"Çoxsaylı şikayət məktubları yazmağımıza baxmayaraq..."
8-05-2024, 08:10
Bakı şəhəri Nizami rayonunda yerləşən 3 nömrəli Respublika Xüsusi İnternat Məktəbinin müəllimləri - Xanım Həsənova , Könül Səmədli, Aybəniz Hacıyeva, Kəmalə İsrafilova, Elman Məmmədov, Nailə Aslanova və Aynurə Mehdiyeva tərəfindən Hurriyyet.az saytının redaksiyasına şikayət məktubu daxil olub. Şikayətçilər saytımız vasitəsilə Elm və Təhsil naziri Emin Əmrullayeva müraciət edir:
"Hörmətli Nazir!
Bakı şəhəri Nizami rayonunda yerləşən 3 nömrəli Respublika Xüsusi İnternat Məktəbində baş verən haqsızlıq, direktor Tariyel Əkbərovun özbaşınalıqları, dərs saatları kəsilən, Qərbi azərbaycanlı olduğu üçün təhqir olunan, səbəbsiz yerə töhmətlər alan, sertfikasiya imtahanlarında yüksək bal toplayan və sırf öz ixtisası üzrə təhsil alan, uzun illərdir çalışan müəllimlər olaraq, Sizdən xahiş edirik ki, səsimizə səs verin.
Sizə və nazirliyə, eləcə də Bakı Şəhər Baş Təhsil İdarəsinə çoxsaylı şikayət məktubları yazmağımıza baxmayaraq bu gün də məktəbdə direktor Tariyel Əkbərovun haqsızlıqları ilə üzləşirik. Direktor Tariyel Əkbərov birmənalı olaraq hər gün bizə hədə-qorxu gəlir, işdən qovmaqla hədələyir. Özünü məktəbdə direktor kimi aparmır və bizimlə dustaq kimi davranır. Bu da bizim səhhətimizə çox ciddi təsir edir.
Biz, Azərbaycan xanımları, müəllimləri, dövlətimizin gələcəyi üçün əsgər böyüdən anaları olaraq, direktorun xoşagəlməz davranışlarını müəllim adına ləkə kimi qiymətləndiririk.
Azərbaycan Respublikası Elm və Təhsil Nazirliyinə yazdığımız məktubların cavabsız qaldığını, köməksiz olduğumuzu görəndən sonra, yaranan problemlərlə bağlı direktor Tariyel Əkbərovun əleyhinə Elm və Təhsil Nazirliyi qarşısında etiraz aksiyası təşkil etdik.
Cənab Nazir!
Bizi nazirliyin əməkdaşları Həbib Kərimov və Məlahət Hacıyeva qəbul edib dinləsə də, şikayətimiz təmin olunmadı, məktəbdə olan problemlər öz həllini tapmadı. Əksinə, Tariyel Əkbərov bir az da qabağa gedərək, bizə daha çox hədə-qorxu gəldi.
Onu da qeyd edək ki, müəllim yoldaşımız Könül Səmədli çalışdığımız məktəbdə mənəvi terrorla üzləşir. O, şagird döyməklə bağlı direktor tərəfindən şərləndi. Araşdırılma aparıldı, heç bir kamera görüntüsü və sübut təqdim etməyi bacarmayan direktor bu yolla ikinci dəfə Azərbaycan müəlliminə qarşı haqsızlıq etdi.
04.04.2024-cu il tarixində Bakı Şəhər Təhsili İdarəsinin əməkdaşı Elşad Səfixanov məktəbə gəlsə də, bizim problemlərlə maraqlanmadı. Dərs saatlarımızın kəsilməsini, əsassız yazılan töhmətlər barədə qəti fikir söyləmədi. Qeyd etdiyimiz problemlərin həllinə səy göstərmədi. Bu qədər haqlı şikayət və problemlərdən sonra Elşad Səfixanov daha çox məktəbin direktoru Tariyel Əkbərovun vəkili kimi şikayətlərimizi əsassız hesab etdi.
Belə başa düşdük ki, bizim yazdığımız məktublar Sizdən gizlədilir, ünvana yetişmir və ya biz o məktəbdə işləməyə layiq deyilik.
Cənab Nazir!
Siz uzun illər təhsil sektorunda müxtəlif vəzifələrdə çalışmısınız. Çalışdığınız illər ərzində də müəllimlərin problemləri ilə kifayət qədər tanış olmusunuz. Biz əminik ki, tapdalanan hüquqlarımızın bərpa olunmasında, direktorun Azərbaycan müəlliminə olan hörmətsizliyini, müəllimlə ünsiyyət qura bilməməsini, etik davranış qaydalarını pozduğunu, dərs saatlarımızın kəsilməsini, eləcə də həmkarımız Könül Səmədlinin məktəbin müəllimi Bahar Kazımova tərəfindən "erməni" deyilərək təhqir olunmasını və direktor Tariyel Əkbərovun Xanım Həsənovaya, Kəmalə İsrəfilovaya, Aybəniz Hacıyevaya, eləcə də Könül Səmədliyə yazılan əsassız töhmətləri də araşdıracaqsınız. Buna tam əminik.
Öncədən Sizə dərin təşəkkürümüzü bildiririk. Xahiş edirik, bizə kömək edin".
Məsələ ilə bağlı Elm və Təhsil Nazirliyinin "qaynar xətti" ilə əlaqə saxladıq. Bildirildi ki, ancaq şikayətçi olan şəxslər məsələ ilə bağlı nazirliyə müraciət edib, cavab ala bilərlər.
Geri qayıt