“ORA RƏSUL QULİYEVLƏ DALAŞMAĞA GETMİŞDİM?”
25-06-2012, 11:33
“TİKİNTİDƏ FƏHLƏLİYƏ DƏ GÖTÜRMƏDİLƏR MƏNİ”
Bir müddət əvvəl Avropada eks-spiker Rəsul Quliyevin tərəfdarları ilə aralarında qalmaqal baş verən Belçikada mühacirədtə olan satirik şair Mirzə Sakit Gunxeber.com-a müsahibə verib. Maraqlı məqamlar və sərt ittihamlarla dolu müsahibəni təqdim edirik.
-Mirzə, Rəsul Quliyevin tərəfdarları ilə aranızda yaranan qalmaqala əsas səbəb nə oldu, niyə belə bir hadisə baş verdi?
-Əslində bu sualı mən Rəsul Quliyevin tərəfdarlarına ünvanlayıb deməliyəm ki, cənablar, nə hay-küy salmısınız, mən Rəsul müəllim haqda dediyim « xırda» sözünü niyə həzm etmək istəmirsiniz axi ?
Mən yenə deyirəm, Rəsul Quliyev Azərbaycanda yaranmış olan bu problemləri həll etməyə qadir deyil. Ən azından mən bu ölkənin vətəndaşı olaraq, hamının fəaliyyətinə azdan-çoxdan bələdəm, o cümlədən Rəsul müəllimin də. Rəsul müəllim yaxşı iqtisadçı ola bilər, zavod direktoru ola bilər, Heydər Əliyev sağ olsaydı, Parlamentə spikerlik edə bilər amma Prezident məsələsi Rəsul müəllimlik deyil, ən azından bunu O özü də gözəl bilir.
-Rəsul Quliyevin tərəfdarları bildirirlər ki, siz onun Brüsseldə keçirilən görüşünə dəvət olmamısınız və öz təşəbbüsünzlə ora gedərək eks-spikerə qarşı çox isti münasibət göstərmisiniz. Sizə qarşı Rəsul Quliyev tərəfdarları tərəfindən səslənən əsas itihamlardan biri də odur ki, siz Rəsul Quliyev və digərilərindən maddi yardım istımisiniz, onlar bunu etmədiyinə görə, onlara qarşı açıqlamalar verirsiz.
-Brüsseldə Ədalət Quliyev adında bir həmyerlimiz yaşayır. Ədalət bəy mənə zəng edərək bildirdi ki, Rəsul müəllim zəng etmişdi, gedək onunla görüşməyə. Mən Ədalət bəyə dedim ki, bəlkə heç Rəsul müəllim mənimlə görüşmək istəmir. O da cavab olaraq, mənə dedi ki, yox, Rəsul müəllimə sənin haqqında dedim, dedi ki, Mirzəni də gətir və biz də getdik. Qaldı ki, o görüşdə mənim Rəsul müəllimə isti münasibət göstərməyimə, mən məgər ora Rəsul Quliyevlə dalaşmağa getmişdim? Istənilən insanla görüşərkən hər bir kəs çalışır ki, öz səmimiyyətini göstərsin. Biz çox mehriban şəkildə görüşdük və söhbətləşdik. Həmin görüşdə mən nə Rəsul Quliyevdən, nə də ordakı insanların heç birindən maddi yardım üçün söz açmamışam. Insanları gözdən salmaq üçün ona ya narkoman, ya əyyaş, ya arvadbaz ya da ki, bax belə pul istəmə variantından istifadə edirlər. Keçən dəfə də Rəsul müəllimin tərəfdarlarından biri “Yeni Müsavat” qəzetinə açıqlama verərkən demişdi ki, guya mən Rəsul müəllimdən ailəmin Brüsselə gəlməsinə kömək etməsini xahiş etmişəm. Çox məntiqsiz və savadsız sözdü bu söz. Ailəmin Brüsselə gəlməsi xüsusi olaraq, hüquqi prosedur tələb edir. Bunu da Rəsul müəllim və qeyrisi yox, Belçika dövləti həll edir.
Gözümə güllə tutsalar da mən yalan danışmaram. 2010-cu ildə mən Hamburqda olarkən, orada yaşayan Hambur Azərbaycan Mədəniyyətinin sədri Azər Rövşənlə Hamburda “Azərbaycandakı siyasi vəziyyət və ondan çıxış yolları” mövzusunda bir konfrans düzənləmək istədik. Həmin konfransa çoxsaylı azərbaycanlıları və yerli hakimiyyətin nümayəndələrini də dəvət etmək fikrindəydik. Azər bəylə gedib bir-neçə konfrans zallarına da baxış keçirdik və o zallardan biri bizi qane etdi. Səhərisi gün Rəsul müəllim mənim telefonuma zəng etdi və mən ona bu konfrans haqda fikrimi bildirdim, o da dedi ki, mənim tərəfimdən nə kömək lazımdırsa, mən hazir. Konfransı keçirmək üçün zalın icarə haqqı və gələn qonaqlara kofe, çay təklif etmək üçün 3 min avro lazm idi. Mən Rəsul muüəllimə bunu bildirdikdə, o dedi ki, problem yoxdur, elə bilin ki, həll etmişəm. Amma sonradan o sözündən qacdı. Bunu Azər bəy də təsdiq edə bilər.
Mən bunu deməklə, Rəsul müəllimi günahkar saymaq fikrində deyiləm, həqiqət budur ki, nə Rəsul müəllim, nə də baçqasının bizə borcu var. Sadəcə özünü böyük hesab edən adam söz verdiyi məsələni həll etməyə çalışar. İndi təsəvvür edin ki, Rəsul müəllim prezidentliyə namizəddir və o öz platformasında xalqı xoşbəxt günə cixaracağını vəd edir. Ardını siz düşünün…
-Qeyri rəsmi məlumatlara görə, eks-spikerin özünün və Avropadakı tərəfdarlarının oradakı bəzi imkanlı soydaşlarımızdan Azərbaycanda böyük işlər gömək adı ilə maddi dəstək alması və bu reallaşmadığından ciddi problemlər yaranmasına dair məlumatlar var. Siz bu barədə nə bilirsiz?
-Bu haqda məlumatım yoxdur.
-Rəsul Quliyevlə görüşünüzdən sonra sizdə hansı təəssürat yarandı? Eks-spiker nə qədər ciddi görünür bu yoldakı mübarizədə?
-Mən Rəsul Quliyevlə bir həmyerli kimi göruşdüm. Eks-spikerin bu mübarizədə nə qədər ciddi görünməsi 2005-ci ildəki hadisələr zamanı təyyarənin trapında qaldı. Amma Rəsul müəllimlə oturub adi bir həmyerli kimi söhbət etmək maraqlıdır. Mən həmin söhbətdə gözləyirdim ki, Rəsul müəllim məşhur “Badbaxt” sözünü, o da o sözü işlədib məni xoşbəxt etdi.
-Mirzə, bu sizin siyasətçilər və digər şəxslərlə ilk münaqişəniz deyil. Məsələn, AXCP sədri Əli Kərimli, doğma qardaşınız, “Azadlıq” qəzetinin baş redaktoru Qənimət Zahidlə də problemləriniz olub. Yəni bütün bunlarda hər zaman günah qarşı tərəflərdə olub?
-Yemək yeyəndə yeməyin ətrafında müxtəlif salatlar olduğu kimi, siyasətçi anlamı da ortaya gələndə bu zaman onun yanında löyünbelöyün söhbətlərin meydana cıxması qaçılmazdı. Mən Əli Kərimlini bir-neçə dəfə haqlı olaraq, tənqid etmişəm və güman edirəm ki, az tənqid etmişəm. Əli Kərimli mənim, yəni onunla çiyin-çiyinə vuruşan insanın üzünə qızıl-qırmızı yalan danişdı, mən onu necə tənqid etməməliydim ? Əli Kərimli mənə dedi ki, “Azadliq” qəzeti ilə heç bir bağlılığı yoxdur. Bunu sıravi insanlar bəlkə bilməzlər, amma bu gün Azərbaycanda özuünü mətbuatda görən insandan bu haqda soruşsan, sənə ancaq gülə bilər. Mən gözəl anlayıram ki, siyasətdə bleflər olur, ancaq yuxarıda dediyim kimi mən yeməyin yanına qoyulmuş salat deyiləm ki, məni qaşıqlayıb yesinlər.
Qənimət Zahidlə də aramızdakı problemləri məhz bu qəbildən olan insanlar yaradıblar. Cəbhənin demək olar ki, bütün funksionerləri mənim “Azadlıq” qəzetindən qanunsuz uzaqlaşdırılmamı ədalətsizlik kimi dəyərləndirirdilər, lakin bu adamların heç biri bunu açıq şəkildə deyə bilmirdilər. Necə ki, YAP-dan YAP-çılarn əksəriyyəti narazı olduqları halda dillənə bilmirlərsə, AXCP-də də həmin qayda hökm sürür.
-Belçikada nə işlə məşğulsunuz? Daha bundan sonra avropayla baqlayacaqsınız həyatınızı?
-Hazırda oğlumla kamp deyilən yerdə qalırıq, hələlik heç bir işlə məşğul deyiləm. Hətta işlə məşğul olmaq istəsəm də sənədlərim qaydasına düşməyincə işləməyə icazəm yoxdur. Çalışacam ki, bir müddət burda qalım. Son iki ili Azərbaycanda işsiz qaldım, dostların bəziləri təsdiqləyə bilərlər, ailəmi dolandırmaq üçün tikintidə fəhləliyə də götürmədilər məni. Iş icraçısı dedi ki, sənə böyük hörmətim var, amma səni işə götürsəm, başım bəla çəkər. Hər halda mən ondan incimədim.
-Nə dəyişdi Mirzə Sakitin həyatında Azərbaycandan getməklə?
-Bir o dəyişdi ki, vətəndəki dostlar-doğmalar üçün darıxıram. Ömrümün elə bir çağıdır ki, mənim qürbətlik halım yoxdur, bəziləri mənə yazırlar, bəxtəvər adamsan ki, cənnətdə yaşayırsan. Heç bir cənnətlik hal keçirmirəm, düzdür, buralar çox gözəldir, qanunların işlək mexanizminə söz ola bilməz. Amma təəssüf ki, bu gözəlliklərdən də gözəlliklər öz vətənimizdədir, lakin qanunlar işlək olardısa…
-Deyirsiniz ki, Azərbaycanda yazılarınızı, şeirlərinizi vermirlər heç Avropa mətbuatında çap olunmaq üçün cəhd etmisiniz
-Avropa mətbuatında yazılarım yox, bir-neçə dəfə müsahibələrim olub. Hələlik yeganə tribunam internetdir. Bu tribunaya isə nə bizim hakimiyyətin, nə də Cəbhənin aidiyyəti var. Tam şəffaf şəkildə senzorsuz, İlham Əliyevsiz, Azər Əhmədovsuz, Əli Kərimlisiz yazılarımı yazıram. Bu da bir qənimətdi…
Gunxeber.com
Geri qayıt