«FƏRƏC QULİYEV GECƏLƏR HƏBSXANADAN EVƏ BURAXILIRDI»
2-07-2012, 14:12
Bir neçə gün öncə sizlərə hazırda millət vəkili olan və bir zamanlar AXC-nin İcrayyə Komitəsinin rəhbəri işləmiş Fərəc Quliyevlə bağlı olaraq sabiq AXC fəallarından olan sahib Hüseynovun yazısını yayımlamışdıq. Yazının ardını da təqdim edirik.
Qeyd edək ki, yazılanlarla bağlı olaraq millət vəkilinin də şəxsi mövqeyini öyrənmək istəsək də, hələlik heç bir nəticəsi olmayıb. Deputatın köməkçisi saytımıza kitablardan çıxarış edərək məqalə yollayıb ki, bu məqalədə də Sahib Hüseynovun dediklərinin heç birindən söz açılmır.
YAZININ DAVAMI
- Mən həbs olunub iş alandan sonra məni iki nömrəli islah koloniyasına göndərdilər. Mən iki nömrəli kolona gələndə orada cəbhəçilər çox idi. Bütün cəbhəçi dustaqlar bir yerdə komuna kimi yaşayırdılar. Yəni hamı ümumi bir yerdə yığışırdı.
Hamının, yəni cəbhəçi dustaqların bir anbarı, bir süfrəsi var idi. Kimin yanına nə gətirirdilərsə bu anbara yığılırdı və sonra kimə nə lazım olurdusa buradan götürürdü. Yəni aramızda varlıda, kasıbda var idi. Adam var idi ki, yanına gələni olmurdu və ya ildə bir iki dəfə gəlirdilər. Uşaqlar işi elə qurmuşdu ki hamı bir nəfər kimi idi. Bu situasiya Fərəc Quliyev gələnə kimi belə davam edirdi. Lakin Fərəc Quliyev ora gətiriləndən sonra vəziyyət dəyişdi.
Fərəc Quliyevdən sonra iki nömrəli həbsxanaya mən gəldim. Bir aydan sonra Fərəc Quliyev bu komunanı dağıtdı. Yəni uşaqlara dediki “ Siz niyə mənim şeylərimdən istifadə etməlisiniz? Bu mənim xoşuma gəlmir. Ona görə də mən ayrı oturacağam”.
Azərbaycan əmək islah koloniyalarında (ƏİK) ərazi iki yerə bölünür. Yaşayış ərazisi, iş ərazisi. Sovet sistemi zamanı dustaqlar iş ərazisində işləyir, sonra yaşayış ərazisində yatıb istirahət edirdilər. Koloniyaların adından göründüyü kimi əmək məcburu idi. Sovet sistemi dağılandan sonra məcburi əmək ləğv edildi və iş ərazilərində olan sexlər və iş yerləri boş qaldı.
İmkanlı və admnistrasiya tərəfindən xüsusi himayə olunan dustaqlar iş ərazisində olan otaqları müəyyən məbləğdə pul əvəzliyində admnistrasiyadan icarəyə götürüb orada yaşayırdılar. Onlar qara dustaqlar tərəfindən “ burjuy” adlandırılırdılar. Burada yaşamaq üçün mütləq hakimiyyətə loyal olmalısan. Bu əsas şərtdir, ola bilər sənin milyonların olsun, amma sən hakimiyyətə loyal deyilsənsə sən “ burjuy” ların yanında qala bilməzsən. Adi dustaqlara bura girmək qadağan olurdu. İş ərazisi ilə yaşayış ərazisini ayıran postda nəzarətçilər durur və buraya girişə xüsusi nəzarət edirdilər. Müstəqilliyimiz zamanı artıq bu əraziyə ancaq “ burjuy”lar və onların istədiyi adamlar girib çıxa bilərdilər.
Fərəc Quliyevin yanına çox gəlirdilər. Öz ailəsindən başqa bir çox tanınmışlar, cəbhəyə simpatiyası olanlar, bayırda olan cəbhəçilər onu Elçibəyin davamçısı sayır, onun yanına adam göndərirdilər. Əli Kərimlinin, İsa Qəmbərin, Flora Kərimova və sairlərin adından onun yanına gəlirdilər. Onun yanına gətirilən koməklər əslində bütün dustaq çəbhəçilərə olunan kömək idi.
İnanmıram ki, bunu Fərəc Quliyev bilmirdi. Lakin o bütün bunlara rəğmən iş zonunda gələn hər bir şeydən tək istifadə edirdi. Fərəc Quliyev üçün bu şəraiti yaradan admnistrasiya bizi iş zonasına buraxmırdı. Bizdə o zamanlar onu liderimiz kimi qəbul edir və sadəlöhvlüyümüzdən onun hərəkətlərinə göz yumurduq. Tutulandan bu yana həbsxanada istintaq zamanı, islah koloniyasında bizə qarşı olan qəddar rəftarla ona qarşı olan yumşaq rəftar böyük təzad təşkil edirdi. Bizi döyürdülər, söyürdülər, işgəncə verirdilər ona isə heç nə……..
Sonralar öyrəndik ki, bütün bu oyunların məqsədi başqa imiş. Axı koloniyada heç nə gizlətmək olmur. Bizə də simpatiyası olan nəzarətçilər var idi. Onlar bəzi şeylərdən gizlicə bizi xəbərdar edirdilər. Onların dediyinə görə hərdən Fərəc Quliyevi gecələr evə aparırlar və səhər gətirirlər. Onda aydın oldu ki, bizi niyə iş ərazisinə buraxmırdılar. Fərəcin bizimlə qalmaq istəmədiyinin səbəbini başa düşdük və ona olunan himayə görəsən onun hansı böyük xidmətlərindən xəbər verir. Onun bu günki attığı addımlarla dünənkiləri yada salıb analiz etsək cəbhədaşlarıma hər şey aydın olar.
Sahib Hüseynov / gundeminfo.az /
Geri qayıt