SƏLİM MÜSLÜMOVUN QOÇULARI MİLLƏTİ AĞLAR QOYUB
21-09-2012, 10:12
CƏLİLABADDAN ŞİKAYƏT: “BİZİ BU CÜR SEYİDLƏRİN ƏLİNDƏN QURTARIN”
DİA.AZ: - Son vaxtlar Dövlət Sosial Müdafiə Fondunun rəhbəri Səlim Müslümovun əyalətdəki “qoçularından”, DSMF-nin rayon şöbələrindən gələn şikayətlərin sayı artmaqdadır. Cəlilabad rayonunda DİA.AZ-a daxil olan şikayətlərdə nədən bəhs edilir? Həsənov Azadxan bu barədə redaksiyamıza ünvanladığı şikayət məktubunda yazır:
“Artıq iki ildən çoxdur ki, kasıbçılıq içində əziyyət çəkən qızım üçün sosial yardım almaqdan ötrü əlaqədar təşkilatlara müraciət edirəm. Hər dəfə müxtəlif bəhanələrlə məni get-gələ salır, aybaay işi uzadırlar. Son dəfə Prezidentimiz İlham Əliyevə müraciət edəndən sonra şikayətimə baxıldı, qərara alındı ki, bu ilin iyulundan qızıma yardım verilsin. İndi ƏSMM Cəlilabad şöbəsi deyir ki, gedin DSMF-nin rayon şöbəsindən sosial sığorta Şəhadətnaməsi gətirin. DSMF Cəlilabad rayon şöbəsinin müdiri Mirağa Salmanov isə bizə Şəhadətnamə vermək əvəzinə “leksiya” söyləyir. Deyir ki, gedin 1 ilin sığorta pulunu gətirib mənə verin, Şəhadətnamə kartınızı verim. Həm də bildirir ki, hesablamışıq, 400 manat pul verməlisiniz. Bu qədər pulu haradan tapıb verək, bilmirik? Demək belə çıxır ki, mən bankdan kredit götürüb, bu yoldaşa 400 verməliyəm ki, nədi-nədi mənə 6 aydan sonra 30-40 manat yardım veriləcək?! Bu biabırçılığa kim son qoyacaq?
Hələ məsələ bununla da bitmir. Qızımın evinə başqa kənddən gəlin gəlib. Mirağa müəllim deyir ki, o gəlinin evindən də gəlib bizə pul köçürməlidirlər və sığorta kartları olmalıdır. Yəni, o ev də gətirib Mirağa müəllim 400 manat verməlidir, yoxsa, bizə sığorta kartı verməyəcək. Məsələ bununla da bitmir. O evə də gəlin başqa yerdən gəlib, deməli, həmin kənddəki ailə də gətirib bunlara xərac ödəməlidir. Qalmışıq odla suyun arasında. DSMF müdiri Mirağa Salmanovun əməllərindən baş aça bilmirik. Quyruq quyruğa bağlanıb gedir, Mirağa Salmanov özünəməxsus piramida sistemi qurub bizi ələ salır.
Rayonda ali savadlı, tərbiyəsi, peşəkarlığı hamını razı salan gənclər iş tapa bilməsə də Mirağa Salmanovun əksər qohumları bacarığı oldu-olmadı onun rəhbərlik etdiyi təşkilatda vəzifə alır Sanki DSMF Cəlilabad şöbəsi onun şəxsi malikanəsidir. Mirağa Salmanov adamlara deyir ki, mən seyidəm, sizin ağanızam, mənə “müəllim” yox, “ağa” deyin, Hətta işçilər də ona qorxusundan “müəllim” yox, “ağa” deyə ona müraciət edirlər, o bundan həzz alır. Bu idarəyə girən kimi görürsən hamı danışır, ağam belə gəldi, ağam elə getdi.
Hələ də başa düşmürük ki, nəyə görə uzun müddətdir ki, bu adam rayon camaatının başına olmazın oyunlar açır, amma onun əməllərinə heç bir reaksiya verilmir? Mirağa Salmanovun keçmişində bir sıra şübhəli məqamlar var. Biz istəyirik ki, onun keçmiş və indiki əməlləri bütün detalları ilə araşdırılsın”.
Cəlilabad rayonunun digər sakini İsgəndərov Amil Kərimxan oğlu da DSMF-nin Cəlilabad şöbəsindən narazıdır. O isə redaksiyamız yolladığı məktubunda bunları deyir: “Sirr deyil ki, ünvanlı sosial yardım kasıbların baş bəlasına, bu işə baxanların isə qazanc yerinə çevrilib. Yeni qaydalara görə ünvanlı yardım almaq üçün DSMf-dən Şəhadətnamə almaq lazımdır. Cəlilabadda bu Şəhadətnamənin verilməsi üçün DSMF-nin rayon şöbəsindən 12 ayın pulunu istəyirlər. Qalmışıq 2 seyid idarəsinin arasında. Get-gəllərdən bezmişik.
DSMF Cəlilabad şöbəsinə dəfələrlə gedib-gəlməyimə baxmayaraq, həmin idarənin müdiri Mirağa Salmanovu çox vaxt iş yerində tapa bilmirik. Məlum olur ki, bu adam infarkt keçirib, hələ üstəlik şəkəri də var, ona görə də işə vaxtı-vaxtında gələ bilmir. Qoca kişidirsə, qoy gedib evində otursun, xalqı niyə zülmə salır ki?! Mən 1-ci qrup əliləm, istər saat 11-də, istərsə də günorta 2-3 radələrində dəfələrlə bu idarəyə getsəm də, Mirağa Salmanovu iş yerində tapa bilmirəm. Tək mən deyiləm, çoxlu adam tanıyıram ki, ora gedib gəlir, Mirağa Salmanovu işdə tapa bilmir. Vətəndaşlar saatlarla idarənin qabağında oturub onu gözləyirlər, uzaq kəndlərdən dəfələrlə hədər yerə yol ölçməli olurlar.
Mirağa Salmanov ya işə gəlmir, gələndə də vətəndaşlarla kobud rəftar edir, söyüş söyür, qəbula gələn ağsaqqalı, qadını belə vecinə almır. Deyir ki, mən buranın ağasıyam, seyidəm, cəddim sizə göstərər. Deyirsən, “hökumətə şikayət edəcəyik”, deyir Cəlilabadın hökuməti mənəm. Məhz onun nizam-intizamının olmaması nəticəsində idarənin sənədlərində qarma-qarışıqlıq yaranıb, adi sənədi gəlib soruşursan, günlərlə axtarırlar, tapa bilmirlər. Aşağıda, birinci mərtəbədə öz bacısı oğlunu qanunsuz olaraq işə götürərək pul yığımı məsələsini ona tapşırıb.
Mirağa Salmanov idarədə əsl hərc-mərclik yaradıb. Tez-tez işçilər arasında dava-dalaş düşür. Kağız-kuğuzlar bir-birinə qarışır. O, ürəyi istədiyi vaxt qanunsuz təyinatlar verir.
M. Salmanov bir neçə ay qabaq Kərbəla ziyarətinə getmişdi, indi də Həccə hazırlaşır. Xahiş edirəm, aydınlaşdırın, o bu pulları haradan gətirir? Bizim qanımızı içərək həmin pulları qazanır, sonra gedib özünə Haci titulu alır. Mirağa Salmanov bütün pul çıxan yerlərə öz adamlarını qoyub var-dövlət qazanmaq barədə düşünür, nəticədə biz qara camaat zülm çəkirik. Sığorta .əhadətnamələrini paylamır, yığıb otağına saxlayır, qəbula gələnlərdən tələb edir ki, həmin Şəhadətnamə üçün ona 300-400 manat versinlər. Bu yaxınlarda ANS kanalından Mirağanın sığorta Şəhadətnamələri ilə bağlı törətdiyi maxinasiyalardan süjet verdilər, amma yenə də tədbir görülmədi. Sığorta Şəhadətnaməsini yığıb otağına, vermir, birinə deyir, 3 aylığın köçürməsini ver, birinə deyir 1 illiyini ver. Rayon camaatı adından xahiş edirik ki, bizi bu cür seyidlərin əlindən qurtarın”.
Geri qayıt