"Bu, Gürcüstanın Abxaziya və Cənubi Osetiya probleminin həllinə gətirib çıxardımı?"
10-07-2021, 09:45
Rusiya ilə ehtiyatlı münasibət, ikitərəfli əməkdaşlıq, strateji müttəfiqlik Azərbaycanın 28 illik siyasətinin ən başarılı məqamlarındandır. Prezident İlham Əliyev hakimiyyətə gələndən bu günədək heç vaxt Moskva ilə münasibətləri korlamadı. Əksinə, Rusiya ilə dost olmaq yolu tutdu. Bunun ən ciddi nəticəsini biz 44 günlük müharibədə gördük. Başqa bir məqam, Rusiya kimi bir dövləti üzərimizə qaldırmadıq. Halbuki siyasi müxalifətin bəzi komponentləri hələ 2008-ci ildə Rusiya Gürcüstana hücum edəndə tələb edirdilər ki, İlham Əliyev Rusiyaya, Putinə cəbhə açsın. Həmçinin bu tələb Ukrayna məsələsində də özünü göstərirdi. Tarix bu məsələdə də İlham Əliyevi haqlı çıxardı. Rusiya savaşılacaq düşmən deyil, anlaşılacaq qonşudur. Əgər onunla ABŞ, Avropa İttifaqı, Çin anlaşırsa, hesablaşırsa, Azərbaycanın Amerikaya, Avropa arxayın olub, yaxın qonşu ilə düşmənçilik aparması ölkəmizi böyük risklərlə üz-üzə qoyardı.
Milli Məclisin deputatı, beynəlxalq münasibətlər üzrə ekspert Elman Nəsirov bu barədə “Yeni Müsavat”a şərhində bildirdi ki, Azərbaycan Prezidenti İlham Əliyev Vətən müharibəsində təkcə Ali Baş Komandan kimi hərbi cəbhədə deyil, həm də mahir diplomat olaraq diplomatik cəbhədə çox böyük uğura imza atdı. Bunu bütün dünya belə qəbul edir. Bütün bunlar nəyin sayəsində baş verib ki, əvvəla, cənab Prezident ölkənin lideri, birinci diplomatı olaraq Azərbaycanın xarici siyasətinin prioritet istiqamətini müəyyən edib. İlk növbədə prioritet istiqamət ikitərəfli münasibətlərdən ibarətdir: “Azərbaycan dövlətinin xarici siyasətinin prioritet istiqaməti ikitərəfli münasibətlər olduğundan bunun sayəsində həm ikitərəfli, həm üçtərəfli, dördtərəfli, hətta perspektivdə altıtərəfli əməkdaşlıq formatının da yaranması labüdləşib. İkitərəfli münasibətlərin içərisində isə qonşularla münasibətlər birinci yerdə dayanır. Əgər bizim qardaş Türkiyə dövləti ilə, qonşu Gürcüstan dövlətilə, qonşu Rusiya və İran dövlətləri ilə strateji tərəfdaşlıq münasibətlərimiz olmasaydı inanın ki, nə Bakı-Tiflis-Ceyhan, nə Bakı-Tiflis-Ərzurum neft-qaz kəmərləri, nə də Bakı-Tiflis-Qars dəmiryolu xətti işə düşməzdi, Cənub Qaz Dəhlizinin reallaşması baş tutmazdı. Görün ölkə Prezidenti nə qədər uzaqgörən siyasət həyata keçirib ki, ikitərəfli münasibətlərə prioritet sahə kimi yanaşıb və qonşularla münasibətlərimiz yüksək səviyyəyə qalxıb. Bunu xüsusi vurğulamaq istərdim. Bu prizmadan yanaşanda Rusiya ilə münasibətlərimiz hər zaman bizim üçün böyük əhəmiyyət kəsb edib. Rusiya Azərbaycanın ən böyük qonşusudur, dünyanın fövqəldövlətlərindən biridir. Rusiya öz hərbi potensialına və gücünə görə yalnız ABŞ-dan sonra ikinci yerdə dayanır, ərazi baxımından dünyanın ən böyük dövlətidir, 17 milyon kvadratkilometr əraziyə malikdir. Rusiya ilə biz strateji tərəfdaşlıq münasibətlərini qurmaqda çox düzgün addım atmışıq. Bunun konkret bəhrələrini görmüşük. Ötən il Vətən müharibəsi bunu tamamilə sübut elədi. Vətən müharibəsi dövründə Rusiyanın neytral mövqeyini saxlamasının özü Azərbaycanın öz strateji hədəfinə çatmaqda çox böyük rol oynadı. Torpaqlarımızın işğaldan azad edilməsində Rusiyanın neytral mövqeyi bizim üçün həyati əhəmiyyət kəsb elədi. Bunu vurğulamaq lazımdır”.
Deputat qeyd etdi ki, bəzən hakimiyyətə özünü rəqib elan edən siyasi qüvvələr populizmə yuvarlanaraq siyasi təhlil və analitikadan uzaq olaraq və bir çox hallarda da çirkin niyyətlərini həyata keçirmək üçün söyləyirlər ki, Rusiya ilə əlaqələri kəsmək lazımdır, Rusiya bizə düşmən dövlətdir, biz Rusiyaya arxa çevirib Qərbə üz tutmalıyıq, bizim müttəfiqimiz yalnız Qərb olmalıdır. Amma tarix hər şeyi öz yerinə qoyur və tarix göstərdi ki, bu yanaşmalar nə qədər səhv idi, təhlükəli idi: “Gürcüstan dövləti birmənalı şəkildə Qərbyönümlü siyasət həyata keçirir və Rusiya ilə münasibətləri yaxşı deyil. Bu, Gürcüstanın Abxaziya və Cənubi Osetiya probleminin həllinə gətirib çıxardımı? Qətiyyən. Əksinə, həmin problem daha da dərinləşdi və onun həll olunması ehtimalı görünmür. Moldovanın özünü götürsək, yenə də eyni vəziyyəti görəcəyik. Ancaq Azərbaycan Prezidenti o dərəcədə düzgün siyasət həyata keçirdi ki, işğalda olan torpaqlarımızı azad etdik. Azərbaycan Prezidenti dövlətini müxtəlif güc mərkəzləri ilə bərabər məsafədə saxlamağı bacardı. Bunun sayəsində bu gün rəsmi Moskva qəbul edir və dərk eləyir ki, Azərbaycan Prezidenti İlham Əliyevin ABŞ-la ölkəmizin münasibətlərini strateji tərəfdaşlıq səviyyəsinə qaldırması heç bir halda Rusiyanın əleyhinə yönəlməyib. Eləcə də rəsmi Vaşinqton çox gözəl bilir ki, Azərbaycanın Rusiya ilə münasibətlərinin strateji tərəfdaşlıq səviyyəsində olması heç bir halda ABŞ-ı hədəfə almayıb”.
E.Nəsirovun sözlərinə görə, elə bu mövqeyinin sayəsindədir ki, NATO və ABŞ-ın ali hərbi rəhbərliyi ilə Rusiyanın ali hərbi rəhbərliyi son bir neçə ildə təxminən 7 dəfə görüş keçirib və bu görüşlərin hər biri məhz Azərbaycanda keçirilib: “Ona görə məhz Bakı şəhərində keçirilib ki, Azərbaycan Prezidenti cənab İlham Əliyevin müstəqil, milli maraqlara söykənən, qarşılıqlı hörmətə əsaslanan, bir-birinin daxili işlərinə qarışmayan siyasəti sayəsində mümkün olub. Diqqət edirsinizsə, artıq Ermənistan cəmiyyəti Rusiyanı Azərbaycanı müdafiə eləməkdə ittiham edir. Bu günlərdə Rusiya Prezidentinin mətbuat katibi Dmitri Peskov da belə bir bəyanatla çıxış etdi ki, Azərbaycanla Ermənistan arasında sərhəd məsələsi öz həllini tapmalıdır və heç bir halda KTMT-nin Azərbaycanla Ermənistan sərhədinə yerləşdirilməsi haqqında plan yoxdur və buna ehtiyac görülmür. Bütün bunlar Azərbaycan Prezidentinin yeritdiyi çox uğurlu siyasətin nəticəsində, Rusiya ilə münasibətləri ustalıqla qurmasının sayəsində baş verir. Cənab İlham Əliyevin qonşularla münasibətləri strateji tərəfdaşlıq səviyyəsinə qaldırması Azərbaycanın çox mühüm uğurlarını şərtləndirib”.
Geri qayıt