HƏLƏ DƏ İŞGƏNCƏLƏR DAVAM EDİR
3-08-2012, 11:12
ƏMİRASLANOVUN İŞİNDƏKİ KOBUD POZUNTULAR
Sabirabad rayonunun Əsgərbəyli kənd sakini İlham Əmiraslanovun qanunsuz silah və döyüş sursatı saxlaması işi üzrə istintaqın yekunlaşdığı rəsmi elan olunub.
Əmiraslanov daşqından ziyan çəkənlərin hüquqlarını müdafiə edən və fəlakətin nəticələrinin aradan qaldırılmasında korrupsiyaya qarşı mübarizə aparan “Kür” vətəndaş cəmiyyətinin fəallarından biridir.
Vəkil Samir İsayev “Turan” Agentliyinə bildirib ki, dünən ibtidai istintaqın materialları ilə tanış olub. Materiallarda, xüsusən protokollarda, şahid ifadələrində bir çox uyğunsuzluqlar aşkar edilib. Məlum olub ki, iyunun 8-də Əmiraslanov saxlanılarkən mülki və polis geyimli şəxslər onu döydüyü zaman tibbi ekspertiza keçirilməsi haqqında qərar çıxarılmayıb. Ekspertiza prokuror Vüsal Salehov tərəfindən tələb olunan müddətdən xeyli gec təyin edilib. Bu məsələ və digər pozuntularla bağlı istintaq orqanlarına vəsatətlər göndərilib, lakin vəsatətlərin heç biri təmin edilməyib.
Nə şübhəli şəxs Əmiraslanov, nə də onun vəkili istintaq qərarının mətni ilə tanış deyillər, baxmayaraq ki, qərar guya poçtla onlara göndərilib. İndi Əmiraslanova qarşı ittiham irəli sürülməsi və işin Sabirabad rayon məhkəməsinə göndərilməsi gözlənilir. İsayev hesab edir ki, siyasi sifariş olmasa, müvəkkilinin uydurma ittihamları təkzib etmək üçün kifayət qədər şansı var. Həm də dünən o, işgəncə ilə ifadə verdiyi barədə müraciətlə çıxış edib.
Əmiraslanov iyunun 8-də “Makarov” tapançası və onun güllələrini saxlamaq ittihamı ilə həbs edilib. Ona qarşı CM-in 228.1-ci (odlu silah və döyüş sursatlarının saxlanması, daşınması) maddəsi ilə ittiham irəli sürülüb. Bu maddə üzrə iki ilə qədər icbari iş və ya üç ilədək azadlıqdan məhrumetmə cəzası nəzərdə tutulur.
Amma “Kür” vətəndaş cəmiyyəti qərargahı Əmiraslanovun həbsinin əsl səbəbi olaraq 2010-cu il daşqınından ziyan çəkmiş Aran bölgəsinin əhalisinin müdafiəsi üzrə göstərdiyi hüquq-müdafiə fəaliyyətini göstərib.
Həbsdən sonra işgəncələrə və qeyri-insani rəftara məruz qalması ilə bağlı Əmiraslanovun Baş Prokurorluğun DİN orqanlarında istintaq və araşdırmalara nəzarət İdarəsinin rəisi Kamal Qılıcova şikayətində yazılır:
Əmiraslanov iyunun 8-də Sabirabad rayonunun Əsgərbəyli kəndi yaxınlığında aptekdən evə dönərkən saxlanılıb. Bir neçə polis və DİN-in Mütəşəkkil Cinayətkarlığa qarşı Mübarizə İdarəsinin əməkdaşları ona hücum çəkiblər, başına torba keçiriblər və maşına oturdublar.
Yolda Səid adlı əməliyyatçı onun kəməri ilə bədəni arasına hansısa bir əşya qoyub. Bu zaman Əmiraslanovun başına bir neçə zərbə endirilib.
Saxlanılan Əmiraslanovu Sabirabad olimpiya kompleksinə aparıblar, burada stula bağlayıblar və başına torba keçirilmiş halda döyməyə başlayıblar.
Daha sonra Nadir adlı rəisin yanında Əmiraslanovdan maşında üzərinə qoyulmuş əşyanı alıblar, bu, tapança imiş. Bu an videoya çəkilib.
Əvvəlcə Əmiraslanova tapançanı qardaşından aldığını etiraf etməyi təklif ediblər. Amma Əmiraslanovun tapançanın maşında üzərinə qoyulduğu barədə bəyanatı Səidi qəzəbləndirib və o, yenidən onu döyməyə başlayıb.
Daha sonra Əmiraslanov Sabirabad rayon polis idarəsinin rəis müavini Rauf Məcidovun otağına aparılıb. Burada yenidən “onun üzərindən tapança götürülməsini” çəkiblər. Burada da Əmiraslanovu döyməyə davam ediblər və etirafedici ifadə verməsə, şüşənin üstünə oturtmaqla hədələyiblər.
Əmiraslanov tapançanı iki ay əvvəl Araz çayının sahilində mal-qara otararkən tapdığı barədə etirafedici ifadə verməyə məcbur olub.
Daha sonra Əmiraslanova deyiblər ki, o, “5 güllə verməlidir”. Onları haradan alacağı barədə suala cavabda evinin zirzəmisinə atacaqları cavabı veriblər. Elə həmin gün Əmiraslanovu evinə gətiriblər və o, zirzəmidə sellofan içərisində 5 güllə tapıb.
Əmiraslanov bəyanatında yazır ki, zorakılıq hərəkətləri nəticəsində təbil zarı zədələnib, o, pis eşidir və güclü ağrılar hiss edir.
Onun ürək nahiyəsində də güclü ağrılar var. O, təcili tibbi müayinə təyin olunmasını və məhkəmə-tibbi ekspertiza keçirilməsini, habelə işgəncə faktlarının araşdırılmasını tələb edir.
Prokurorluq araşdırma aparıb, lakin nəticələri haqqında məlumat verməyib
Yalnız müxtəlif instansiyalara dəfələrlə müraciətindən sonra Ədliyyə Nazirliyinin tibb işçiləri onu bir neçə dəfə müayinə ediblər, lakin döyülmə izləri aşkar etməyiblər. Məsələn, Bakı istintaq təcridxanasının rəisi Elxan Sadıqov və BİT tibbi-sanitar hissəsinin rəisi səlahiyyətlərini icra edən Qurban Hüseynov Samir İsayevin adına ünvanlanan məktubda (14.07.12, №17/38-5329) rəsmi olaraq aşağıdakıları bildiriblər:
- 9 iyun 2012-ci ildə Əmiraslanov istintaq təcridxanasına daxil olduğu zaman keçirilən tibbi müayinə onun sağlamlığında heç bir problem olmadığını müəyyən edib, bədənində hər-hansı patoloji dəyişikliklər aşkar edilməyib. Əmiraslanova praktiki olaraq sağlam diaqnozu qoyulub.
- 28 iyun 2012-ci ildə təkrar keçirilən müayinə zamanı bədəndə işgəncə izləri və qulaq deşilməsi aşkar edilməyib.
- 5 iyul 2012-ci ildə rentgenoqrafiya nəticəsində Əmiraslanovun döş qəfəsində əzilmə aşkar edilməyib.
- 11 iyul 2012-ci ildə “qulaq pərdəsinin quru deşilməsi” (partlaması) müəyyən olunub.
28 iyul 2012-ci ildə penitensiar xidmətin tibbi müəssisəsini və məhkəmə ekspertiza mərkəzini təmsil edən bir qrup həkim Əmiraslanovun qulaq pərdəsinin deşildiyini təsdiq edib.
Bütün bunlardan sonra Baş Prokurorluq avqustun 1-də qulaq pərdəsinin deşilməsinin travmatik xarakterli olmadığını, uşaqlıqda keçirilən xroniki xəstəliyin nəticəsi olduğunu rəsmi olaraq elan edib.
Məlumatda bildirilir ki, iyulun 11-də Penitensiar Xidmətin tibb müəssisəsi “sol qulaq pərdəsinin nöqtəvari quru deşilməsinin” qeyri-travmatik xroniki mənşəli olduğunu qeydə alıb.
Amma Turan agentliyinin əlində olan 11.07.12 tarixli (№17/38-5329) tibbi rəydə dəqiq belə deyilir: “sol qulaq pərdəsinin quru deşilməsi” müəyyən edilmişdir. Və tibbi rəydə prokurorluğun qeyd etdiyi deşilmənin mənşəyi ilə bağlı heç nə yoxdur.
Əmiraslanovun qardaşı Xəlil Turana bildirib ki, İlham heç vaxt qulaq xəstəliyi keçirməyib və iyunun 8-də həbsinə qədər heç vaxt qulağında ağrılardan şikayət etməyib.
Xatırladaq ki, Əmiraslanov iyunun 8-də 2010-cu il daşqınından ziyan çəkənlərin problemlərinin həlli ilə bağlı FHN rəhbəri Kəmaləddin Heydərovla görüşündən 4 gün sonra həbs olunub. Bu, nazirlə ilk görüş deyildi. 24 iyun 2010-cu ildə su altında qalmış kəndlərin sakinləri Bakıya gedən yolu bağlayaraq, Kür çayına bitişik kəndlərin sakinlərinin çöllərə köçürülməsi planına etiraz ediblər. Həmin vaxt Heydərov kənd sakinlərinin qarşısına çıxıb, Əmiraslanov da onuna söhbət edib. Sonradan köçürmə planı ləğv edilib. 5 may 2011-ci ildə Əsgərbəyli, Qasımbəyli kəndlərinin bir qrup sakini prezident İlham Əliyevin kortejinin önünə çıxıb. Prezident onlarla görüşüb və şikayətlərini dinləyib. Əmiraslanov da onunla söhbət edib. Görüşdən bir saat sonra FHN nümayəndəsi Əmiraslanova zəng edib və problemlərin həli üçün Əsgərbəyli kəndi ətrafında görüşməyi təklif edib. Əmiraslanov “Kür” qərargahına bildirib ki, o, deyilən yerə yaxınlaşdıqda oraya qara şüşəli iki ağ “Prado” gəlib, maşınlardan çıxan insanlar onu tutmağa çalışıblar, lakin o, qamışlıqlar arasından onlardan qaçıb. Sonradan ona daim psixoloji təzyiq göstərilib.
Prezident Administrasiyasının ictimai-siyasi şöbəsinin rəhbəri Əli Həsənov iyulun 2-də vətəndaş cəmiyyəti nümayəndələri ilə görüşdə bildirib ki, Sabirabadda həbs olunmuş hüquq müdafiəçisi İlham Əmiraslanovun işinə yüksək səviyyədə baxılacaq.
Geri qayıt