İran və Rusiya hərbi əməkdaşlığın genişləndirilməsi və Tehranın nüvə proqramının dəstəklənməsinə dair gizli danışıqlar aparır.

Lent.az bildirir ki, bu barədə “The Times” Qərb kəşfiyyatının məlumatlarına istinadən yazır.

Danışıqlarda əsas rolu İranın ali dini lideri Ayətullah Əli Xameneinin müşaviri Əli Laricani oynayır. İran parlamentinin keçmiş spikeri və nüvə məsələləri üzrə danışıqlarda təcrübəli olan Laricani yüksək rütbəli Rusiya rəsmiləri ilə görüşmək üçün müntəzəm olaraq Moskvaya uçur.

Laricani “Hizbullah” lideri Həsən Nəsrullahın öldürülməsindən sonra İranyönlü qüvvələri gücləndirmək məqsədilə Dəməşq və Beyruta da səfər edib. Onun Rusiyaya səfərləri ölkələr arasında artan strateji əlaqələrin sübutudur. Mənbələr bildiriblər ki, İranın pilotsuz təyyarələri və raketlərinə arxalanan Moskva İranın nüvə proqramı ilə bağlı mövqeyinə yenidən baxa bilər.

İran mütəxəssislərin hazırlanmasında, məhv edilmiş S-300 hava hücumundan müdafiə sistemlərinin bərpasında, Su-35 qırıcılarının tədarükündə və “Hizbullah”ın silahla gücləndirilməsində Rusiyanın dəstəyinə ümid edir.

Ekspertlərin hesablamalarına görə, İrana nüvə ballistik raketi yaratmaq üçün bir neçə aydan bir ilə qədər vaxt lazımdır. Buna nail olmaq üçün uranın zənginləşdirilməsini 90 faizə çatdırmaq lazımdır, halbuki indiki səviyyə 60 faizdir.

Yanvarda Kreml Vladimir Putin və İran prezidenti Məsud Pezeşkian arasında strateji tərəfdaşlıq sazişi imzalayacağını təsdiqləyib. Yanvarın 17-də keçiriləcək rəsmi səfər zamanı tərəflər ticarət, investisiya, nəqliyyat və humanitar məsələləri, regional və beynəlxalq problemləri müzakirə edəcəklər.

İranın nüvə ambisiyaları ABŞ-ın diqqətini çəkir. “Wall Street Journal” daha əvvəl yazmışdı ki, Donald Trump komandası silah istehsalının qarşısını almaq üçün Tehranın nüvə obyektlərinə hava hücumlarını nəzərdən keçirir. Belə bir addım sanksiyalar və diplomatik təzyiq siyasətindən köklü şəkildə uzaqlaşma ola bilər.