“FORMONİX” MMC nə vaxt yaradıldı və dərhal neçə kotirovka “uddu”??
23-02-2022, 15:38
Uzun müddət boş qalan Səhiyyə naziri vəzifəsinə nəhayət 19 yanvar 2022-ci ildə Teymur Musayev təyin edildi. 2021-ci ilin aprelin 23-dən səhiyyə nazirinin birinci müavini, nazir vəzifəsini müvəqqəti icra etmiş Teymur Musayevdən əvvəl də, indi də respublikanın bir çox xəstəxanalarında qanunsuzluqlarin, rüşvətxorluğun baş alıb getməsi barədə çoxsaylı şikayətlər olur. Bu barədə sosial şəbəkələrdə yetərincə məlumatlara rast gəlmək mümkündür. Son bir neçə ayda səhiyyə işçilərinin rüşvət üstündə tutulması da buna əyani bir sübutdur.
Bunlar azmış kimi səhiyyə sisteminə ayrılan milyonlarla dövlət vəsaitlərinin də talamnası barədə ciddi ittihamlar irəli sürülür. Lakin baş verən qanunsuzluqların qarşının alınması üçün heç bir tədbirin görülməməsi ağır durumda olan səhiyyə sistemin vəziyyətini daha ağırlaşdırır.
Səhiyyə Nazirliyinin müəssisələri tərəfindən dövlət satınalmaları yolu ilə həyata keçirilən təmir-tikinti işləri və zəruri mal-materialların alınması üzrə keçirilən tender və kotirovka sorğularının qeyri şəffaf şəkildə aparılmasını subut edən konkret, təkzibolunmaz faktlar var. Təəssüflər olsun ki, fəaliyyət sferaları şübhə doğuran, ixtisas göstəriciləri heç bir kriteriyaya uyğun gəlməyən, heç yerdə heç kəsin tanımadığı birdəfəlik (odnorazovıy) şirkətlərin böyük bir dövlət qurumunun elan etdiyi çox sayda tenderlərin qalibi olmaları adi hal kimi qəbul edilir.
Səhiyyə Nazirliyinin Müharibə Veteranları Respublika Xəstəxanası tərəfindən keçirilmiş kotirovka sorğuları ətrafında apardığımız araşdırmalarda yuxarıda qeyd etdiyimiz kimi, görünməmiş qanun pozuntusuna yol verildiyi məlum oldu. Belə ki, xəstəxananın Tender Komissiyası maşın və avadanlıqların satın alınması üzrə keçirdiyi kotirovka sorğusunda “FORMONİX” Məhdud Məsuliyyətli Cəmiyyəti ilə 30.12.2021-ci ildə 22 870 manat məbləğində müqavilə bağlayıb.
Xəstəxananın Tender Komissiyası kotirovka sorğusunun keçirilməsi barədə 16.11.2021-ci il tarixdə verdiyi elanda kotirovka sorğusunda iştirak etmək üçün sənədlərin 16.11.2021-ci ildən 30.11.2021-ci il tarixə qəbul olunduğu göstərilir.
Müharibə Veteranlrı Respublika Xəstəxanasının qalib elan etdiyi “FORMONİX” MMC bəs nə vaxt dövlət qeydiyyatına alınıb?
Kommersiya qurumunun hüquqi şəxslərin dövlət reyestrinə daxil edilmiş məlumatlarında “FORMONİX” Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin Bakı şəhəri Kiçik Sahibkarlıqla İş üzrə Baş İdarəsində 17.11.2021-ci il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanının BAKI ŞƏHƏRİ NƏSİMİ RAYONU, SÜLEYMAN RÜSTƏM ev 55, m 48, qanuni təmsilçisinin isə Cabbarova Tutu Rafiq qızı olduğu göstərilir.
Qeyd edək ki, “FORMONİX” Məhdud Məsuliyyətli Cəmiyyəti elə yarandığı ilk gündən satınalmalarda iştirak edib və Səhiyyə Nazirliyinə tebeli qurumların bir ayda keçirdiyi 4 kotirovka sorğusunun qalibi olub.
Elmi Tədqiqat Kordiologiya İnstitutunun 19.11.2021-ci il tarixdə maşın və avadanlıqların satınalması ilə bağlı elan etdiyi kotirovka sorğusunda iştirak etmək üçün sənədlərin 19.11.2021-ci ildən 07.12.2021-ci il tarixə qəbul olunduğu göstərilir. Lakin 17.11.2021-ci il tarixdə dövlət qeydiyyatına alınmış “FORMONİX MMC iki gün sonra kotirovka sorğusunda iştirk üçün sənəd verir və 28.12.2021-ci il tarixdə 49 534 manat dəyərində kotirovka sorğusunun qalibi olur.
Səhiyyə Nazirliyinin Tibbi Reabilitasiya Xəstəxanasının 26.11.2021-ci il tarixdə dəftərxana və təsərrüfat mallarının satınalması ilə bağlı elan etdiyi kotirovka sorğusunda iştirak etmək üçün sənədlərin 26.11.2021-ci il tarixdən 10.12.2021-ci il tarixə qəbul olunduğu göstərilir. Lakin 17.11.2021-ci il tarixdə dövlət qeydiyyatına alınmış “FORMONİX MMC 9 gün sonra kotirovka sorğusunda iştirak üçün sənəd verir və 30.12.2021-ci il tarixdə 24 300 manat dəyərində kotirovka sorğusunun qalibi olur.
Azərbaycan Elmi Tədqiqat Tibbi Bərpa İnstitunun 01.12.2021-ci il tarixdə cari təmir xərclərinin satınalması ilə bağlı elan etdiyi kotirovka sorğusunda iştirak etmək üçün sənədlərin 02.12.2021-ci il tarixdən 16.12.2021-ci il tarixə qəbul olunduğu göstərilir. . Lakin 17.11.2021-ci il tarixdə dövlət qeydiyyatına alınmış “FORMONİX MMC 15 gün sonra kotirovka sorğusunda iştirak üçün sənəd verir və 17.01.2022-ci il tarixdə 28 804 manat dəyərində kotirovka sorğusunun qalibi olur.
Satınalmaların vahid internet portalına yerləşdirilmiş məlumatlardan da görsəndiyi kimi, “FORMONİX” Məhdud Məsuliyyətli Cəmiyyəti 28.12.2021-ci ildən 17.01.2022-ci il tarixə, yəni 20 günə Səhiyyə Nazirliyinə tebeli qurumların keçirdiyi 4 kotirovka sorğusunun qalibi olub və ümumi olaraq 125 508 manat dəyərində dövlət sifarişi alıb. Yenə də, verilmiş elanlardan da görsəndiyi kimi, MMC səhiyyə qurumlarının birində cari təmir xərcləri, digərində dəftərxana və təsərrüfat malları, başqa birisində isə maşın və avadanlıqların satınalması üzrə iştirak edib və qalib olub. Qeyd edək ki, MMC-nin qanuni təmsilçisi olan Tutu Cabbarovanın adına yaradılmış belə bir neçə MMC var ki, iş və xidmət adı altında hesabına hər il külli miqdarda dövlət vəsaitləri köçürülür.
Buradan suallar yaranır. Satınalmalara nəzarət edən dövlət qurumu hara baxır? Hanı İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti satınalmaların şəffaf şəkildə keçirilməsinə nəzarət edir? Satınalmalardan 1-15 gün əvvəl, hətta satınalma elanından sonra dövlət qeydiyyatına alınmış, maddi texniki bazasının və ixtisas göstəricilərini qeyri müəyyən olduğu bir şirkətlə 20 gün ərzində 125 min manatlıq dövlət sifarişini həvalə etmək nə dərəcədə qanunauyğundur.
Təbii ki, normal və azad rəqabət şəraitində maddi texniki bazası olan hər hansı bir şirkətin çoxlu sayda tender qazanmasını adi hal kimi qəbul etmək olardı. Ancaq göründüyü kimi bu belə deyil və məmur müdaxiləsi olmadan hər hansı bir dövlət satınalmasında qalib gəlmək çətin məsələdir. Nə qədər nazir dəyişsə belə, nə qədər islahatlar aparılsa belə, nə qədər şəffaf və azad rəqabət görüntüsü yaradılsa belə.
Aktualinfo.org
Geri qayıt