MOLLA REJİMİ AZƏRBAYCANA YENİ LİDER SIRIYIR
9-01-2013, 08:42
İRAN MƏTBUATINDA MÖVSÜM SƏMƏDOVUN CİDDİ TƏBLİĞATI APARILIR
DİA.AZ: - Dünən məlum oldu ki, Azərbaycan İslam Partiyasının (AİP) həbsdə olan sədri Mövsüm Səmədov Penitensiar Xidmətin həbsxanalar üzrə mərkəzləşdirilmiş xəstəxanasına köçürülüb. Bu barədə AİP liderinin həyat yoldaşı Mehparə Səmədova məlumat verib.
Onun sözlərinə görə, dünən səhər saatlarında ürəyində ağrıların yaranması Səmədəovun həbsxanadan xəstəxanaya yerləşdirilməsini labüd edib: "Bu gün (dünən) Hacını görmək üçün saxlandığı həbsxanaya gedəcəkdim. Lakin sonra özü mənə oradan zəng vuraraq gəlməməyimi söylədi. Səbəbini soruşduqda, səhhətində problemlər yarandığını və bu səbəbdən xəstəxanaya yerləşdiriləcəyini dedi."
Qeyd edək ki, Mehparə Səmədova bizə açıqlamasında həmçinin söylədi ki, son bir ayda Mövsüm Səmədovun ürəyinin arxa damarlarında qan çatışmazlığı yaranıb. Bu səbəbdən onun vaxtında dərmanları qəbul etməsi və həkim nəzarətində olması gərəkdir.
DİA.AZ bildirir ki, neçə müddətdir İranın xüsusi xidmət orqanları Mövsüm Səmədovdan yeni lider istehsal etməyə də girişib. Artıq molla rejimina aid mətbuatda Mövsüm Səmədovun bütləşdirilməsi yönündə fəaliyyət də qabarıq şəkildə hiss olunmaqdadır.
Elə “AranNews” portalında yer alan silsilə məqalələri də bu qəbildən hesab etmək olar ki, onlardan birini diqqətinizə təqdim edirik: “Qaynağımızın "İmam Zaman (əc)" məscidinin mədəniyyət bölməsindən verdiyi məlumatına əsasən, Azərbaycan İslam Partiyasının sədri doktor Mövsüm Səmədovun həbsinin ikinci ildönümü ilə eyni zamanda "Azərbaycanda İslami Hərəkatın Son Durumunun Təhlili" toplantısı Təbrizin Əbbasi məntəqəsinin "İmam Zaman (əc)" məscidində keçirilib. Toplantı mədəniyyət işçiləriləri və yerli əhalinin geniş iştirakı ilə keçirilib. Mərasimdə çıxış edən höccətül-islam vəl-müslimin Bərgi deyib: "Biz bu günləri bu müqəddəs məkana toplaşmışıq ki, öz dini təlimlərimizə əsaslanaraq, Qarabağın indiyə kimi işğal altında qalmasına öz etirazımızı bildirək və dinlərinə əməl etməkdə problemlərlə üzləşdirilmiş azərbaycanlı bacı-qardaşlarımızla həmdərd olmağımızı bildirək".
Bərgi çıxışında imam Hüseynin (ə) qiyamından da danışmış, imamın Məkkədən Kərbəlaya kimi müxtəlif çıxışlarına, bu çıxışlarında qiyamını əmr be məruf və nəhy əz münkər etmək, zülmə qarşı mübarizə və məzlumun müdafiə etmək olması ilə bağlamasını, nahəyət, bu yolda öz əzizlərindən və canından keçməsinə işarə etmişdir.
Hacı Bərgi daha sonra Azərbaycan Respublikasının hazırkı durumu barədə izah verərək deyib: "Hal-hazırda İslam torpaqları hesab edilən bu ölkə torpaqlarının 20 faizi ermənilərin işğalı altındadır. Amma bu ölkə ermənilərin bayramı olan milad bayramı münasibətilə 7 gün rəsmi tətil elan edir, lakin Aşura və Ərbəin günləri tətil edilmir. Bu təəccüb və təəssüf doğurur".
O çıxışının davamında deyib: "Əlbəttə, Azərbaycanda şəhid Mübariz İbrahimov kimi qəhrəmanlar və Mövsüm Səmədov kimi mücahidlər də vardır ki, İslam və vətən yolunda öz can və azadlıqlarından keçibər".
Höccətül-islam vəl-müslimin çıxışında "belə bir qəhrəmanları olan ölkənin Qarabağı azad etməsi üçün ABŞ və sionist rejiminə ehtiyacı varmı"- deyə, bir sual da ortaya qoymuşdur.
O daha sonra bu ölkə dövlətinin hicab qadağasını, məscidləri dağıtmasını və digər dini şüarlarla mübarizə etməsinə toxunaraq, xalqı mənəviyyatdan uzaq saxlamalarının ölkənin və cəmiyyətin zərərinə olması adlandırıb.
Bərgi bəyanatının digər bir hissəsində doktor Səmədov məhz dini etiqadları bəyan və dövlətin ilsamofobiya siyasətlərini tənqid etdiyi üçün 12 il həbsə məhkum olunmasını da qeyd edərək deyib: "Bəs, iddia edilən demokratiya hanı?!"
Doktor Səmədov və digər islamçıların hidayətlərini dəyərləndirən xətib, deyib: "Onlar, imam Hüseynin (ə) yolunu seçdilər və bütün azərilərin qürur və iftixarına səbəb oldular".
Xətib, daha sonra deyib: "Biz Mühəmməd (s) gətirən İslamın tərəfdarıyıq və Livan, Fələstin, Miyanmar və Qarabağın dərdini öz dərdimiz bilirik. Toplaşdığımız mərasimin keçirilməsi də bu dərdi hiss etdiyimizə görədir. Əgər bir kəs bizi digərlərinin işinə qarışmaqda təqsirləndirsə, biz, Qurani-kərimin müsəlmanları bir-birlərinin dini qardaş adlandırdığı ayə əsasında öz həmdin və həmdillərimizi müdafiə edirik və xatırladırıq ki, dinlə mübarizənin yaxşı aqibəti yoxdur. Çünki bundan öncə də Rzaxan Pəhləvi İranda, Atatürk Türkiyədə, kommunistlər həmin Azərbaycanda dinlə mübarizəyə qalxdılar, amma nakam qaldılar. Haradarır, Leninin fikirləri, Stalinin fikirləri... ".
Höccətül-islam vəl-müslimin Bərgi çıxışının sonunda təkid edib: "Gələcək, İslam və müsəlmanlarladır. Ümidvarıq ki, bütün müsəlman ölkələri İslama qayıtmaqla öz həqiqi izzətlərinə çatacaq və vahid cəbhə təşkil etməklə İslam düşmənləri qarşısında Aşura mədəniyyəti ilə qədəm götürəcəklər".
Mərasimin sonunda Qarabağın azadlığı və Azərbaycan Respublikasında dini məhdudiyyətlərin aradan qalxması üçün dua edildi”.
Geri qayıt