GÖYGÖLDƏ VƏZİFƏLİ ŞƏXS İNADKAR QAYNATA ROLUNDA
29-08-2013, 10:41
KEÇMİŞ GƏLİNİ VƏZİFƏLİ QAYNATASININ ƏMƏLLƏRİNDƏN ŞİKAYƏTÇİ DÜŞÜB
DİA.AZ: - Redaksiyamıza daxil olan növbəti oxucu məktubunda Göygöl rayonu Quşqara kənd bələdiyyəsinin sədr müavini Şahbaz İbrahimovun vəzifə səlahiyyətlərini aşaraq qanunsuz əməllər törətdiyi, habelə bu şəxs tərəfindən başqasının ailə həyatına qarışmaqla vətəndaşlara, o cümlədən həddi-büluğa çatmamış uşaqlara maddi və mənəvi ziyan vurduğu iddia olunur. Əslində burada istifadə etdiyimiz “başqası” ifadəsi daha çox formal xarakter daşıya bilər. Çünki məlumata görə Ş.İbrahimovun ailə həyatlarına müdaxilə etdiyi insanlar elə onun öz oğlunun, deməli həm də özünün ailə üzvləridir. DİA.AZ bildirir ki, şikayətçi kimi çıxış edən xanım da Şahbaz İbrahimovun hüquqları tanınmayan gəlinidir.
Öz məktubunda Nazilə Süleymanova bildirir ki, o, 26 yanvar 2009-cu il tarixində İbrahimov Eldəniz Şahbaz oğlu ilə evlənərək ailə qurub. Lakin Eldənizin ailəsi, xüsusən də atası Şahbaz İbrahimov bu izdivacı qəbul etmək istəməyib və gənc ailəni Eldənizin doğulub boya-başa çatdığı Göygöl rayonu Quşqara kəndindəki ata-baba yurdundan “mənim Eədəniz adlı oğlum yoxdur” deyərək qovub.
Bundan sonra Eldəniz və Nazilə Göygöl şəhəri, M.Ə.Rəsulzadə küçəsi ev 36 ünvanında yerləşən və Nazilənin bibisinə məxsus olan evdə yaşamağa başlayıblar. N.Süleymanova daha sonra yazır: “Bundan sonra biz öz münasibətlərimizi rəsmiləşdirmək qərarına gəldik və bu məqsədlə də Göygöl şəhəır VVADQ şöbəsinə müraciət etdik. Lakin biz nikahımızı Göygöl VVADQ şöbəsində deyil, 05 may 2009-cu il tarixində Samux rayon VVADQ çöbəsində rəsmiləşdirə bildik. Çünki Göygöl VVADQ-da bu münasibəti rəsmiləşdirməyə Quşqara kənd bələdiyyəsinin sədr müavini olan qaynatam mane oldu. Hal-hazırda iki azyaşlı övladımız var. İbrahimov Ramal Eldəniz oğlu 27 mart 2010-cu ildə, İbrahimov Şahbaz Eldəniz oğlu 26 avqust 2012-ci ildə dünyaya gəlib.”
Lakin aradan keçən illər, hətta dünyaya yeni gəlmiş iki oğlan nəvəsi belə münaqişəyə son qoymağa səbəb olmur. Əksinə, nigahdan narazı olan atanın təkidləri sonda ailənin dağılması ilə nəticələnir. Bu barədə N.Süleymanovanın məktubunda oxuyuruq: “İndi də Şahbaz İbrahimov Eldənizin övladlarına hər ay ödəməli olduğu alimentin ödənilməməsi üçün əlindən gələn hər şeyi edir. Bir müddət bundan əvvəl mənə zəng edərək hədə-qorxu gəlməyə başladı: “Mən o uşaqları nəvə gözü ilə görmurəm, onlar mənim nəvələrim deyillər. Eldənizə də “dəlilik” kağızı alacağam ki, o, sənə və sənin uşaqlarına aliment verməsin. Mənə əxlaqsızdan olmuş nəvələr lazım deyildir, mənim şərəfim, ləyaqətim var.” Heç utanıb çəkinmədən mənə şər-böhtan atan bu adama demək istəyirəm ki, əlində dediklərini sübut edəcək bir dəlili varsa ortaya qoysun. 2012-ci ilin may ayında da Fizuli Hərbi Məhkəməsində mənim ünvanıma nalayıq sözlərlə, təhqirlərlə dolu şahid ifadəsi vermişdi. Bütün bunları əsas gətirərək mən onu şərəf və ləyaqətimi alçaltdığı üçün məhkəməyə verə bilərəm, lakin məndə daha məhkəmə instansiyalarının ədalətliliyinə inam qalmadığı üçün bunu etmirəm...”
Özünün məhkəmə qərarlarına şübhə ilə yanaşmasını isə Nazilə aşağıdakı faktla izah edir. O, bildirir ki, 2013-cü ilin yanvar ayında Azərbaycan Respublikasının Ali Məhkəməsinin qərarına əsasən Quşqara kəndində yerləşən və İbrahimov Şahbaza məxsus olan qanunsuz tikili sökülməli idi. Həm də bu işin icrası onun öz hesabına həyata keçirilməli idi. Lakin icra hələ də ləngiyir. Göygöl rayon İcra xidmətinin məmurları evin sökülməsi ilə bağlı dəfələrlə Ş.İbrahimovla görüşsələr də, o, hər dəfə bir bəhanə gətirərək evin sökülməısini ləngidir. Gah kənd camaatının evin sökülməsinə etiraz etdiklərini iddia edir, gah da ki, başqa bəhanələr gətirir. Daha sonra N.Süleymanova bələdiyyə sədr müavininin öz vəzifə səlahiyyətlərini aşma hallarına yol verdiyinə dair konkret faktlar da təqdim edir. Bildirilir ki, Şahbaz İbrahimov Quşqara kəndində Mustafa adlı bir şəxsin ata-babasından qalmış obyektini qanunsuz olaraq ələ keçirib bir başqasına 100.000 (yüz min) manata satmışdır. Mustafa kişi müxtəlif yerlərə şikayət etməsinə baxmayaraq hələ də onun obyekti qaytarılmır. Hər dəfə şıkayət etdikcə Ş.İbrahimov onun yanına gələrək obyektin müqabilində ona 40.000 (qirx min) manat verəcəyini deyir. Amma hələ ki, heç bir ödəniş etməyib.
Qarşı tərəfi də dinləməyə hazırıq...
Geri qayıt