, boğazdan yuxarı danışanlar, bununla Sizin siyasi kursunuza qarşı çıxanlar kimlərdir?
Unutmasınlar ki, tarix ətrafınızdakı məmurların bu xəyanətini də əbədi yaşadacaqdır!
Cənab Prezident!
İctimai Birlik olaraq araşdırmışıq və bildiririk ki, məmurların əfv sərəncamı ilə bağlı Sizi aldatmasının da kökündə korrupsiya, rüşvət durur. Belə ki, Ədliyyə Nazirliyi rəhbərliyinin iradəsinə uyğun olaraq, bütün ədliyyə əməkdaşları məhkumların və məhkum valideynlərinin beyninə həkk etmişlər ki, “məhkumun pulsuz əfv olunması mümkünsüzdür, qəti ola bilməz. Çünki məhkumun əfv olunması üçün Əfv Komissiyası tərəfindən xasiyyətnamə tələb edilir, bunu da Ədliyyə Nazirliyinin əməkdaşı verir. O da, məhkum ölsə də, pulsuz xasiyyətnamə vermir”. Bax, məmurlar beləcə xayanət edirlər.
Belə olan halda sual yaranır: Cəzaçəkmə Müəssisələrində məhkumlardan alınan pullardan, baş verən korrupsiyadan, rüşvətdən Ədliyyə naziri cənab Fikrət Məmmədovun və Baş Prokurorluğun xəbəri yoxdurmu? Əlbəttə, var!
Cənab Prezident!
Biz, İctimai Birlik olaraq araşdırmışıq və bütün bunlarla bağlı Sizə məlumat veririk. Məsələn:
- Ədliyyə Nazirliyinin 6 saylı Cəzaçəkmə Müəssisəsinin rəisi Məmməd Mahmudov kimdir?
- Sözügedən Cəzaçəkmə Müəssisəsində nələr baş verir?
Bildirirk ki, 6 saylı Cəzaçəmə Müəssisəsində 1800 nəfərdən artıq məhkum var. Cəzaçəmə Müəssisəsinin rəisi Məmməd Mahmudov əslən şəkilidir, Baş nazirin sabiq müavini Abid Şərifovun qızının əridir. Üstəlik, Ədliyə naziri Fikrət Məmmədovun özünün yaxın qohumudur. İxtisasca, ali təhsilli həkim-cərrahdır. Ədliyyə Nazirliyi sistemində “Dollar Məmməd” və yaxud da “Cərrah-cəllad Məmməd” kimi tanınır. O, 8 ilə yaxın müddətdir ki, 6 saylı Cəzaçəkmə Müəssisəsində rəis vəzifəsində çalışır. Hansı ki, Ədliyyə Nazirliyi tarixində heç bir rəis bir müəssisədə 5 ildən artıq rəhbər vəzifədə işləməmişdir.
8 ildə istər cəzasını tam çəkdikdən sonra azadlığa buraxılmış, istər əfv olunmuş, istər cəzasının 2/3 hissəsini çəkdikdən sonra rejimini dəyişmiş və istər də hal-hazırda cəza çəkən elə bir məhkum tapmaq olmaz ki, Məmməd Mahmudov ondan rüşvət almamış, yaxud da o məhkumu pul üstündə işgəncəyə məruz qoymamış olsun.
Həmçinin, 8 ildə elə bir məhkum ailəsi ola bilməz ki, məhkumla uzunmüddətli görüşdə olması ilə bağlı Məmməd Mahmudova pul ödəməmiş olsun.
8 ildə elə bir məkum tapmaq olmaz ki, qohumları, dostları, valideynləri onunla görüşə gəldikdə Məmməd Mahmudovun təyin etdiyi adamlar onlardan pul almamış olsun.
Məmməd Mahmudov yeganə rəisdir ki, məhkumlardan məcburi qaydada su, işıq, qaz pulu yığdırır.
O, yeganə rəisdir ki, onun rəhbərlik etdiyi Cəzaçəkmə Müəssisəsində tualet, hamam, telefon pulludur.
O, yeganə rəisdir ki, məhkumlardan yemək, yatmaq pulu yığdırır.
O, yeganə rəisdir ki, Cəzaçəkmə Müəssisəsində qumar oynatdırır.
O, Yeganə rəisdir ki, rəhbərlik etdiyi Cəzaçəkmə Müəssisəsində narkotik satdırır.
O, yeganə rəisdir ki, ona yaxın olan sahibkarlara vergidən yayınmaq və gizli sahibkarlıq fəaliyyəti ilə məşğul olmaq üçün Cəzaçəkmə Müəssisəsində şərait yaratmışdır.
O, yeganə rəisdir ki, məhkumları gizli sahibkarlıq fəaliyyəti ilə məşğul olan sahibkarlara pula satmaqla məşğuldur. Hansı ki, həmin sahibkarlar məhkumların əməyinin haqqını birbaşa Məmməd Mahmudova çatdırırlar.
Məmməd Mahmudov yeganə rəisdir ki, məhkumlara ayrılan ərzağı və dərman peraparatlarını onların özlərinə pulla satdırır.
Məmməd Mahmudov yeganə rəisdir ki, rejimini dəyişmək istəyən məhkumlardan bir ilinə 5-6 min manat tələb etdiyi halda, bu günkü əfv sərəncamından sonra, bir ilinə 7-8 min manat tələb edir və hal-hazırda yığımı davam etdirir.
Məmməd Mahmudov yeganə rəisdir ki, 2015-ci ildə rəhbərlik etdiyi 6 saylı Cəzaçəkmə Müəssisəsində “kars”ın rəisi Fariz Əliyev məhkumu amansızcasına döyərək qətlə yetirmişdir. M.Mahmudov isə Fariz Əliyevi özünə müavin götürmüşdür. Çünki, Məmməd Mahmudov yaxşı bilirdi ki, Fariz Əliyev gözükölgəlidir, məhkum qətlə yetirmişdir, onun bütün qanunsuz əmrlərini ancaq o, yerinə yetirə bilər.
Məmməd Mahmudov yeganə rəisdir ki, korrupsiya və rüşvət hesabına 6 saylı Cəzaçəkmə Müəssisəsində bir ayda 6 (altı) milyon manat vəsait yığdırır.
Belə olan halda, ədalətli ƏFV-dən söhbət gedə bilərmi?
Cənab Prezident!
6 saylı Cəzaçəkmə Müəssisəsində məhkumlardan, məhkum ailələrindən yığılan rüşvətdən, Cəzaçəkmə Müəssisəsində baş verən olaylardan, Məmməd Mahmudovun bu kimi qanunsuz hərəkətlərindən Ədliyyə Nazirliyinin, Baş Prokurorluğun və aidiyyəti orqanların məlumatı olmaya bilərmi? Ola bilərmi ki, bu günə kimi 6 saylı Cəzaçəkmə Müəssisəsində Məmməd Mahmudovun məhkəmənin və prokurorluğun adı ilə məhkumlardan yığdırdığı rüşvətdən məhkəmələrin, prokurorluğun və Ədliyyə Nazirliyinin xəbəri (məlumatı) olmasın?
Cənab Prezident!
İxtisası cərrah olan, 6 saylı Cəzaçəkmə Müəssisəsinin rəisi “cəllad Məmməd” Mahmudovun törətdiyi olaylar barədə Ədliyyə naziri Fikrət Məmmədova, Baş prokuror Kamran Əliyevə və Ali Məhkəmənin sədri İnam Kərimova məlumat vermişik! “Hüquqları Pozulmuş Məhkumların Müdafiəsi” İctimai Birliyi olaraq, digər cəzaçəkmə müəssisəsi rəislərinin də qanunsuz hərəkətləri barədə Sizə ətraflı məlumat verəcəyimizlə bağlı məsuliyyəti üzərimizə götürürük.
Hörmətli Prezident!
Yuxarıda sadaladığımız faktlarla bağlı 6 saylı Cəzaçəkmə Müəssisəsində bir ayda nazirliyin, məhkəmələrin və prokurorluğun adı ilə yığılan 6 milyon manatlıq rüşvət və korrupsiyanın qrşısının alınması yönümündə göstəriş verəcəyinizə inanırıq”.
“Hürriyyət”
Redaksiyadan: Yazıda adları qeyd olunan qurumların və şəxslərin mövqeyini dərc etməyə hazırıq.
Geri qayıt