CƏLİLABADDAKI QƏTLLƏ BAĞLI YENİ FAKTLAR
28-06-2012, 13:20
“MAŞINDAN DÜŞÜB “GÖYTƏPƏDƏ MƏNDƏN BAŞQA KİŞİ YOXDU” DEYİB BAĞIRDI”
DİA.AZ: - Bir neçə gün əvvəl Cəlilabad rayonunda “Kurtlar Vadisi” adlı mafiyanın peyda olması barədə məlumat vermişdik. Xatırlada ki, ötən ayın 27-də Cəlilabad rayonunda 1982-ci il təvəllüdlü , 2 uşaq atası Əsmətov Nazim Ağəddin oğlu qətlə yetirilib. Qeyd edək ki, bu barədə DİA.AZ-a mərhumun Ceyhun adlı qardaşı məlumat vermişdi. Onunun bildirdiyinə görə, rayonun Göytəpə şəhər Qurtuluş prospektində, polis şöbəsinin düz 150 metrliyində baş verən hadisədə bir qrup “reket”liklə məşğul olan şəxslər tərəfindən amansızcasına döyülüblər. Dava nəticəsində onun böyük qardaşı Nazim Əsmətov Göytəpə şəhər sakini Həsənov Mirhəsən Mirməməd oğlu tərəfindən qəsdən bıçaqlanaraq öldürülüb. Bu məlumatı bizə verən Ceyhun Əsmətov isə amansızcasına döyülüb. Onun sözlərinə görə, rayonda ticarətlə məşğul olan qardaşlara özlərini seyid adlandıran və Göytəpədə “reket”liklə məşğul olan şəxslər hücum ediblər. Ceyhun Əsmətov bildirib ki, həmin reket qrupunun üzvləri daha öncə də onun qardaşını hədələyərək, aylıq haqq verməsini tələb ediblər.
Onu da bildirək ki, artıq bu məsələyə DİN-dən də reaksiya verilib və qurumun nümayəndəsi Orxan Mansurzadə deyilənlərin həqiqətə uyğun olmadığını bildirib. İndi isə redaksiyamıza qarşı tərəf öz mövqeyini yollayıb ki, biz də KİV haqqında qanuna uyğun olaraq qarşı tərəfin mövqeyini olduğu kimi diqqətinizə çatdırırıq:
“Əvvəlcə sualınıza cavab olaraq yazıram. Məqalədə qeyd edibsiniz ki, “cinayətlərinə”! Bu bizim başımıza gələn ilk hadisədir ki, bunun da cəzası olaraq qardaşım Mirhəsən həbsdədir! Bu hadisə də məqalədə tamamilə səhv vurğulanıb.
Məqalədə olan yalanlardan biri 3 minik maşınına 25-30 nəfər mümkün deyil otursun! İkincisi isə əvvəl də yazılıb ki, hadisə guya rəhmətlik evə gedərkən baş verib, daha sonra isə Fazil Məmmədovun həyətində baş verdiyi bildirilir.
Hadisənin necə olduğunu sizə acıqlamağı özumə borc bilirəm. Mən Həsənov Mirhuseyn 27 may günü dostum Anargildən çıxırdım. Göytəpədə yaşayan Meşdi ləqəbli Nazim və rəhmətlik Əsmətov Nazimlə qardaşı Əsmətov Ceyhun 2 maşınla gəldilər bizdən 10-15 metr aralı dayanaraq maşından düşdülər və bağıraraq “Göytəpədə məndən başqa kişi yoxdu”, “məndən başqa kişini filan-filan edərəm” söyuşlərini söyməyə başladılar..
Mən də bunlara yaxınlaşdım ki, bəs ayıbdı belə etməyin və bu vaxt bunların sərxoş olduğunu hiss elədim. Bir az da bununla özümə təskinlik taparaq dedim ki, bilmirlər nə danışırlar bəlkə də sabah tutduqları əməllərinden peşman olarlar və bunları da bu cür başa salmaq istədim. Amma başa duşdük ki, bunların məqsədi məni və dostumu döyməkdir və belə də oldu.
Bunu eşidən Mirhəsən, yəni qardaşım hadisə yerinə gələrək məsələyə aydınlıq gətirmək istədi, amma bunların sərxoşluğu ucbatından bu da baş tutmadı və aramızda qarşılıqlı əlbəyaxa dava düşdü…
Hadisəni görən qonum-qonşu haraylıq etdilər və dava yatırıldı… Bundan bir-iki saat sonra onlar bizimlə yenidən əlaqə qurdular ki, məhz Mirhəsən tək gəlsin və söhbət edək. Qardaşım Mirhəsən də onları telefonda barışığa dəvət etdi, söhbətin bağlanmasını təklif etdi və onların olduğu məkana tək gedərək aradakı mubahisəni sülhlə bitirmək istədi. Amma dediyim kimi, onlar sərxoş idi, qardaşım (Mirhəsən) onların olduğu yerə çatanda onu (Mirhəsəni) çox ağır təhqirlə qarşılayıblar və üstünə hücum ediblər.
Bu zaman qardaşım (Mirhəsən) bir anlıq əsəblə rəhmətliyə (Nazimə) bir bıçaq zərbəsi vurmuşdur, rəhmətlik (Nazim) ciyərindən xəstə (GEPATIT-C) olduğuna görə xəstəxanaya çatar-çatmaz vəfat edib..
Biz bu hadisəyə çox təəssüflənirik və yas saxlayırıq. Bizim yaşam tərzimizə gəldikdə isə bu hamıya bəyandır ki, biz halal zəhmətimizlə Göytəpədə olan çörək sexini işlədirik. Adı çəkilən gülməli qrup haqqında heç bir məlumatımız, yaxından-uzaqdan əlaqəmiz yoxdur. Göytəpədə Ağsaqqal kimi tanınan Mirelman kişinin uşaqlarının belə bir rəzalətlə işi olmaz. Buna Göytəpə camaatı şahiddir.
Qaldı ki, əmim Mirilqar bir dövlət məmurudur və qanunla hərəkət edən bir alicənab insandır. Onun sadılövhlüyü hər kəsə bəyandır”.
Geri qayıt