Xəbər verdiyimiz kimi, Şəki İnzibati Məhkəməsi mayın 24-də fermer Abdullayev Teyyub Əli oğlunun şikayəti əsasında İsmayıllı rayon İcra Hakimiyyətinin başçısı Nahid Bağırovun 5 oktyabr 2021-ci il tarixli, 135 saylı Sərəncamını ləğv etdi. Hansı ki, iş materiallarında olan sənədlər, məhkəmə iclasında təqdim edilən maddi sübutlar bir daha göstərirdi ki, İsmayıllı RİH rəhbərliyi əsassız olaraq T.Abdullayevlə 2003-cü ildə bağlanmış torpaqdan istifadəyə dair icarə müqaviləsini ləğv edən Sərəncam imzalayıb… Və bütün rəsmi sənədlərdə- torpağın 25 illiyinə icarəyə götürülməsi barədə bağlanmış müqavilədə, Dövlət Aktında, icarəyə verilmə barədə tərtib olunmuş Akt-da, Dövlət büdcəsinə ödənilən torpaqdan istifadəyə dair vergi ödənişlərində və s. torpağın əkin üçün verildiyi, kənd təsərrüfatı məhsulları istehsalı təyinatlı olduğu öz əksini tapıb.
Beləliklə, Şəki İnzibati Məhkəməsi 24 may 2022-ci il tarixli qərarı ilə İsmayıllı RİH başçısının 5 oktyabr 2021-ci il tarixli torpaqdan istifadəyə dair icarə müqaviləsinin ləğvi barədə olan Sərəncamını ləğv etdi və bununla da həmin Sərəncam hüquqi qüvvəsini itirmiş oldu.
***
…Dünən verdiyimiz məlumatda da qeyd olunmuşdu ki, bütün bu qalmaqalın arxasında İsmayıllı RİH başçısının müavini, Sosial-iqtisadi inkişafın təhlili və proqnozlaşdırılması şöbəsinin müdiri Mahmud Süleymanov durur. Belə ki, o, məlum Sərəncamın verilməsindən az əvvəl fermer-taxılçı T.Abdullayevi (Ağdam rayon sakinidir) İsmayıllıya çağırtdıraraq (eyni kəddən olan qohumu və İsmayıllı RİH başçısı aparatının Sosial-iqtisadi inkişafın təhlili və proqnozlaşdırılması şöbəsinin müdir müavini Şahin Hüseynovun təşkilatçılığı ilə) deyib ki, «…başçının göstərişidir, şəhid və qazi ailələrinə yardım etməlisiniz…».
Fermer T.Abdullayevin məhkəmədəki ifadəsində də qeyd olunduğu kimi, o, Ş.Hüseynova bildirir ki, «Mən indiyədək icra başçısının, yaxud hansısa rəsmi şəxsin tapşırığını gözləmədən öz vicdanımın səsi ilə Ağdamda, İsmayıllıda, Ağcabədidə… şəhid ailələrinə və qazilərə külli miqdarda yardım etmişəm… Hətta özüm Ağdam rayonundan olsam da, İsmayıllı sakini olan bir kimsəsiz, anadangəlmə xəstə oğlana təxminən 30 min manata qədər xərc çəkib ev tikdirmişəm. Amma bunu heç bir yerdə deməmişəm, xeyriyyəçiliyimi dilə gətirməmişəm. Müharibə vaxtı hərbçilərə tam komplektləşdirilmiş və Ukraynadan gətirilmiş hərbi təyinatlı yük avtomobili də vermişəm… Özümün torpaq sahəmdə çalışan 3 nəfər müharibəyə getmişdi, onların ailələrinin bütün təminatını etmişəm, onlardan biri yaralandı, qazidir… Yəni, bunları Şahin Hüseynova xatırlatdım və dedim ki, baş üstə, mənə siyahı verin, yenə də kimlərə lazımdır gücüm çatan yardımı edim. Ş.Hüseynovla xeyli söhbətimz oldu, başa düşdüm ki, onlar nağd pul verməyimi istəyirlər…».
Və sonradan Mahmud Süleymanovun təqdim etdiyi qalmaqallı (əslində, qanunsuz) Sərəncamı başçı göz yummadan imzalayır, ona inanır. Beləliklə, İcra başçısı torpaqdan istifadəyə dair qanuni icarə müqaviləsinin ləğv olunmasına dair Sərəncam verir.
İcra başçısı Nahid Bağırov onu aldadan müavini Mahmud Süleymanovu işdən qovur…
«Təzadlar»ın elektron poçtuna İsmayıllı RİH-nin adının çəkilməsini istəməyən əməkdaşlarından birinin elektron məktubu daxil olub. Məktubda yazılır: «…Haqq öz yerini tapdı. İcra Başçısı Nahid Bağırovu qınamırıq. Rayonu qarışdıran onun müavini Mahmud Süleymanovdur. O da həmkəndlisi (Talıstan kəndi) Şahin Hüseynovu qabağa verib onun əli ilə qanunsuz əməllər törədir. Ş.Hüseynov və bütün rayon yaxşı bilir ki, Mahmud Sülyeymanov mərhum Damət müəllimdən sonra icra başçısı olmaq istəyirdi. Buna ciddi cəhdlər də etdi, ona vəd verənlər də vardı. O, gənc Nahid Bağırovu aldadıb qanunsuz Sərəncam imzalatmışdır. Şəki İnzibati Məhkəməsi də ədaləti bərpa etdi, başçının həmin sərəncamını ləğv etdi. Mahmud Süleymanov sübut etmək istəyirdi ki, Nahid Bağırov təcrübəsizdir, rayonu Mahmud idarə edə bilər və s. Amma bu gün İsmayıllı RİH-də olsaydınız görərdiniz ki, başçı onu kabinetinə çağırıb nə günə salıb. Ona ərizə yazıb getməyi əmr edib. Eşitdiyimizə görə Mahmud özünü xilas etmək üçün başçıya söz verib ki, guya onu RİH-nin torpaq şöbəsində kimsə aldadıb, məhkəmədə qalib gəlmiş fermeri yola gətirib barışıq yaradacaq. Hətta bu gün başçı Nahid Bağırovun fermerin torpaq sahəsi olan kəndə və əraziyə getməsinə də nail olmağa çalışmaqdadır».
Bax belə: özgəsinə quyu qazan ora həmişə özü düşüb. Bu ilahi fəlsəfənin yazılmamış qanunudur! Amma İsmayıllıda baş verənlər təkcə başçıya «qazılan» quyu deyil, həm də onun olan-qalan imicinə ağır zərbədir, karyerasına ciddi uğursuzluqdur… //tezadlar.az//
