Xəbər verildiyi kimi, Rusiyanın xarici işlər naziri Sergey Lavrov söyləyib ki, Aktau şəhəri yaxınlığında qəzaya uğrayan “Azərbaycan Hava Yolları” QSC-nin (AZAL) təyyarəsinin "qara" qutularının dekodlanması mediada verilən bəzi ilkin qənaətləri təsdiqləmir. “İstintaqda Braziliyada xüsusi iclas keçirildi, biz qara qutuları açdıq, onların məzmunu artıq çoxlu maraqlı məlumatlar təqdim edib. Onların məzmunu bizi bir daha əmin edir ki, tam hüquqlu araşdırmanı gözləmək lazımdır”. Rusiya baş diplomatı belə deyib...

Artıq faciəyə uğramış təyyarəmizin “qara qutu”ları Braziliyaya göndəriləndən bəri bir sıra şərhçilər iddia edir ki, Putin rejimi Braziliya dövlətinə və şirkətinə "qara" qutulardan öz istədikləri “səs”ləri “çıxarmaq” üçün təsir göstərə bilər. Bəs görəsən, reallıqda bu, mümkündürmü? Əslində Azərbaycana, Türkiyəyə gerçək münasibəti bəlli olan Sergey Lavrovun arxayın danışması şübhələnməyə əsas verir...

Mövzu ilə bağlı Moderator.az-a açıqlamasında politoloq Zərdüşt Əlizadə bunları söyləyib:

“Hesab edirəm ki, Putin rejiminin “qara" qutulara görə Braziliyaya təzyiq göstərməsi mümkün deyil. Braziliya prezidenti Luis İnasiu Lula da Silva artıq üçüncü möhlətdir hakimiyyətdədir. Özü solçudur. Həmkarlardan gəlib. Qoca kişidir. Həbslərdə olub. Başına çox işlər gəlib. Dünyada hörməti olan bir siyasətçidir. Ona görə də Braziliyanın BRİKS üzvü olmasına rəğmən onun üçün Putin heç kəsdir...

Digər tərəfdən, “Embrayer” aviasiya şirkətinin, əvvəla, səhmlərinin böyük bir hissəsi “Boyinq” şirkətinindir. “Boyinq”in də Rusiyadan heç bir asılılığı yoxdur. İkincisi də, “Embrayer” Putinə görə adına niyə ləkə gətirsin? Özü də deyim ki, “Embrayerlər” yetərincə komfortabelli olmasa da, keyfiyyətli təyyarələrdir. O təyyarələrlə bir neçə dəfə Tiflisə, bir neçə dəfə də Almatıya uçmuşam. Yəni bu baxımdan təyyarəmizin Rusiya hərbçiləri tərəfindən vurulandan sonra hansısa texniki çatışmazlıqlar ucbatından qəzaya uğraması ehtimalı da yoxdur...”