Paşinyanın “xəstə” siyasəti
28-12-2024, 09:35
Ermənistanın Baş naziri Nikol Paşinyan COVID-19-a yoluxması səbəbilə dekabrın 25-də Sankt-Peterburqda keçirilmiş MDB-nin qeyri-rəsmi sammitində iştirak edə bilməyib.
Onun Avrasiya İqtisadi İttifaqının (Aİİ) Ali Şurasının iclasında da videobağlantı formatında iştirak edəcəyi hökumətin rəsmi açıqlamasında qeyd edilib.
Paşinyanın son günlərdəki fəaliyyətində COVID-19 testinin pozitiv nəticələri diqqət mərkəzindədir. O, sosial şəbəkədəki çıxışlarında xəstəliklə bağlı vəziyyətini açıqlayıb və məhdudiyyətlərlə işləməyə davam etdiyini bildirib. Buna baxmayaraq, bəzi siyasi analitiklər onun sammitlərdə fiziki iştirak etməməsini yalnız xəstəliklə deyil, Ermənistanın mövcud siyasi mövqeyi və Qərblə əlaqələrini balanslaşdırmaq cəhdi ilə də əlaqələndirirlər.
Rusiya tərəfi, xüsusilə Kremlin mətbuat katibi Dmitri Peskov Ermənistanın həm Aİ, həm də MDB daxilindəki rolunu yüksək qiymətləndirir. Peskov bildirib ki, Ermənistan bu təşkilatlar üçün mühüm tərəfdaş olaraq qalır. Lakin Paşinyanın bu iştirakını məhdudlaşdırması regionda bəzi suallar doğurur.
Sual yaranır ki, Paşinyanın xəstəliyi həqiqətənmi onun sammitlərdə iştirakına mane olur, yoxsa bu, Ermənistanın qərbpərəst siyasəti ilə bağlı hesablanmış addımdır? Belə ehtimallar Paşinyanın qərarlarının həm daxili, həm də xarici siyasətdə daha geniş bir strateji baxışla nəzərdən keçirildiyini göstərə bilər.
Nəticədə, Paşinyanın xəstəlik səbəbi ilə iştirak etmədiyi sammitlər onun Ermənistanın beynəlxalq mövqeyindəki istiqamətini yenidən qiymətləndirməyə və daha dərindən təhlil etməyə əsas yaradır.
Politoloq Zaur Məmmədov “Cümhuriyət”-ə deyib ki, Paşinyanın MDB liderlərinin toplantısına getməməsi onun Rusiya ilə münasibətlərini ciddi şəkildə sınaqdan keçirdiyini söyləməyə əsas verir:
"Amma öz növbəsində təhlil etməyə tələsmək də olmaz. Çünki Trampın hakimiyyətə gəlməsindən sonra Rusiyaya olan münasibət dəyişəcək və Moskva-İrəvan arasında olan münasibətlərdəki bugünkü soyuqluq tamamilə başqa səmtə yönələ və ya daha da soyuqlaşa bilər. Bunu Rusiya-Ukrayna müharibəsinin nəticəsi kimi Amerika-Rusiya , Çin və Yaxın Şərqlə bağlı danışıqlarda görə biləcəyik.
Hər halda, Ermənistanın indiki rəhbərliyinin Qərbə meyil etməsi, Qərb tərəfindən hakimiyyətə gətirilməsi və eyni zamanda, Qərbə simpatiya etməsinə heç kimdə şübhə yoxdur. Ermənistan siyasi baxış cəhətdən Qərbi özlərinin əsas müttəfiqi kimi görürlər. Rusiyaya yaxınlaşıb yaxınlaşmayacağını isə gələcək göstərəcək".
Geri qayıt