ETİBAR ƏLİYEV DANIŞMAĞA HAZIRLAŞIR
30-04-2012, 16:35
HƏBSDƏ OLAN BANKİRİN SƏBR KASASI DAŞIB
DİA.AZ: - «Texnikabank» ASC ətrafında baş verənlər və Etibar Əliyevlə bağlı cərəyan edən proseslər artıq bir müddətdir ki, ölkə mətbuatının gündəmini zəbt edib. Məsələ ilə bağlı əldə etdiyimiz ən son məlumatlara görə, hazırda bankda ümumi vəziyyət kritik olduğundan «Texnikabank»ın əmanətçiləri ciddi təlaş içindədirlər. Çünki Etibar Əliyevin rəhbərlik etdiyi müddətdə həyata keçirilmiş müəmmalı bank əməliyyatları üzündən bu gün «Texnikabank» iflasın astanasına yaxınlaşıb.
DİA.AZ-a daxil olan son məlumatlara görə Azərbaycan Beynəlxalq Bankının İdarə Heyəti sədrinin müavini, baş maliyyə direktoru İsmayılov Rövşən İsmayıl oğlu «Texnikabank» ASC-nin Müşahidə Şurasının yeni sədri vəzifəsinə təyin olunub. Özü ilə birlikdə 10 nəfərlik kollektivlə bankın rəhbərliyinə gələn Rövşən İsmayılov tez bir zamanda Etibar Əliyevin və digərlərinin səhvlərini düzəltməyi planlaşdırır. Bu barədə məlumat verən mənbənin sözlərinə görə, yeni rəhbərlik artıq bu istiqamətdə bir sıra ciddi addımlar atmağa müvəffəq olub: «Məsələn, qısa vaxt ərzində aparılmış araşdırmalardan sonra məhz Etibar Əliyevin göstərişilə bankdan 200 min manatlıq obyekt üçün nə az, nə çox düz 1 milyon manat pulun kredit verildiyi məlum olub. Həmçinin, bu zaman müştərilərdən «şapka» alındığı da müəyyənləşdirilib. Bu cür faktlar yüzlərlədir.»
Sözügedən araşdırma zamanı həmçinin, Etibar Əliyevin bir neçə il ərzində həyata keçirdiyi digər qanunsuz bank əməliyyatları da ifşa olunub. Bununla bağlı məlumat verən mənbə bildirir ki, Etibar Əliyev və «TexnikaBank»ın bir neçə filialının rəhbəri Bakı şəhərindəki kimsəsizlərin - «bomj»ların adından istifadə edərək külli miqdarda qazanc əldə ediblər: «Məlum olub ki, kimsəsiz insanlar ilk əvvəl normal görüntüyə gətiriliblər. Yəni onlar üzləri qırxılıb, hamam qəbul edib bahalı geyimlərlə təmin olunduqdan sonra adlarına şirkətlər, MMC-lər təsis edilib. Bunun ardından həmin kimsəsizlər şirkət rəhbəri kimi «Texnikabank»ın filiallarında təqdim olunaraq müxtəlif sənədləri imzalayıblar. Nəticədə təxminən, 10 milyon manata yaxın vəsait mənimsənilib və ayrı-ayrı məmurların qeyri-qanuni yollarla əldə etdikləri pullar «təmizə çıxarılıb». Artıq bu işlə bağlı kifayət qədər cidd faktlar ortaya çıxıb. Həm də məlum olub ki, hüquq-mühafizə orqanları zamanında bu işlərdən bəzilərinin izinə düşsə də, həmin kimsəsiz insanlar günahkar kimi təqdim olunub və məsuliyyətə gəlb ediliblər». Mənbənin sözlərinə görə, hazırda 30-dan artıq kimsəsiz şəxs ayrı-ayrı cəzaçəkmə müəssisələrində şirkət sahibi kimi cəza çəkirlər: «Onların bəzilərinin ifadələri də alınıb və məlum olub ki, bu adamların ümumiyyətlə, bəziləri heç yazı yaza bilmirlər. Lakin «Texnikabank»ın sənədlərində həmin şəxslər az qala dövriyyəsi 4-5 milyon dollar olan şirkətlərin sahibləri kimi təqdim olunublar».
Etibar Əliyevin ən yaxın müttəfiqi «KredAqro» BOKT-un sabiq sədri, hal-hazırda «MolBulak» BOKT-un rəhbəri olan Eldar Cəfərovdan bu günlərdə izahat alındığını deyən mənbənin sözlərinə görə, çox güman ki, o Etibar Əliyevlə bağlı məlumatı olduğu bütün məsələlərə aydınlıq gətirib: «Ehtimal etmək olar ki, o, Etibar Əliyevin əleyhinə izahat verib. Onların bir çox ortaq biznesləri var. Bunlar «İnvest» BOKT, «Finans» Texnoloji BOKT, «Omini» Bank Olmayan Kredit Təşkilatları (hər birində hər iki şəxsin yaxın adamlarına aid 100 minlərlə səhmlər var), Tovuz rayonu Düz-Qırıqlı kəndi ərazisində «Ocaq» şadlıq sarayıdır (Eldar Cəfərov və Etibar Əliyevin anası həmin kənddəndir). Türkiyə və rusiyadaki biznesləri, Bakıda şərik tikinti biznesi və ən əsası yeni yaranmış «MolBulak» BOKT-dəki Etibar Əliyevin səhmlərinin həcmi araşdırılan məsələlərdəndir. Bununla yanaşı, Eldar Cəfərovun «KredAqro» BOKT-un direktoru işlədiyi vaxt Etibar Əliyevlə birlikdə etdiyi maxinasiyalar, əsasən ölmüş şəxslərin adına kreditlər rəsmiləşdirərək «Texnikabank»a məxsus «Alfa» Sigorta təşkilatı vasitəsilə mənimsəmələr və filial ofislərinin tikintisində olan yeyintilərin miqdarı da hal-hazırda araşdırılır».
Artıq Etibar Əliyevin danışmağa başladığını və istintaqda bütün məsələlərə aydınlıq gətirəcəyini deyən mənbənin sözlərinə görə, bu işdə bir neçə nüfuzlu nazirlərin adı hallanır: «Himayədarlarının ona arxa durmadığını görən Etibar Əliyev artıq danışmağa qərar verib. O, bu işdə əli olan hamının adını çəkəcək. Etibar Əliyev kimlərlə əlbir olduğunu, kimlərə, nəvaxt və nə qədər pul verdiyini, həmçinin himayədarlarının kimlər olduğunu bəyan edəcək. Hələlik məlum olan odur ki, bu işdə, yəni bankdakı böyük pulların itkin düşməsində kənd təsərrüfatı naziri İsmət Abasov başda olmaqla, bir neçə nazir və məmurun adı hallanır. Deyilənə görə, məhz onlar külli miqdarda vəsaitin «Texnikabank»dan itkin düşməsinə səbəb olublar. Odur ki, artıq Etibar Əliyevin susmaq fikri yoxdur. O, hələ də çoxlarına qaranlıq qalan bir çox mətləblərə aydınlıq gətirəcək».
Geri qayıt