ƏLİ HƏSƏNOV İFŞA OLUNDU
1-12-2011, 11:10
PA RƏSMİSİ HAQQINDA BİLDƏYİMİZ FAKTLAR MƏRHUM YAP-ÇININ YAZILARINDA
DİA.AZ: - Nə qədər qəribə görünsə də, bu gün bəzi dövlət qəzetləri də böhran keçirir. Bu baxımdan xüsusən də Prezident Adminstrasiyasına məxsus "Respublika" qəzetinin fəaliyyəti diqqəti çəkir. Əldə etdiyimiz məlumatlara görə, Prezident Adminstrasiyasının qəzeti olsa da, bu mətbu orqan ciddi maliyyə sıxıntıları ilə üzləşib. Mənbənin verdiyi məlumata görə, bu məsələ sırf subyektiv amillərlə bağlıdır. Belə ki, Prezident Adminstrasiyası ictimai-siyasi şöbənin müdiri Əli Həsənov hər vəchlə bu qəzeti ələ keçirməyə çalışmış, buna nail olmadıqda isə qəzetin rəhbərliyinə müxtəlif üsullarla təzyiq göstərməyə başlamışdır. Mənbə "Respublika" qəzetinin dövlət yardımından, digər dövlət və iqtidaryönlü qəzetlərə edilən güzəştlərdən kənarda saxlanıldığını, icra hakimiyyətləri, idarə və müəssisələrin bu qəzetə abunə yazılmalarına maneəçiliklər törədildiyini bildirdi. Mənbənin məlumatına görə, bütün bu təzyiqlərin arxasında PA ictimai-siyasi şöbənin müdiri Əli Həsənov dayanır. Özü də rəsmi qəzetlərə qarşı bu cür təzyiqlər Əli Həsənovun praktikasında ilk dəfə deyil. Eyni ayrı-seçkiliklə vaxtilə "Şəkinin səsi-İpəkçi" qəzetlərinin baş redaktoru, respublikanın əməkdar jurnalisti Salis Məmmədov da qarşılaşıbmış. Hətta o zaman məsələ o qədər kəskin xarakter alıb ki, Salis Məmmədov ölkə başçısı İlham Əliyevə açıq məktub ünvanlamaq mcburiyyətində qalıb.
Apardığımız araşdırmalardan sonra bu qalmaqalın detalları ilə bağlı bir sıra maraqlı məlumalar əldə etdik. Eyni zamanda "Şəkinin səsi-İpəkçi" qəzetərində sözügedən məsələ ilə bağlı dərc olunan yazılarla da tanış olduq. Aşağıda da elə bütün bunlar barədə bəhs edəcəyək.
Qeyd edək ki, ilk dəfə Salis Məmmədov hələ 2004-cü ildə Əli Həsənovla bağlı prezident İlham Əliyevə açıq məktub ünvanlayıb. "Şəkinin səsi-İpəkçi" qəzetinin 20 oktyabr 2004-cü il tarixli 15-16(306) sayında dərc olunan həmin məktubda deyilir: "Çox hörmətli prezident! Bu məktubu yazmaqla vaxtınızı aldığım üçün üzr istəyirəm. Çünki Sizin hər şey haqqında müəyyən məlumatınız olmalıdır.
Burada söhbət ictimai-siyasi şöbənin müdiri Əli Həsənovdan və onun bəzi xoşagəlməz hərəkətlərindən gedir. Əvvəla, qeyd edək ki, Əli Həsənov uşaq deyil. 10 ildən çoxdur böyük bir şöbənin rəhbəridir. Lakin bu illər ərzində bir addım da olsun irəli getməmiş, həmişə yerində saymışdır. Əli müəllimin şöbəsində könülaçan bir şey yoxdur, mətbuata, qəzetlərə qayğı göstərilmir. Jurnalistlərlə aparılan iş başlı-başına buraxılmışdır. Şöbənin müdiri Əli Həsənov rayonlarda təsadüfi hallarda olur. Onun yerli jurnalistlərlə görüşləri formal xarakter daşıyır.
Deyilənlərə inansaq, Əli Həsənov kabinet "xəstəsi"dir. İnsanlardan uzaq qaçır və s. Üz-gözündən zəhrimar yağır, xəstədir, beynəlxalq tədbirlər onun yeri deyil, Azərbaycanı biabır edə bilər".
Əməkdar jurnalist prezidentə açıq məktubunda ictimai-siyasi şöbə və onun gələcək fəaliyyəti barədə düşünməyin vaxtının çatdığını da bildirir: "Diqqət ilk növbədə ona yetirilməlidir ki, Əli Həsənov öz işinin öhdəsindən gələ bilmədiyini başa düşsün, dərk etsin. Bunu təkcə mən demirəm, hamı deyir. Və hamı yaxşı başa düşür ki, bu adamla bir yerdə işləmək, uzağa getmək mümkün deyil. Onun bəzi yersiz hərəkətləri də bunu təsdiq edir".
Salis Məmmədov buna misal kimi 2004-cü ildə Mətbuat günü münasibətilə jurnalistlərdən bir qrupunun orden və medallarla təltif edilməsi zamanı yol verilən çatışmamazlıqları göstərir və dolayısı ilə burada başqa məqsədlərin olduğuna işarə edir: "Tədbirə yaxşı hazırlıq görülməmişdi. Necə ola bilərdi ki, təltif olunan jurnalistlərin adları tədbir başlanana qədər açıqlanmasın, mətbuatda elan edilməsin? Bunu bir-iki gün əvvəl də etmək olardı. Görünür, Əli Həsənov özünə sərf edən variantı əsas götürübmüş. Həmin adların axıra qədər "sirli" saxlanılmasını vacib bilibmiş(?) Əli Həsənovdan soruşmaq istərdik: Həmin jurnalistlərin həqiqətən özləri bu həyatda var, yaxud "qondarmadırlar"? Bu sözləri tərədüd etmədən deyirik ki, məclisdə təkcə "adlar" sadalansa da, ən vacibi yaddan çıxarıldı. Əli Həsənov həmin jurnalistlərin yaşadıqları rayonların, işlədikləri redaksiyaların adlarını çəkmədi. Çünki Əli Həsənov fürsətdən istifadə edərək öz əzizlərini də təltif olunanların dəstəsinə salıbdır".
Daha sonra Salis Məmmədov 2004-cü ilə qədərki 10-12 ildə
Əli Həsənovun ölkənin, xalqın həyatında heç bir diqqətəlayiq fəaliyyət göstərmədiyini vurğulayıb: "Bəzi "xırda-para" işləri yadda qalmışdır. 1996-cı ilin sentyabrında əsas meylini YAP sədrinin birinci müavini Əli Nağıyevə yönəltmiş, onunla "curluq" etməyə başlamışdır. Məqsəd Əli Nağıyevin Ali Sovetə sədr gətirilməsinə kömək göstərmək idi. Əli Nağıyev də "Səs" qəzeti vasitəsilə yerli YAP-çıları Rəsul Quliyevin üstünə qaldırmağa başlamışdı. "İpəkçi" qəzeti isə haqqın tərəfinə durdu və "Səs"i bir balaca sancdı. Buna dözməyən hər iki Əli "İpəkçi"yə qarşı həmləyə keçdi. Əli Həsənov Bakıdan Şəki Şəhər İcra Hakimiyyətinin o vaxtkı başçısı Nəzir Əhmədova "ultimatium" göndərərək "İpəkçi" qəzetinin oxucu üzünə həsrət qoyulmasını tapşırdı. İcra başçısı Əli Həsənovu nə qədər başa salmaq istədi ki, axı "İpəkçi" Heydər Əliyevin ən çox sevdiyi qəzetlərdən biridir. Əli müəllim isə öz dediyindən dönmədi. Hətta öz əməkdaşı Nuşirəvan bəyi də bu işə qatdı. Bunu görən redaktor dərhal prezidentlə əlaqə yaratdı. Hər şey ona çatdırıldı və Əlilər geri çəkildilər. Bundan sonra Əli Həsənov "İpəkçi"dən üzr istədi(Bax: "Şəkinin səsi" 12 sentyabr 1996-cı il).
Mən özümü lovğalatmaq fikrində deyiləm. Hər cür yüksək mükafatlara layiqəm. "İstiqlal" ordeni, "Prezident təqaüdü" alanlar heç də məndən artıq adamlar deyil. Azərbaycan mətbuatına bir nəzər salın. Respublikada Heydər Əliyev ordeninin təsis edilməsinin ilk təşəbbüsçüsü də mən olmuşam. Əli Həsənov isə məndən daim "qisas" alır. O, 73 yaşlı əməkdar jurnalistə özünün necə deyərlər, ən dəyərli "hədiyyəsi" - "Tərəqqi" medalını təqdim etmək istəmişdir. Mən də öz növbəmdə Əli Həsənovun evinin yanında bu medalın bir "stendi"ni düzəldib ona hədiyyə etmək fikrindəyəm.
...Bu adamın öz vəzifəsindən başqa hər şeylə məşğul olduğu məlumdur. Əlində çoxlu səlahiyyət var. Kefi istədiyi adamlara "Prezident təqaüdü", orden və medallar verə bilər. Siz özünüz deyin, hansı ölkədə görünübdür ki, ölkənin başçısını hörmətdən salan bir məmur onun adını daşıyan "Prezident təqaüdü" ilə təltif edilsin?"...
Qeyd edək ki, "Şəkinin səsi-İpəkçi" qəzeti 4-5 il ardıcıl təzyiqlərlə üzləşib və bu, Salis Məmmədov dünyasını dəyişənədək davam edib. Hakimiyyətyönlü və rəsmi mətbuata nəzarəti tam ələ alan Əli Həsənov hazırda eyni üsullarla "Respublika" qəzetini ram etməyə çalışır...
Geri qayıt