Abutalıbov-Həmidova tandeminin Prezidentə qarşı SABOTAJI...
5-05-2021, 08:47
Bir ayağı Fəxri Xiyabanda, bir ayağı Qaraçuxurdakı evində olan Bakının keçmiş meri Hacıbala Abutalıbov vəzifədən gedərayaq elə qanunsuzluğa imza atıb ki, onun əzabını özündən başqa bütün tərəflər çəkir.
Abutalıbovun paytaxtı qarış-qarış satması, pafoslu çıxışlarla özünü yaxşı göstərib “saman altdan su yeridib” hər cür özbaşınalıqları həyata keçirməsi hamıya məlumdur. O, 20 il şəhərin altını üstünə çevirib.
Rublika.Az-ın verdiyi xəbərə görə, Abutalıbov postundan gedişi günü də pisliyindən qalmayıb. 2018-ci il aprelin 20-də sonuncu saxtakarlığa qol qoyub, 21-də isə artıq mer deyildi. Amma bəhs edəcəyimiz bu işdə o, tək deyildi.
Təqdim edəcəyimiz bütün faktlar, qərarlardan görəcəksiniz ki, qanun B.Əlinin yanında olsa da, Abutalıbov-Həmidova cütlüyü öz bildiyinə - cəngəllik qanunlarına istinad edir.
Bu, Prezidentə qarşı təxribatdır, dövlətin məhkəmələrini və qanunlarını ayaqlar altına alıb tapdalamaqdır, vətəndaşlarda hakimiyyətə qarşı inamsızlıq yaratmaqdır.
Biri kişi, biri qadın koloniyasına...
Həmin əməli ilə şəhərin az qala yarısını susuz qalma təhlükəsi ilə üz-üzə qoyan Abutalıbovun əməlinə Bakı Şəhər İcra Hakimiyyətində mühasib işləmiş, hətta əvvəllər məhkum olunmuş Tamara Həmidova şərik çıxıb.
İndi bu qanunsuzluğa görə Abutalıbov ahıl dövrünü dörd divar arasında keçirə bilər, eləcə Tamara Həmidova da təkrar qadın koloniyasına göndərilə bilər. Çünki artıq vətəndaş Bahadur Əli həm Abutalıbovun, həm Həmidovanın əməllərinin araşdırılması üçün Baş prokuror yanında Korrupsiyaya qarşı Mübarizə Baş İdarəsinin rəisi Nazim Rəcəbova məktub yollayıb. İndi qalır işə baxmaq...
Məlum olur ki, nə qanun, nə Prezident sayan Abutalıbov-Həmidova tandemi BŞİH-də sənədləri saxtalaşdırıblar. Saxta sənədlər əsasında Tamara Həmidova dövlətin və vətəndaşın mülkiyyətində olan torpaq sahəsini ələ keçirib.
“Belə ki, Tamara Həmidovanın qardaşı Cəlal Əli oğlu ilə Həmidovla Bakı Şəhər İcra Hakimiyyəti arasında torpaq sahəsinin icarəyə verilməsinə dair 20 avqust 2010-cu il tarixli, 0912 saylı icarə müqaviləsi bağlanıb.
İcarəyə verilən həmin torpaq bizim Çobanzadə küçəsi 45A ünvanında yerləşən torpaq sahəmizə bitişik ərazidə yerləşir. İcarəyə verilmiş torpaq sahəsinin dönmə nöqtələrini yerə köçürərkən aydın olur ki, icarə verilən torpağın bir hissəsi bizim torpaq sahəsini zəbt edir.
Qalan hissəsi isə Bakı şəhərinin şərq hissəsini içməli su ilə təmin edən, diametri 1200-1400 mm olan yüksək təzyiqli magistral su kəmərlərinin sanitar mühafizə zonasına düşür”, - deyə B.Əli qeyd edir.
Məhkəmə Abutalıbovla Həmidovanı ifşa etsə də...
Onun sözlərinə görə, həmin icarə müqaviləsi maraqlarımıza toxunduğu üçün BŞİH-ə və Cəlal Həmidova verilən icarə müqaviləsinin, onun əsasında daşınmaz əmlakın dövlət reyestrində aparılmış qeydin ləğv edilməsi, C.Həmidovun həmin torpaq sahəsindən çıxarılması üçün məhkəməyə müraciət edib.
Nizami Rayon Məhkəməsində ekspertiza rəyi və toplanmış başqa sübutlarla icarə müqaviləsinin əsasında torpaq sahəsinin zəbt edilməsi tam təsdiq olunub.
Vətəndaş yazır ki, qarşı tərəf bundan yayınmaq üçün BŞİH-in 20 avqust 2010-cu il tarixli, 0912 saylı icarə müqaviləsinin ləğv edilməsi barədə 20 aprel 2018-ci il tarixli, 7-183/10q saylı bildirişini məhkəməyə təqdim edib.
Bununla da məhkəmənin yekun qərarı ilə müqavilənin artıq ləğv edilməsi əsası ilə iddiamız həmin hissədə təmin edilməyib. Yəni məmur məhkəmədə qanuna güc gəlib.
Bütün məhkəmə araşdırmaları dövründə BŞİH rəsmiləri Tamara Həmidovanın alovlu müdafiəsinə qalxıblar. Tamara Həmidova və Hacıbala Abutalıbovun dəstə üzvləri 20 avqust 2010-cu il tarixli, 0912 saylı icarə müqaviləsinin ləğv etdikləri gün Cəlal Həmidovun adına 1460 nömrəli, 20 aprel 2018-ci il tarixli yeni icarə müqaviləsi veriblər. Bu, Azərbaycan məhkəməsinin ələ salınmasıdır.
Məhkəmə araşdırması zamanı o da müəyyən edilib ki, Tamara Həmidova zəbt etdiyi ərazi ilə B.Əliyə məxsus olan torpaq sahəsinin üst-üstə düşmədiyini göstərmək üçün icarəyə götürdüyü 826.2 kv.m. torpaq sahəsini Daşınmaz Əmlakın Dövlət Reyestrində qanunsuz olaraq 806.2 kv.m. torpaq sahəsi kimi qeydiyyata alınmasına nail olub.
Bununla bağlı ona Dövlət reyestrindən RX seriyalı, 0866879 nömrəli, 25.05.2016 tarixli çıxarış verilib. Lakin iş üzrə keçirilmiş ekspertiza nəticəsində müəyyən edilib ki, 20 avqust 2010-cu il tarixli, 0912 saylı icarə müqaviləsi ilə icarəyə verilən ərazinin 35 kv.m. hissəsi bizim mülkiyyətimizdə olan torpaq sahəsi ilə üst-üstə düşür.
Bütün bunlar Abutalıbovla Həmidovanın, o cümlədən BŞİH-də olanların Prezident İlham Əliyevə qarşı hörmətsizliyi, qanunları saymazlığı, vətəndaşı dövlətdən narazı salmağıdır. Məhkumluğu olmuş bir qadının saxtakar əməllərinə şərik çıxan Abutalıbov və meriya bunu özünə necə yaraşdırıb, o da bir başqa məsələdir.
Magistral su kəmərin üzərində tikinti – Özbaşınalıq!
Qeyd edək ki, 2 saylı Bakı İnzibati-İqtisadi Məhkəməsinin 15 yanvar 2015-ci il qərarı ilə “Azərsu” ASC-nin Nizami bələdiyyəsinə, Bakı Şəhər İcra Hakimiyyətinə, Cəlal Əli oğlu Həmidova və digərlərinə qarşı iddiası qismən təmin edilib. Həmin qərarla Nizami rayon bələdiyyəsinin torpağın mülkiyyətə verilməsinə dair 26 sentyabr 2003-cü il tarixli qərar etibarsız hesab edilib. Məhkəmə qərarını onunla əsaslandırıb ki, Cəlal Əli oğlu Həmidova həm 105 kv.m. torpaq sahəsinin ayrılması, həm də 826.2 kv.m. torpaq sahəsinin icarəyə verilməsinə əsas kimi göstərilən Bakı Şəhər İcra Hakimiyyətinin 7 mart 2003-cü il tarixli məktubları inzibati akt olmayıb. Yəni məktublar əsasında hüquq yarana bilməz.
Mübahisəli torpaq sahəsi Bakı şəhərinin şərq hissəsini içməli su ilə təchiz edən, diametri 1200-1400 mm olan yüksək təzyiqli magistral su kəmərlərinin üzərində və onun mühafizə zonasında yerləşir.
Həmin torpaq sahəsinin fərdi yaşayış evinin tikintisi üçün mülkiyyətə və icarəyə verilməsi Nazirlər Kabinetinin təsdiq edilmiş “Mühafizə zonalarının ölçüləri, sərhədləri və istifadəsi Qaydalarının” 6.1.2.1-ci bəndi ilə qadağandır.
Bir sözlə, Tamara Həmidova və Hacıbala Abutalıbovun əməllərində Cinayət Məcəlləsinin az qala bütün maddələri pozulub.
Tamara Həmidovanın meriyadan oğurluğu
Xatırladaq ki, “Buxar” KM Tamara Həmidovanın qardaşı Cəlal Həmidova qarşı iddia ərizəsi ilə Nizami rayon Məhkəməsinə müraciət etmişdi. İş üzrə Bakı Apellyasiya Məhkəməsinin 26.11.2010-cu il tarixli qətnaməsi ilə “Buxar” KM rəhbərinin iddiası qismən təmin edilib.
Bakı şəhəri, Nizami rayonu, B. Çobanzadə küçəsi 45 A ünvanında yerləşən “Buxar” KM-ə məxsus daş hasarın öz yerində bərpa edilməsi vəzifəsi Cəlal Həmidovun üzərinə qoyulub. Sonradan işə baxan məhkəmələr (Nizami rayon Məhkəməsinin hakimləri Zaur Tağıyev, Cahangir Yusifov, Vidadi Məmmədov, Bakı Apellyasiya Məhkəməsinin Mülki Kollegiyasının hakimləri İlqar Xələfov, Ülvi Mayılov və Xəqani Məmmədov, Ali Məhkəmənin Mülki kollegiyasının hakimləri Əli Rüstəmov, Əsəd mirzəliyev və Aslan Kalbalıyev) qətnamə və qərarlarda, ekspertlər isə rəylərində sübut kimi həmin sənədlərə istinad ediblər.
Lakin Nizami rayon İcra şöbəsinin Bakı Apellyasiya Məhkəməsinin 26.11.2010-cu il tarixli qətnaməsinə izah verilməsinə dair ərizəsinə Bakı Apelyasiya Məhkəməsində baxılarkən iş materialları ilə tanış olan “Buxar” KM-nin nümayəndəsi Anar Rüstəmov iş materiallarında olan 4294 saylı işin(əlavə olunmuş materiallarla birlikdə) və 643 saylı inşaat pasportunn notarial qaydada təsdiq olunmuş surətlərinin olmadığını görüb.
Bu barədə hakim Toğrul Əliyevə rəsmi ərizə ilə müraciət edərək faktiki olaraq iş materiallarından yoxa çıxan 4294 saylı işi (əlavə edilmiş sənədlərlə birlikdə) və 643 saylı inşaat pasportunun surətlərinin tapılması xahiş olunub.
Lakin Bakı Apellyasiya Məhkəməsinin əməkdaşı Habil adlı şəxs şifahi şəkildə bildirib ki, göstərilən sənədlər faktiki olaraq iş materiallarında yoxdur.
Qeyd olunan sənədlər Tamara Həmidova tərəfindən Bakı şəhər İcra Hakimiyyətinin arxivindən oğurlanıb, sonradan saxtalaşdırılaraq notarial qaydada təsdiq edilib.
Geri qayıt