"HƏTTA AÇIQ-SAÇIQ OLSA BELƏ"...
3-10-2013, 09:01
DİA.AZ Akademik Milli Dram Teatrının aktrisası Fəridə Əliyevanın Milli.Az-a müsahibəsini təqdim edir.
- Aktrisa olmaq həvəsini sizdə kim yaratdı?
- Bu istək məndə birdən-birə, öz-özlüyündən yaranmağa başladı. İçimdəki həvəsin artdığını görüb aktrisa olmaq qərarımı qətiləşdirdim. Bu yolda çox əziyyətlər çəksəm də, nəhayət, öz arzuma çatdım.
- Çox gənc yaşda Akademik Milli Dram Teatrının aktyor heyətinə cəlb edilmisiniz. Bu teatrın səhnəsində indiyə qədər hansı tamaşalarda rol almısınız?
- “Boy çiçəyi”, “Şah Qacar”, “12-ci gecə” və s. kimi tamaşalarda iştirak etmişəm. Hətta “12-ci gecə” tamaşası ilə qastrol səfərinə də getmişik.
- Bəs bu gənc yaşınızda hansı rolu canlandırmaq arzusundasınız?
- İnanın, elə bir iddiam yoxdur ki, hansısa rolu oynayım. Sadəcə olaraq, hansı rol həvalə olunursa, onun öhdəsindən gəlməyə çalışıram.
- Hansı aktyorla tərəf müqabili olmaq istərdiniz?
- Azad Şükürovla eyni səhnəni bölüşüb onunla tərəf müqabili olmaq ürəyimcə olar.
- Sizə verilən hər rolu asanlıqla qəbul edib oynayarsınız?
- Bəli, oynayaram. Hətta açıq-saçıqlıq olsa belə. Çünki bu sənət bunu tələb edir. Aktrisalığı seçən hər bir kəs əvvəlcədən sənətin bu tərəfini mütləq fikirləşməlidir.
- Yerli seriallardan təkliflər alırsınızmı?
- Bəli, “Son hədd” serialında çəkilmişəm. Bir neçə müddətdir ki, yeni serialdan dəvət almışam. Artıq çəkilişlərə start verilib.
- Nədən gileylənirsiniz?
- Tənbəlliyimdən (gülür). Həqiqətən, çox tənbələm.
- Səhnəyə çıxanda nə fikirləşirsiniz?
- Yaddaşım zəif olduğuna görə çox narahat oluram. Qorxuram ki, hansısa söz, hansısa hərəkət yadımdan çıxar.
- Ən çox istədiyiniz insan kimdir?
- Mən özüm qədər heç kimi istəmirəm...
- Bu eqoistlikdir?
- Xeyr, sadəcə olaraq, ola bilsin ki, tənha böyüdüyümə görə heç kimi özüm qədər istəmirəm,əzizləmirəm.
- Xatirələr sizi hara aparır?
- Rəhmətlik nənəmlə keçirtdiyim xoş anlara, xoş günlərə...
- Ayağınızın altını “qazmaq” istəyənlər çoxdur?
- Saysız-hesabsızdır (gülür).
- Qazılan bu “quyu”lardan hansınasa düşmüsünüzmü?
- Xeyr, həmişə ehtiyatımı yaxşı saxlamışam. Ona görə də, belə hallarla rastlaşmamışam.
- Bəs sizi nə sarsıda bilər?
- Düşünürəm ki, heç nə. Çünki həyatın çox sınağından çıxmağı bacarmışam. Buna görə də özümü çox güclü insan hesab edirəm.
- Bəziləri həyatın teatr, bəziləri isə kino olduğunu deyir. Bəs sizcə?
- Məncə, həyatın bunların heç biri ilə əlaqəsi yoxdur. Səhnədə, yaxud kinoda oynayırsan. Həyatda isə yaşayırsan. Yəni ki, insan həyatda heç bir rola girmədən öz həyatını yaşamağı bacarmalıdır, hətta yaşamağa borcludur.
- Bir aktrisa kimi gələcəkdə hansı uğurlara imza atmağı planlaşdırmısınız?
- Hələ ki, heç bir planım yoxdur. Əslində, mən hər şeyi zamanın öhdəsinə buraxmışam. Yəni ki, konkret hansısa bir məqsədimə çatmaq üçün yaşamıram.
Geri qayıt