QƏRBİN AZƏRBAYCANDA YENİ İNQİLAB PLANI
5-09-2012, 13:47
BU DƏFƏ DAHA ÇOX SABİQ MƏMURLAR KORPUSUNA ÜSTÜNLÜK VERİLƏCƏK
DİA.AZ: - Sabiqlər dirilmə ərəfəsini yaşayır. Artıq bu haqda kifayət qədər məlumatlar gəlir. Odur ki, biz bu yazımızda həm həmin məlumatlara toxunacağıq, həm də aktivləşmə səbəblərini açmağa çalışacağıq. Hər halda, bütün bunlar prezident seçkilərinə hazırlaşan Azərbaycanın yeni siyasi mənzərəsinin elementləridir.
Onu da qeyd edək ki, keçən il Bakı şəhər Baş Polis İdarəsinin sabiq rəisi Məhərrəm Əliyev Tacikistan «sürgünündən» geri qayıtdı. Və hələ bu günə qədər yeni bir görəvə təyin edilməyib. Məlumatlara görə, Məhərrəm Əliyevin özü israrla diplomatik missiyadan imtina etməkdədir. O, bu barədə xahişlərini bir neçə dəfə «yuxarılara» ünvanlayıb. Amma onun üçün yeni sürgün ünvanının hazırlandığı bildirilir.
Amma bütün bunlarla yanaşı, Məhərrəm Əliyevin Azərbaycanda qalaraq yeni vəzifəyə təyin olunacağını söyləyənlər də var. Bildirək ki, bu barədə məlumatlar Məhərrəm Əliyevin Düşənğədən Bakıya döndüyü ilk gündəncə yayılmağa başlayıb. Amma bütün bunlara rəğmən Məhərrəm Əliyev son günlər bəzi KİV-ləri ələ keçriməklə, yeni təbliğöat kampaniyası yürütməklə məşğuldur ki, bu əsnada da daha çox diqqətçəkəni sabiq polis şefinin keçmiş naziri ilə köhnə ədavətini bərpa etməsidir.
Onu da qeyd edək ki, digər sabiqlərlə bağlı da müəyyən hərəkətlənmə xəbərləri daxil olmaqdadır. Elə bu günlərdə mətbuata açıqlama verən keçmiş deputat Nazim Məmmədovun «bu komanda ilə heç nəyə nail olmaq mümkün deyil» şəklindəki açıqlaması çox ciddi ünvanlarda təlatümə nədən olub. Bu barədə danışan mötəbər qaynaqlar bildirir ki, sabiqlərin demarşı hazırda görəv başında qalan «köhnəlmişlər» üçün böyük bir təhlükədir. Çünki onlar məhz «köhnəlmişlərin» sayəsində sabiq məmura çevriliblər.
Sabiq baş prokuror
Eldar Həsənov:
Məlumat gəlir ki, o da fəallaşmaq niyyətindədir. Sabiq baş prokurorun hətta bir sıra hakimiyyət içindəki müxalifətçitlərlə Rumıniyada görüşdüyü söylənilir, yayılan xəbərlərə görə, o, hətta görəv başında olan bəzi məmurlara da «dönürəm» ismarıcını yollayıb. Doğrudur, hakimiyyət başında olduqları zaman onların münasibətləri kəskin olub, amma deyəsən, ortaya çıxan ümumi maraqlar sürgün olunmuş sabiq baş prokurorda müəyyən fikir dəyişkənliyi yaradıb.
Sabiq Milli Təhlükəsizlik
Naziri Namiq Abbasov:
Ciddi şəkildə hakimiyyətin yuxarı pilləsi tərəfindən, konkret olaraq hakimiyyət içində qərar tutmuş rusiyameylli qüvvələr tərəfindən hədələnən, hətta fiziki cəhətdən məhv ediləcəyi üzünə deyilən sabiq milli təhlükəsizliyi naziri Namiq Abbasov heç də son illərin sükutu ilə barışmaq istəmir və onun da hərəkətlənmələrdə meylli olduğu qeyd olunur. Siyasi kuluarlarda gəzən söhbətlərdən aydın olur ki, sabiq MTN şefi qisas zamanı gözlədiyindən istənilən bir münbit situasiyada daha aktivcəsinə iştirak etməyə hazırdır.
Sabiq Əmək və Əhalinin
Sosial Müdafiə Naziri
Əli Nağıyev:
İlham Əliyevdən narazı qalmış keçmiş Əmək və Əhalinin Sosial Müdafiə naziri Əli Nağıyev də artıq Azərbaycandadır və o da, ən azından istefasının nədəninə çevrilmiş təhsil naziri Misir Mərdanovla haqq-hesab çəkəcəyi günü gözləyir. Qeyd edək ki, artıq bu istiqamətdə bir sıra addımlar atılıb və onun doğma qardaşı, Səbail rayonunun sabiq polis rəisi Nazim Nağıyevlə Əli İnsanovun tərəfdaşlarının danışıqlar aparması haqda məlumatlar var.
Sabiq Mətbuat və
İnformasiya Naziri
Sirus Təbrizli:
Artıq bu keçmiş YAP rəhbəri və hakimiyyət məmuru özünün hansı niyyətdə olduğunu açıq-aşkar nümayiş etdirib. Elə onun keçmiş səhiyyə naziri Əli İnsanovun məhkəmə prosesi keçirilən ərəfədə Atatürk mərkəzində etdiyi odlu-alovlu çıxış və sabiq səhiyyə naziri Əli İnsanova verdiyi açıq dəstək əslində, hansı proseslərin iştirakçısına çevrilməsindən xəbər verir. Digərlərindən fərqli olaraq Sirus Təbrizli açıq şəkildə hədəflərini də müəyyənləşdirərək hətta xalqı PA rəhbəri Ramiz Mehdiyevə qarşı etiraz aksiyasına da çağırıb.
Sabiq Səhiyyə Naziri
Əli İnsanov:
Bu adamın həm mövqeyi artıq hər kəsə məlumdur. Həbs olunduqdan sonra 37-ci ilin repressiyalarına xas şəkildə hakimiyyətin hədəfinə çevrilən Əli İnsanov artıq müxalifətdə olduğunu bəyan etməklə yanaşı, həm də bildirib ki, bundan sonra yalnız bu rejimin yıxılması istiqamətində fəaliyyət göstərəcək. Təbii ki, belə bir bəyanatın verilməsi çox mühüm hadisələrdən xəbər verir.
Sabiq İqtisadi
İnkişaf Naziri
Fərhad Əliyev:
Onun da gərəkən anda susmayacağı şübhə doğurmayan məsələdir. Onu da xatırladaq ki, bir zamanlar Fərhad Əliyevin yaxın adamlarına “Çiçəklənən Azərbaycan” Partiyası adlı yeni siyasi təşkilatın quruculuğu ilə məşğul olma barədə göstəriş verdiyi də söylənilirdi. Ən azından belə bir niyyətin olması əsas yaradır ki, Fərhad Əliyevin gələcəkdə aktiv siyasətlə məşğul olacağını ehtimal edəsən.
Təbii ki, bu siyahıya biz bu siyahıya qədər vurulmuş digər məmurların, məsələn, keçmiş Mədəniyyət Naziri Polad Bülbüloğlunun, keçmiş Xarici İşlər Naziri Vilayət Quliyevin və digər bu kimi dövlət orqanlarından çalışmış şəxslərin adlarını daxil edə bilməzdik. Ən azından o səbəbdən ki, həmin şəxslər heç hakimiyyət başında olduqları zamanlar belə dişsiz məmur ovqatını bağışlayıblar və demək olar ki, indinin özündə də hakim kəsildikləri ölü sükuktu ilə hansısa formada gələcək zamanda nələrisə edə bilmələri ehtimal olunan deyil.
Lakin onlardan fərqli olaraq Şahlar Əsgərov, Rza İbadov, Eldar Sabiroğlu, Asya Manafova, Hüseyn Abdullayev, Nazim Məmmədov və digər bu kimi “vurulmuş” millət vəkillərinin mövcud hakimiyyət üçün, konkret olaraq onların sıradan çıxarılmasında maraqlı olan qüvvələr üçün gələcəkdə təhlükə mənbəyinə çevrilmələri daha yüksəkdir.
Qayıdaq adları siyahımızda yer alanlara. Artıq hiss olunur ki, onlar ayrı ayrılıqda fəallaşma kursu götürüblər. Və onların bu fəallaşmaları heç də təsadüfi deyil. Bu barədə DİA.AZ-ı məlumatlandıran qaynaq redaksiyamıza şok xarakterli açıqlamalar verib hökumət içindəki mötəbər mənbənin iddiasına görə, uzun müddətdir Qərb dairələri Azərbaycanın «mədəni sürgün» həyatı yaşayan sabiq dövlət adamları ilə sıx təmasdadırlar: «Burada əsas məqsədlərdən biri əgər hazırki YAP hakimiyyətinin mahiyyətinin öyrənilməsinə xidmət edirsə, digər yöndən burada hazırki rejimə alternativin hazırlanması təşəbbüslərindən də danışmaq olar».
Mənbə vurğulayır ki, ərəb inqilabları dalğasının Azərbaycandakı biabırçı tənəzzülü Qərbi bir daha düşünməyə vadar edib: «Əslində bu düşüncələr beynəlxalq konsorsium başbilənlərində çoxdan var. Onlar Azərbaycanın şəklinin dəyişdirilməsində israrlıdırlar və bu niyyət üçün bütün vasitələrə əl ata bilərlər».
Mənbə iddia edir ki, uzun müddətdir davamlı olaraq xaricdəki məmurlarımızla əməkdaşlıq edən Qərbin saiyasi dairələri onların da iştirak etdiyi bir prosesə start vermək niyyətindədirlər: «Söhbət hakimiyyət daxilində inqilabın yetişdirilməsindən gedir». Mənbəmiz bildirir ki, zaman-zaman bir sıra məmurlarla işləyən və hətta bu səbəbdən Fərhad Əliyev kimi bir itkiyə uğrayan Qərb dairələri üçün Azərbaycan iqtidarı daxilində yeni tərəfdaşların tapılması çətin olsa da, bu istiqamətdə sabiq məmurların xidmətlərindən gen-bol yararlanılıb: «Bu gün hakimiyyət daxilində əməlli-başlı hazırlanmış çevik bir şəbəkə yaradılıb. Həmin şəbəkə Qərbdən müvafiq siqnalı gözləməkdədir və gərəkən anda hərəkət keçiləcək».
Məlumatlarda o da qeyd olunur ki, siyasi müxalifəti yalnız hakimiyyətdaxili müxalifətin aktivləşməsinin ardından hərəkətə keçirməyi düşünən Qərb bu ilin sentyabr ayından Azərbaycan daxilində yeni etirazlar dalğasının da sifarişini verib: «Artıq bu yöndə bir sıra müxalifət təşkilatları təlimatlandırılıb. Əsas ağırlıq sentyabr ayına salınacaq».
Murad TƏHMƏZOV DİA.AZ -
Geri qayıt