ƏLİ ABBASOVA MƏXFİ TAPŞIRIQ
30-11-2011, 11:26
RİTN ŞEFİNƏ İNTERNETƏ NƏZARƏT ETMƏK MİSSİYASI TAPŞIRILIB
DİA.AZ: - Hakimiyyətin həm daxili, həm də xarici durumunun ağır olması onu bir çox təxirəsalmaz tədbirlər görməyə məcbur edir. Rejimin ehtiyyat etdiyi və son vaxtlar daha çox narahat olduğu məsələlərdən biri də internetlə bağlıdır. Belə ki, artıq internetdə siyasi diskussiyalarla bağlı müəyyən canlanma müşahidə edilir. Bir çox siyasətçilər yazı və düşüncələrini internetlə paylaşmağa üstünlük verir.
Televiziya ilə xalqla ünsiyyətdən məhrum edilən müxalif liderlər internetlə daha geniş əlaqələr qurublar. Bu məsələdə Facebook sosial şəbəkəsi xüsusilə diqqət çəkir. Televiziya və radiolar birbaşa nəzarət altında saxlayan hakimiyyət internetin imkanları tam fərqli olduğundan burda da nəzarəti ələ keçirməklə ölkədə söz azadlığını, özünə qarşı olan fikri tam boğmağa çalışır.
Elə buna görədir ki, son vaxtlar ayrı-ayrı hakimiyyət nümayəndələri tərəfindən internetə nəzarətin vacibliyini bildirən bəyanatlar səslənir. Hakimiyyət rəsmiləri bunun üçün müxtəlif təklifləri dilə gətirir. Məsələn, bir müddət öncə rabitə və informasiya texnologiyaları naziri Əli Abbasov onlayn televiziyalar və müxtəlif internet fəaliyyətinin qanunauyğun olması üçün lisenziya almalı olduğunu bildirmişdi. Ə.Abbasovun ardınca Milli Televiziya və Radio Şurasının (MTRŞ) sədri Nuşirəvan Məhərrəmli internet radio və televiziyaların fəaliyyətinin tənzimlənməsinə ehtiyac olduğunu, lisenziyalaşmanın vacibliyini söyləydi.
Nazirlər Kabinetindəki etibarlı mənbələrdən “Dünya” informasiya agentliyi redaksiyasına (dia-az.life) daxil olan məlumata görə hakim komanda ölkə ərazisindəki internet fəaliyyətini nəzarət altına götürmək və özünə qarşı təhlükələri önləmək üçün artıq müəyyən tədbirlər görməyə başlayıb. Mənbənin bildirdiyinə görə bu məqsədlə şərti olaraq «Məxvi Texnologiya Nəzarəti» (MTN) adlandırılan mərkəz yaradılıb: «Mərkəz təbii ki, qeyri-rəsmi fəaliyyət göstərir və ilkin olaraq bura 50-ə yaxın internet və kompüter mütəxəsisi cəlb edilib. Bu mütəxəsislərə isə isə ümumi rəhbərliyi siyasi şəxs edir.»
Mənbənin sözlərinə görə MTN-in əsas işi müxtəlif bloqlara və saytlara nəzarət etmək, hakimiyyət əleyhinə olan hər hansı bir məlumatın və ya yazının hansısa bloqda və ya saytda yer alması haqda dərhal rəhbərliyi məlumatlandırmaq və bu zaman verilən göstərişləri yerinə yetirməkdir. Bizimlə söhbət edən mənbə interneti nəzarət altında saxlayan bu gizli mərkəzin iş prinsipləri haqqında da danışdı: «Dünya üzərindən gələn internet bir şirkət tərəfindən Azərbaycana gəlir. Azərbaycanda İnternet-provayderlər öz peyk rabitələrindən internetə çıxış üçün istifadə etmək hüququna malik deyillər və internetə Bakinternet - rabitə Nazirliyinin qurumu vasitəsilə çıxış əldə etməyə məcburdurlar. Buna görə də ona həmişə texniki kontrol, filtr qoymaq mümkündür. Lokal çərçivədə, yəni ölkə ərazisində interneti bu şəkildə nəzarətdə saxlamaq olur. Ölkəyə internet bir nöqtədən daxil olur və bu nöqtəyə təsir etməklə istənilən işi görmək olar. Məsələn, bu mərkəzdə istədikləri resursların Azərbaycan ərazisində açılmaması ilə bağlı tədbir görə, hansısa resursa ölkə daxilindən baxılmasının qarşısını ala, «Az» domenində olan resursların serverindən məlumatları silə bilərlər və s.»
Mənbənin sözlərinə görə hakimiyyət tərəfindən yaradılan gizli mərkəzin fəaliyyəti yalnız məlumatları silmək, sayt və bloqlara girişi məhdudlaşdırmaqla kifayətlənmir. «Bu mərkəzin əsas missiyalarından biri də ayrı-ayrı müxalif liderlərə qarşı da «qara piar» kompaniyalarının həyata keçirilməsidir. Belə ki, MTN-in kompüter və internet mütəxəsisləri, xakerləri vasitəsilə tanınmış müxalifətçilərin öz bloqlarında, imeyl ünvanlarında və ayrı-ayrı saytlarda onlar haqqında böhtan xarakterli məlumatların, foto və video görüntülərin yerləşdirilməsi gözlənilir».
Geri qayıt