ZİYA MƏMMƏDOVUN ANLAŞILMAZ TƏLƏBANİ SEVGİSİ
2-08-2013, 11:56
FƏHLƏLƏR DƏ KEŞLƏ STANSİYASINDA BAŞ VERƏN ÖZBAŞINALIQDAN YORULUB
DİA.AZ: - Keçən günlərdə Keşlə Dəmir Yol Stansiyasında, xüsusilə də stansiyanın Yükboşaltma Həyətində baş verən çeşidli qanun pozuntuları ilə bağlı faktları diqqətinizə təqdim etmişdik. Bildirək ki, bunun ardından redaksiyamıza daxil olan oxucu müraciətlərində stansiyada çalışan sadə kollektiv üzvlərinin böyük əksəriyyətinin irəli sürdüyümüz ittihamları tam təsdiq edikləri xüsusi vurğulanır.
Artıq qeyd olunduğu kimi Stansiyasının rəisi vəzifəsinə 2010-cu ilin iyul ayından etibarən təyin edilmiş Tələbani Tahirovun həmin postda atdığı ilk addımlar kollektivin belə narazılıqlarına səbəb olub. Bu barədə DİA.AZ-a danışan mənbələr bildirir ki, T.Tahirov rəis təyin olunandan sonra bu idarədə vaqon boşaltma xərcləri də artıb:
“Belə ki, əvvəllər 80 manata boşaldılan vaqon Təlabani müəllimin monopolist qaydalarından sonra 110 manata boşaldılır. Hər bir vaqon sahibindən alınan 110 manatın cəmi 20 manatı istismar olunan kran sahibinə verilir. Qalan 90 manat isə mərkəzləşmiş qaydada qəbz olmadan inkasatorlar tərəfindən yığılır və rəhbərliyə ötürülür”.
Müəyyən olunub ki, T.Tahirov hətta ağır istismara məruz qoyduğu fəhlələrdən də pul yığır. Bu qədər alınan pulun müqabilində təkcə qapıda 1-2 azn yazılmış qəbz verilir. Bunun qarşılığında isə maşınlarından 5 manatdan yığılır. Hər bir vaqon 2-3 maşına boşaldıldığı halda nə qədər pulun mənimsənilməsini hesablamaq çox da çətin olmaz. Digər tərəfdən isə Keşlə stansiyasında baş verən ən böyük qanun pozuntularının məhz Keşlə Yükboşaltma Həyətində həyata keçdiyini nəzərdən qaçırmaq olmaz.
Qeyd edək ki, bu günə qədər ölkə mətbuatında Keşlə Yükboşaltma Həyətinin rəisi Marif Niyazov barədə heç də T.Tahirovdan az material dərc olunmayıb: “Marif müəllim bu vəzifəyə gələndən alınan rüşvətlərin məbləği daha da artıb. Əlaltısı olan Etibar adlı şəxs burada boşalan hər vaqona görə kommersantlardan 20 azn pul alır. Bu pulu da gün ərzində boşalan 100-120 vaqona vurduqda, 2000-2400 azn pul etdiyi bəlli olur. M.Niyazovun Texniki Təhlükəsizlik üzrə işçisi olan Ceyhun müəllim isə vaqonda işləyən hər fəhlədən 2 azn aldığı halda belə, onları uniforma və kaska ilə yenə də təmin etmir. Kaskasız işləyən fəhlələr böyük təhlükə altında qalırlar. Bu da çox vaxt fəhlələrin zədələnməsi, bəzi hallarda isə ölümü ilə nəticələnir.”
Mətbuatda yayılan digər bir maraqlı məlumat da Keşlə Yük Boşaltma Stansiyasının ərazisində olan tikililərin istismarı ilə bağlıdır: “Keşlə Yük Boşaltma Stansiyasında olan tikililər Dövlət mülkiyyətidir. Onları nə satmaq nə də ki, icazəsiz sökmək, əlavə artırmalar etmək yol verilməzdir. Burada olan yeməkxana və digər iaşə obyektlərini yalnız müqavilə əsasıda müəyyən olunmüş müddətə icarəyə vermək olar. Tələbani Tahirovla Marif Niyazov isə əlbir olub buradakı obyektləri müqavilədə göstərilən məbləğdən dəfələrlə bahasına satıb və ya icarəyə veriblər. İcarəyə götürən şəxslər isə buranı zövqlərinə görə çayxana, yeməkxana, hətta qumarxana edəni də var. Yük Boşaltma həyətinin ən böyük yeməkxanasının icarədarı və taxta monopolisti olan hacı Elçin adlı şəxs isə yeməkxananın içində 6 ofis düzəltdirməklə gözü doymayıb, yeməkxananın üstünüdə bir mərtəbə artıraraq 6 ofisdə orada düzəltdirib. Hər bir ofisi 300 manatdan orada çalışan kommersantlara icarəyə verib ki, bu da ayda 3600 azn edir. Əlbəttə ki, bütün bu işlərdən Tələbani Tahirov və Marif Niyazovun xəbəri vardır.”
Qeyd etmək istərdik ki, biz materialın dərcindən həm əvvəl, həm də sonra bir neçə dəfə Keşlə Dəmir Yol Stansiyasının rəhbərliyi ilə əlaqə saxlamağa, irəli sürülən ittihamlara onların münasibətlərini öyrənməyə çalışdıq. Lakin, Marif Niyazovla qısamüddətli telefon danışığına və görüşə nail ola bilsək də, verdiyimiz sualların heç birinə cavab ala bilmədik. Başqa sözlə desək Marif müəllim əməkdaşlıq və birgə araşdırma aparılması baxımından qətiyyən konstruktiv mövqey nümayiş etdirmədi. Tələbani Tahirov isə bizim üçün hələlik ümumiyyətlə əlçatmaz olaraq qalır...
Geri qayıt