RAZİM MƏMMƏDOV XƏTAİ SAKİNLƏRİNƏ QAN UDDURUR
7-10-2013, 11:40
İCRA BAŞÇISINDAN NARAZILIQ SON HƏDDƏ ÇATIB: VƏTƏNDAŞ ŞİKAYƏT EDİR
DİA.AZ: - Xətai rayonu, Əhmədli qəsəbəsi 2944-cu məhəllə, ev 131-də yaşayan Səmədova Qönçə Hacıağa qızı neçə ildir ki, Rayon İcra Hakimiyyətinin (RİH) başçısı Razim Məmmədovun qeyri-qanuni əməllərindən yuxarı instansiyalara şikayət edir. Vətəndaş o idarə yoxdur ki, oranın qapısını döyüb üzləşdiyi problem haqqında, icra başçısının səbəb olduğu neqativ işlər barədə məlumat verməsin. Ancaq bu günə qədər müraciət etdiyi dövlət qurumlarından heç birində onun şikayətinə baxan olmayıb, icra hakiminin özbaşınalıqlarının qarşısı alınmayıb.
DİA.AZ-a daxil olan məlumatda deyilir ki, müraciət ünvanladığı strukturların hamısında isə ona «məsələni araşdırıb sizə məlumat verərik» deyib başlarından ediblər. Hələ də bu vaxta qədər dövlət orqanlarının araşdırmaları yekunlaşmaq bilmir. Əli hər yerdən üzülən Qönçə xanım dünən yenidən redaksiyamıza gələrək seçki ərəfəsində yaşadığı acınacaqlı vəziyyət haqda məlumat verdi:
«Sağ olsun mətbuat mənim şikayətimə biganə qalmır. Nə vaxt bura gəlirəmsə, problemimi araşdırıb səsimi yuxarılara çatdırırlar. Keçən dəfə jurnalistlər gəlib yaşadığım şəraitldə yerində tanışolmuşdu. Vallah belə şəraitdə heç heyvan da yaşamaz. Mən isə məcburiyyət qarşısında, daha doğrusu, başqa əlacım olmadığı üçün burda yaşayıram. Qaldığım yerə heç ev də demək doğru deyil. Bura ancaq komaya oxşayır. Yağış və kanalizasiya suları komanın döşəmə və tavanını pis günə qoyub. Siçovul, ilbiz, müxtəlif zərərverici qurdların əlindən rahat otura bilmirik. Çox ağır şəraitdə yaşayırıq. Qızım və böyük oğlum astma xəstəsidir. Məcburiyyət qarşısında qızıma kirayə ev tutub orda yaşadıram. Ailəli olan oğlum da kirayədə qalır. Mənim yanımda qalan oğlum isə astma xəstəsidir. Hər gecə o, öskürəndə sanki mənim ürəyimə bıçaq vururlar. «Aerezol» dərmanı ilə yaşayır. Hər axşam onun ağzına bu dərmandan tökməsəm, yaşaya bilməz.
20 ildən çoxdur ki, Xətai Rayon İcra Hakimiyyətində güzəştli mənzil növbəsinə dayanmışam. İcra başçısı Razim Məmmədov bizi insan gözündə görmür. O, ailəmizi ölümə məhkum edib. Özü və yaxın qohumları xan kefində yaşayırlar. Biz isə min cür zülm ayaqlayırıq. Mənim istifadəmdə olan torpağı qanunsuz şəkildə əlimdən alaraq başqalarına satıb. Bacısı oğlanları və bacısı qızları Xətai rayonunu zəbt ediblər. Onun vəzifədə işləyən bacısı oğlu Rafiq Əliyev 116 saylı orta məktəbin həyətini qanunsuz olaraq zəbt edib və burda özünə villa tikdirib. İcra hakiminin qohumları əla vəziyyətdə yaşayır, amma mənim kimi yoxsullar ağır şəraitdə. Bunu Allah götürməz. İcra hakimi ailəmin başına çox işlər açıb, bizi hər dəfə ölümlə hədələyir. Qəzet vasitəsilə hüquq-mühafizə orqanlarına səslənirəm. Mənim və ailə üzvlərimin başına bir iş gəlsə, hətta dırnaqlarına belə xətər dəysə bunu Razim Məmmədovdan bilsinlər. Başçı ondan şikayət etdiyim üçün mənimlə yola getmir. Dərdimi demədiyim idarə qalmayıb. Ölkənin bütün güc strukturlarına, hüquq-mühafizə orqanlarına dəfələrlə müraciət etmişəm. Amma heç biri deyəsən, icra başçısı ilə bacara bilmir. Yeganə ümidim isə cənab prezidentlə baş prokuror Zakir Qaralovadır.
Ölkə başçısından xahiş edirəm ki, seçkiqabağı bizi ölümə məhkum edən icra başçısı haqqında zəruri tədbirlər görsün. Zakir müəllimdən isə bircə onu istəyirəm ki, məni qəbul etsin». Qönçə xanım sonda onu da qeyd etdi ki, şikayəti təmin olunmasa, ölkə vətəndaşlığından imtina edib xarici ölkələrdən birinə sığınacaq: «Neçə ildir ki, mübarizə aparıram. Heç bir nəticəsi yoxdur. İcra hakiminin qanunsuz əməllərinə son qoyulmasa, ailəmi də götürüb başqa ölkəyə mühacirət edəcəm».
Mövzu ilə bağlı qarşı tərəfin də fikirlərini öyrənə bilərik.
Geri qayıt