ŞƏMKİRDƏ BÜDCƏ PULLARINI KİMLƏR TALAN EDİR?
8-10-2013, 15:49
Şəmkir Regional Maliyyə İdarəsinin müdiri Nazim Məlikov və onun tabeçiliyində çalışan bir sıra əməkdaşlar yol verdikləri ciddi nöqsanlarla «Dövlət büdcəsi haqqında» Qanunun tələblərini kobud surətdə pozur, həmçinin rayonun idarə, müəssisə və təşkilat rəhbərlərini təngə gətiriblər. Bu və digər önəmli məqamlarla bağlı əldə etdiyi bilgiləri bizimlə paylaşan məlumatlı şəxsin sözlərinə görə, Şəmkir Regional Maliyyə İdarəsi bir müddət öncə Qazax Peşə Liseyində yoxlama apararkən bəzi nüanslara əhəmiyyət verməyib.
Nazim Məlikovun rəhbərlik etdiyi qurumun əməkdaşlarının yoxlama adı altında kifayət qədər ciddi qanun pozuntularına imza atdıqlarını vurğulayan mənbə iddia edir ki, Şəmkir Regional Maliyyə İdarəsinin yetkili şəxsləri bir sıra yollarla xeyli gəlir əldə etməyə müvəffəq olurlar: «Şəmkir Regional Maliyyə İdarəsinin əməkdaşları özləri yoxlama adı altında ölkənin qüvvədə olan qanunlarını pozur, əyrintilərə rəvac verirlər.
Onlar yoxlama apardıqları idarə, müəssisə və təşkilatlarda ilk öncə şərəflərinə hazırlanmış ziyafətdə iştirak edir, daha sonra isə «şərt»lərini irəli sürür və beləliklə də işlərini yekunlaşdırırlar. Məsələn, bir müddət əvvəl Nazim Məlikovun işçiləri Qazax Peşə Liseyində yoxlama aparıblar. Maraqlı məqam ondadır ki, adıçəkilən təhsil ocağında bir sıra neqativ halların yaşanmasına baxmayaraq, Şəmkir Regional Maliyyə İdarəsinin əməkdaşları liseydə heç nə aşkarlamayıblar. Nəzərinizə çatdırım ki, hazırda Qazax Peşə Liseyində 7-8 nəfər 65 yaşdan yuxarı müəllim çalışır. Hətta tədris işləri üzrə şöbə müdirinin də yaşı 65-dən yuxarıdır. Liseydə 100 nəfər müəllim, usta və texniki işçi çalışır. Əmək qanunlarına görə, 100-ün 2 faizi 65 yaşdan 70 yaşa qədər müqavilə ilə işləyə bilər. Qazax Peşə Liseyində isə bu faiz 6-7-dir. Əslində, bunun özü kobud qanun pozuntusudur. Lakin nədənsə Şəmkir Regional Maliyyə İdarəsi bu və bu kimi digər məqamları görməzdən gəlib. Görəsən, niyə?..»
Bu arada, Şəmkirdə böyük maliyyə yeyintisinin mövcud olduğunu qeyd edən məlumatlı şəxsin bildirdiyinə görə, rayonun sosial-iqtisadi inkişafı üçün dövlət büdcəsindən ayrılan vəsaitlər düzgün xərclənmir: «Son bir ildə Şəmkir rayonunun sosial-iqtisadi inkişafı üçün büdcədən 13 milyon manatdan artıq vəsait ayrılıb. Bu vəsaitin çox böyük hissəsi isə təyinatdankənar xərclərə sərf olunub. Təkcə bu ilin birinci rübündə rayonun abalaşdırılması üçün 600 min manat, Şəmkir rayonunun yollarının əsaslı təmiri üçün isə 1 milyon manata qədər vəsait "Gəncə Körpü Tikinti-2" MMC-nin hesabına köçürülüb. Ötən il isə Şəmkirin abalaşdırılması üçün 12 milyondan artıq vəsait başda "Ağstafasutikinti" ASC, "Gəncə Körpü Tikinti-2" MMC və "Şəmkir Tikinti 18" ASC olmaqla bir neçə firmanın hesabına köçürülüb. Bunlardan "Ağstafasutikinti" ASC-nin hesabına 4 milyona yaxın vəsait köçürülüb. Rayonda aparılan abadlıq işləri isə mədəniyyət sarayının, icra hakimiyyətinin binasının və rayon kitabxanasının mişar daşları ilə üzlənməsi olub.
Bundan başqa bazara gedən yol təmir olunub. Bir sözlə, rayonun sosial-iqtisadi inkişafı üçün bu qədər vəsaitin ayrılmasına baxmayaraq, Şəmkir Regional Maliyyə İdarəsi həmin vəsaitlərin bir hissəsini bəzi şəxslərlə birlikdə tamam başqa istiqamətlərə yönəldilməsinə rəvac verib. Bununla bərabər, rayonun uşaq bağçaları üçün ərzaq alınmasına ayrılan vəsaitlər də həzmrabedən keçirilir. Bu isə onu deməyə əsas verir ki, Şəmkir Regional Maliyyə İdarəsi büdcə vəsaitlərinə nəzarət edə bilmir. Lakin nədənsə hələ ki, nə Maliyyə Nazirliyi, nə də ki, digər müvafiq qurumlar Şəmkir rayonunda baş verənlərlə bağlı hər hansı bir tədbirə əl atmayıblar...»
Məsələ ilə əlaqədar qarşı tərəfin də mövqeyini dərc etməyə hazırıq.
Geri qayıt