KƏRƏM HƏSƏNOVU OFSAYTA ATIRLAR
3-07-2013, 13:48
ONUN ŞİRKƏTLƏRİ TENDERLƏRƏ TAMARZI QALACAQ
Əmlak Məsələləri Dövlət Komitəsinin sədri Kərəm Həsənova məxsus "Azinko" şirkəti bir müddət əvvəldən başlayaraq dövlət investisiya layihələrinin icrasından tədricən uzaqlaşdırılmağa başlayıb. Hazırda şirkətin əlində çox cüzi dövlət sifarişləri var. Bu isə Kərəm Həsənovun şirkətini maliyyə sıxıntısı ilə üz-üzə qoyub. Məlumatı redaksiyamıza etibarlı mənbə verib.GUNDEMİNFO.AZ yazır ki, 2006-cı ildən fəaliyyətə başlayan "Azinko Holdinq" MMC şirkətinin tərkibinə əsasən tikinti üzrə fəaliyyət göstərən 5 müstəqil MMC - "Klass Az Ko " MTK, "Xəzər Az Ko" MTK, "Sahil Az Ko" MTK, "Az-İn-Ko " MMC və "Regional İnşaat" MMC daxildir. "Yarandığı vaxtdan "Azinko Holdinq " MMC otel binalarının, yüksək mərtəbəli yaşayış binalarının, qısamüddətli istirahət evlərinin, biznes mərkəzlərinin və digər mülki tikinti işləri ilə məşğuldur. 2010-cu ildən isə Bakıda çeşidli söküntü və tikinti işləri "Azinko" vasitəsilə həyata keçirilib. Həmin dövrdən keçən iki il ərzində Kərəm Həsənovun şirkəti bir çox dövlət layihələrinin icrasını həyata keçirib və bu zaman fantastik məbləğlərlə müşahidə olunan vəsait əldə edib".
Mənbə deyib ki, əslində "Azinko" şirkətinin tədricən dövlət investisiya layihələrindən uzaqlaşdırılması ilə bağlı qərar da son 2 ildə Kərəm Həsənovun holdinqinin Bakıda həyata keçirdiyi layihələrlə bağlı vətəndaşlardan kütləvi narazılıqların daxil olması və projelərin icrası zamanı ayrılan vəsaitlərin bir hissəsinin mənimsənildiyinə dair şübhələrin yaranmasından irəli gəlib: "Kərəm Həsənovun eyni zamanda deputat olan qardaşı Malik Həsənovun faktiki rəhbərliyi altında fəaliyyət göstərən "Azinko" xüsusilə Bakının mərkəzindəki söküntülər zamanı vətəndaşlarda ciddi narazılıq yaradıb. Məsələn, "Neftçilər" prospekti-61 ünvanında vətəndaşlara heç bir sənəd təqdim edilmədən onlara məxsus evlər başına uçurulub. Hətta həmin vaxt sözügedən ünvandakı sakinlər dəyəri 300 min manatdan çox əşyanın "Azinko" əməkdaşları tərəfindən gecə vaxtı evlərdən oğurlandığını iddia edirdilər. Paytaxtın mərkəzindəki Şəmsi Bədəlbəyli və Mirzağa Əliyev küçələrində olan 100-dən artıq evin sahibləri onlara gəlinən hədə-qorxu nəticəsində çölə atılıb. Qalan 110 evin sakinləri isə evlərində ola-ola onların mənzilləri sökülüb. Hətta "Azinko"nun işçilərinin mənzillərindən çıxara bilmədikləri sakinlərin evlərini yandırdıqlarına dair də o dövrün mətbuatında ilginc iddialar vardı.
Mənbəmiz qeyd edir ki, müşahidələr tam əminliklə deməyə əsas verir ki, Bakı şəhərində bir neçə yerdə "Azinko" şirkəti zorakı formada söküntü və ya tikinti işləri aparıb. Bu zorakılıq aşağıdakılardan ibarət olub: şirkətin işçiləri heç nəyə əhəmiyyət vermədən mənzillərdə əhali otura-otura evlərini onların başına uçurublar, şirkətin işçiləri evlərdən oğurluq etməklə və sakinlərə məxsus külli miqdarda əşyaları oğurlamaqla onlara maddi-mənəvi zərər yetirir və s. zorakılıqlar həyata keçiriblər. Bütün bunlarla bağlı ölkə rəhbərliyinə saysız-hesabsız şikayətlər, foto və video görüntülər ünvanlanıb. Komitə sədrinin şirkətindən narazılıqların, incikliklərin kütləviliyi, həmçinin ayrılan dövlət vəsaitlərinin mənimsənildiyinə dair iddialar (vətəndaşlara müəyyənləşdirilən kompensasiyaların ya az verilməsi, ya da ümumiyyətlə verilməməsi və s.) Kərəm Həsənovun iqtidar içindəki rəqiblərinə "Azinko"nu "vurmaq" üçün ciddi bəhanə verib".
Mənbənin sözlərinə görə, "Azinko"nun dövlət investisiya layihələrindən kənarda qalması Əmlak Məsələləri Dövlət Komitəsi sədrinin maddi kapital baxımından zəiflədilməsinin bir halqası hesab oluna bilər. Başqa bir iddiaya görə, sözügedən şirkətin Kərəm Həsənovun nəzarətindən çıxarılması da mümkündür.
Belə ki, Həsənovun hökumət kulislərindəki opponentlərinin adıçəkilən şirkəti dövlət investisiya layihələrindən kənarda saxlamaqla "Azinko"nu ciddi maliyyə problemləri ilə baş-başa qoymaq istəməsi realdır: "Bununla da komitə sədri şirkəti satmaq məcburiyyətində qala bilər. Ən pis halda təzyiqlər qarşısında geri çəkilən Kərəm Həsənov hakimiyyət içində daha ciddi siyasi problemlər qarşısında qalmamaq üçün "Azinko"dan könüllü imtina edə də bilər".
Hər bir halda, Əmlak Məsələləri Dövlət Komitəsi sədrinin şirkətinin ciddi problemlərlə, maliyyə sıxıntıları ilə baş-başa qaldığı reallıqdır. "Azinko" şirkəti ətrafında proseslərin isə Kərəm Həsənovun ən önəmli biznes quruluşuna başqa güc və ya güclərin əl qoyması ilə yekunlaşıb-yekunlaşmayacağını isə zaman göstərəcək.
Geri qayıt