İCRA BAŞÇISI XƏTAİNİ SƏHRAYA ÇEVİRİR
5-09-2013, 10:25
VƏ YAXUD RAZİM MƏMMƏDOVUN TƏBİƏTƏ OLAN NİFRƏTİ
Rayon sakinləri mətbuata ünvanladıqları müraciətlərin bir çoxunda vurğulayıblar ki, illər öncə Xətai yaşıllıqların sayına görə digər rayonlardan fərqlənirmiş. Razim Məmmədov rayona rəhbər keçəndən sonra isə ağacların qara günləri başlayıb. Apardığımız araşdırmalar isə göstərir ki, əslən Qərbi Azərbaycandan olan məmur rayona başçılıq etdiyi 2006-cı ildən bu yana saysız-hesabsız qanunsuzluqlara imza atıb, minlərlə ağacın qırılmasına səbəb olub. Haqqında mətbuatda gedən tənqidlərdən məlum olur ki, icra başçısı Xətainin bütün qəsəbələrində boş torpaqları satıb, ağaclarla dolu olan sahələri isə şumlatdırıb. Fikrimizi başqa sözlə ifadə etsək, məmur ağacları kəsdirərək yerini ayrı-ayrı şəxslərə satıb. Bizə məlum olan rəqəmlərə görə, hazırda Xətaidə obyekt tikintisi üçün satılan ən ucuz yerlərin bir kvadratmetri 2 min manatdan başlayır. Yəni 40 kvadratmetrlik yerin qiyməti 80 min manatdır. Həzi Aslanov qəsəbəsində, Məhəmməd Hadi küçəsinə gedən istiqamətdə bir müddət öncə aparılan «yaşıl soyqırım» nəticəsində böyük bir ərazi tanınmış iş adamlarından birinə satılıb. Deyilənə görə, həmin sahibkar başdan-başa ağacla əhatə olunan sahəni ələ keçirmək üçün icra hakimi ilə 15 milyon manat qarşılığında razılaşıb. Qısa zaman kəsiyində burdakı ağaclar vəhşicəsinə qırılıb, yerində ticarət obyektləri tikilib. Məlumata görə, kəsilən ağacların yerində «Azza», «Sultan», «Daimoni» kimi brend firmaların mağazaları fəaliyyət göstərməyə başlayıb. Bundan başqa, Razim Məmmədovun başçılığı ilə Heydər Əliyev parkının yuxarı hissəsindəki ağaclar da amansızcasına qırılıb və yeri müəyyən miqdarda pulun qarşılığında kiməsə satılıb. Hətta bu məsələ ilə bağlı mətbuatda gedən informasiyalardan sonra icra hakiminə yuxarılardan sərt xəbərdarlıq da gəlib. Buna baxmayaraq, başçı qanunsuz işlərini yenə də davam etdirməkdədir. Bu arada, bir neçə ay əvvəl Xətai rayonu, Gəncə prospekti 73 saylı binanın qarşısında ağaclar kəsilməsi barədə xəbər vermişdik. Sakinlərin bildirdiyinə görə, onlarla ağacı kəsib yerində naməlum tikili tikiblər. Maraqlıdır ki, həmin zaman özlərini ekologiya idarəsinin işçiləri kimi təqdim edən bir qrup şəxs ağacları kəsməyə cəhd göstərib. Sakinlərin etirazından sonra ərazidən uzaqlaşıblar.
Vətəndaşlar onu da bildirib ki, binanın yeganə yaşıllıq zolağı binanın qarşısıdır. Qeyd edək ki, Xətai rayonu Gəncə prospekti 20 A ünvanında baş verən torpaq sürüşməsində Razim Məmmədov suçlanıb. Sakinlər bildiriblər ki, ərazidə tikinti məqsədi ilə qazıntı işlərinə başlanılıb. Bu məqsədlə də bir neçə ağac kəsilib. Bundan sonra isə sürüşmə baş verib. Vətəndaşlar qeyd ediblər ki, həm yaşıllıqların məhv edilməsində, həm də digər yaşayış binalarının təhlükə altına atılmasında başçının günahı böyükdür. Çünki burdakı yeni tikililər məhz icra başçısına məxsusdur: «Yaşıllıqları çox sakit şəkildə məhv etdilər. İndi bir-iki yerdə yaşıllıq qalıb ki, onu da məhv edəcəklər. Kimsə də söz deyə bilmir. Dəfələrlə müraciətlər etsək də, bizə aşkar surətdə bildiriblər ki, Razim Məmmədov birbaşa olaraq yuxarılarla məsələni həll etdiyindən yaşıllıqların məhv edilməsinə belə göz yumulur». Xətaidə ağacların daha çox kəsildiyi yerlərdən biri də Qaçaq Nəbi və Məzahir Rüstəmov küçələrinin arasında yerləşən sahədir. Bir müddət əvvəl mətbuatda yayılan məlumata görə, «Səma» kafesinin yaxınlığında çoxlu sayda ağaclar kəsilib və gecə ikən ərazidən aparılıb: «Ərazidə işlər yalnız gecədən sonra aparılır. Agaclar kəsilir, onların kəsilməsini gizlətmək üçün kəsilmiş ağacın kötüyü torpaqla, daşla və sement məhlulu ilə basdırılır». Onu da bildirək ki, hazırda Əhmədli, Həzi Aslanov, NZS və Köhnə Günəşli qşəsəbələri ərazisində vur-çatlasın torpaq alveri gedir və böyük yaşıllıq sahələri məhv edilir. Bu qədər özbaşınalıq törətməsinə baxmayaraq, icra hakiminə təpinən, «gözün üstə qaşın var» deyən yoxdur. Satdığı torpaqlar hesabına milyonçuya çevrilən Razim Məmmədov özünə və yaxın qohumlarına yüksək səviyyəli şərait qurub. Onun təkcə Xətai rayonu ərazisindəki qəsrlərinin qiyməti on milyonlarla ölçülür. Bakının ən bahalı yerlərində müxtəlif qohumlarının adına sənədləşdirdiyi mənzilləri var. Hələ biz «milyonçular məhləsi»ndəki imarətlərindən danışmırıq. Yaxud ölkənin ən dilbər rayonlarında tikdirdiyi villalarını demirik. Bizə çatan məlumatlara görə, icra başçısının Xətai rayonu ərazisində yüzlərlə irili-xırdalı obyektləri var. Oğlunun 15 yaşı olanda 260 min avroya «Porsche» almışdı. Görəsən, o bütün bunları vəzifə maaşı iləmi əldə edib? Buna qətiyyən inanmırıq. Əgər 800-1000 manat maaşla bu qədər varidat yığmaq mümkün olsaydı, onda çoxları Razim Məmmədova bənzəyərdi. Çox istərdik ki, cənab prezident Xətaini yaman günə qoyan icra hakimi ilə bağlı müvafiq ölçü götürüb tezliklə onu vəzifədən uzaqlaşdırsın.
Qarşı tərəfin də cavab haqqını tanıyırıq.
Geri qayıt