““Rossiya” kanalının AzTV-yə qarşı 5 milyonluq iddiasının ŞOK SƏBƏBLƏRİ”
19-01-2022, 08:52
3 il oldu…
Rövşən Məmmədovun AzTV-yə rəhbər gətirilməsini deyirəm… Düzünə qalsa Rövşənin AzTV-yə rəhbər gətirilməsini ilk günlər mən də təqdir etdim. Düşündüm ki, qocaman AzTV-yə nəhayət ixtisasca bir jurnalist rəhbər təyin edildi. Amma mənim bu düşüncəm cəmi bir neçə günə fiaskoya uğradı. Rövşən kollektivlə rəhbər kimi ilk görünüşdə bəyan etdi ki, mən AzTV-ni CNN, Əl-Cəzirə, Evronyus səviyyəsinə qaldıracam…
Bax, bu zaman anladım ki, AzTV-yə çox yanlış bir rəhbər gəlib. Çünki, bu cür şit və bayağı sözləri ancaq avantüristlər səsləndirə bilər. AzTV-ni yüz milyonlarla büdcəsi və milyardlarla izləyicisi olan hansısa televiziya ilə müqayisə etmək ən azından ağılsızlıq idi.
Üstəlik gördüm ki, bu adam heç AzTV-nin statusunu və missiyasını bilmir. Televiziyanın missiyasını bilməyən bir adamın uğurlu rəhbər olacağına inanmaq isə sadəcə axmaqlıq olardı… Hadisələrin sonrakı inkişafı göstərdi ki, mən sonrakı fikrimdə yanılmamışam.
Rövşən öz bəsitliyini və məkrli niyyətini elə ilk günlərdə biruzə verdi. Onun televiziyada atdığı ilk addımlar studiyaların “yenidənqurulması” oldu. Amma aparılan bu “yenidənqurma” işləri kosmetik xarakter daşıyır və Rövşənin korporativ maraqlarına xidmət edirdi. Bu barədə çox danışıldığı üçün məsələnin üstündə çox dayanmayacağam.
Amma bu kosmetik dəyişikliklər onu sübut etdi ki, Rövşənin qocaman kollektivdə yeniliklər etməyə, tamaşaçıların zövqünə oxşayan verilişlər hazırlamağa və ən başlıcası Ölkə rəhbərliyinin etimadını doğrultmağa nə potensialı var, nə də ki, həvəsi. Rövşənin tək hədəfi daha çox pul qazanmaq, özünün və yaxınlarının qısa zamanda sosial problemlərini həll etmək idi. Buna da zaman-zaman nail oldu.
Bu yolda isə Rövşən plagiatçılığı özünə hədəf seçdi. Onun AzTV-də gözə çarpan ilk dəyişikliyi hər 3 televiziyanın loqosunun dəyişdirilməsi oldu. Bunun üçün külli miqdarda dövlət vəsaiti “xərclənildi”. Amma sonda bəlli oldu ki, AzTV-nin, Mədəniyyət və İdman kanallarının loqosu plagiatdır. Özü də bədnam ermənilərdən oğurlanıb. Buyurun baxın:
erməni telekanalının loqosu
Bu isə AzTV-nin “məşhur” loqosudur:
Bu plagiatlar Rövşənin son işi olmadı. O,bütün “yeniliklər”ini ancaq oğurluqlar üzərində qurdu. Çünki, çoxlu pul qazanmağın ən asan yolu bu idi. Rahat və şəriksiz…
Rövşənin plagiat yaradıcılığı cəzasız qaldığı üçün o daha da iştahlandı. Daha çox dövlət vəsaitini mənimsəmək üçün yeni-yeni “layihələr reallaşdırdı”. Bu yolda istənilən risqlərə də getdi, yalan danışmaqdan belə çəkinmədi. Həmin yalanlardan biri də guya ki, Rövşənin “səyləri” sayəsində AzTV-ni HD yayım sisteminə keçməsi məsələsidir.
Bəri başdan deyim ki, hazırda AzTV 30 il bundan əvvəlki SD sistemi ilə işləyir. Lakin Rövşən apardığı kosmetik dəyişikliklə hər kəsi aldadır ki, AzTV HD sistemi ilə işləyir.
Bəs əslində nə baş verib?
Baş verən odur ki, AzTV inteqrator şikət ilə birlikdə mərkəzi aparat otağını sıfırdan layihələndirib. HD formatına keçid üçün mərkəzi aparat otağı, efir aparat otağı tikilib. Yəni ki, yalnız efir otağındakı avadanlıqlar HD sisteminə keçirilib. Qalan istehsal sahələri isə hələ də köhnə SD sistemi ilə fəaliyyət göstərir.
Bu gün AzTV –dəki bütün studiyalar, montaj otaqları və kameralar SD sistemi ilə işləyir. Şirkətdəki 5 STS-dən yalnız biri HD sistemi ilə işləyir. Bu da o deməkdir ki, AzTV –nin HD sisteminə keçidi barədə danışmaq ən az ağılsızlıqdır. Hazırda AzTV-nin maddi-texniki bazası texniki cəhətdən tükənib. Çünki, studiyaların, STS-lərin, montaj otaqlarının və kameralrın 90 fazinin 20 ildən çox yaşı var. Normalda isə istənilən texniki avadanlıq ən pis halda 10 il istismar edildikdən sonra sökülüb atılmalıdır. Amma AzTV rəhbərliyi köhnə avadanlıqlardan 4 əlli yapışıb. Çünki, yeniliklər etmək üçün vəsait xərcləmək lazımdır. Rövşən isə dövlətin milyonlarını korporativ maraqlarını üçün xərcləyir.
Yeri gəlmişkən deyək ki, Rövşən tez-tez döşünə döyür ki,”mən gələndən 5 studuya qurmuşam”. Əslində isə onun qurduğu sadəcə dekorasiyalardır. Həmin 5 studiyalar isə 90-cı illərin anoloq avadanlıqları ilə işləyir. Əslində “işləyir” demək düz deyil. Çünki, əldən düşmüş avadanlıqlar tez-tez sıradan çıxır. Bu vəziyyətdən isə Rövşəni köhnə, peşəkar işçilər vəziyyətdən çıxarır. Məsələn tanıyanlar bilir. AzTV-də bir Allahverdi var. Uzun illərdir ki,ömrünü AzTV-yə bağlayıb. Bu gün AzTV-nin studiyaları bu adamın çiyinlərində dayanır. Bütün günü qaçaqaçda olan Allahverdi olmasa Rövşən də, onun “qurduğu” 5 studiya da anındaca batar. Çünki, studiyalar bərbad gündədir. Hətta aparıcıların istifadə etdikləri yaxalıq üçün mikrafonların belə 10-15 il yaşı var. Və Allahverdinin şəxsi fədakarlığı hesabına bu mikrafonlar işləyir. Necə deyərlər bu adamı Rövşən üçün Allah verib.
Təkrar edirəm ki, Rövşən milyonlarla vəsaitin dalına keçib “studiyalar qurmuşam “ deməsinə yalnız bu işdən bixəbər olanlar inana bilər. Studiya qurulanda təkcə dekorasiya dəyişmir. Eləcə də stasionar kameralar, işıqlandırma sistemi, yazılış aparatları və bütün digər avadanlıqlar dəyişdirilir. AzTV-də isə heç bir studiyanın texniki bazası dəyişdirilməyib. Hamısı SD sistemində “çalışır”. SD sistemi isə keyfiyyətinə görə HD-dən ən azı 5-6 dəfə geri qalır.
Bu da o deməkdir ki, Rövşənin rəhbərlik etdiyi AzTV bu gün efirə verilən siqnalın keyfiyyətinə görə hətta Gəncədəki Kəpəz TV-dən belə geri qalır. Yalnız Sumqayıtda fəaliyyət göstərən Dünya TV-ni AzTV qabaqlayır. Bu da o deməkdir ki, AzTV texniki imkanlarına görə Azərbaycanda fəaliyyət göstərən televiziyalar arasında axırdan ikinci yeri tutur.
Maraqlıdır ki, Rövşənin plagiatçılığına qarşı artıq beynəlxalq qurumlardan etirazlar başlayıb. Məsələn, Rusiyanıın “Rossiya” televiziyası AzTV-yə qarşı iddia qaldırıb. İddianın motivi də ondan ibarətdir ki, Rövşən müəllif hüquqlarını kobud şəkildə pozub. Rusiya televiziyasının istehsalı olan filmləri müqaviləsiz və ödənişsiz olaraq AzTV -də yayımlayıb. Ona görə də ruslar Rövşəndən 5 milyon rubl təzminat istəyir…
Bax belə… Bu gün- sabah ermənilərin də AzTV-yə qarşı iddia qaldırdıqlarını eşitsəniz heç də təəccüblənməyin əziz oxucu. Çünki, Rövşən 3 ildə təkcə bir məsələdə yenilikçi olduğunu göstərdi. O da plagiatçılıqda. Başqa heç bir uğuru ilə yadda qalmadı. Bu gün AzTV-də elə bir veriliş yoxdur ki, tamaşaçılar günlərlə onun yayımını gözləsin. Sorğu keçirilsə yəqin ki, tamaşaçılar AzTV-nin yaddaqalan 2-3 verilişini belə sadalaya bilməz.
Baxmayaraq ki, Rövşən 3 il qabaq deyirdi ki, “mən AzTV-ni CNN, Əl-Cəzirə, Evronyus səviyyəsinə qaldıracam”. Amma son 3 ildə Rövşən yalnız özünün və dostlarını həyat səviyyəsini yüksəklərə qaldırıb. AzTV efiri isə 3 ildə yüz minlərlə tamaşaçısını, qocaman kollektiv isə normal dolanışığını və xoş iş mühitlərini itirib.
Sonda son 3 ildə milyonlar qazanan AzTV əməkdaşlarını, daha doğrusu Rövşənin yaxın çevrəsininin bir qismini oxuculara təqdim edirik.
Ranar Musayev, AzTV-nin bədii rəhbəri-Məmmədovların ailəvi dostu
Xəlil Məmmədov, Texniki İstehsalat Birliyinin baş direktorunun müavini –Rövşənin xanımının əmisi
Rafael Məmmədov, Bədii rəhbərin müavini-Rövşənin qaynı
İlhamə Hüseynova , Kadrlar Departamentinin rəisi- Rövşənin xanımının rəfiqəsi
Nərgiz Rəfiyeva, Sosial media və ictimaiyyətlə əlaqələr departamentinin rəisi- Rövşənin xanımının rəfiqəsi
Ülfət Rəhimova, Teleradio Akademiyasının prorektoru- Rövşənin xanımının rəfiqəsi
Niyaməddin Quliyev, Maliyyə və Mühasibat uçotu departamentinin rəisi (Rövşənin “qara kassası)- Rövşənin xanımının yaxın qohumu
Turan Babayev ,“Səhər” Musiqi-informasiya redaksiyasının baş redaktoru-Rövşənin ailəvi dostu
Anar Həsənov, “Ekstrim qrup”un rəhbəri- Rövşənin ailəvi dostu
Elnur Əlizadə , Texniki İstehsalat Birliyinin direktoru- Rövşənin ailəvi dostu
Müşviq İbrahimov, Maddi-Texniki Təchizat və İstehsalat Departamentinin rəisi-Rövşənin qohumu və uşaqlıq dostu
Vüqar Bəşirov, Təsərrüfat departamentinin rəisi- Rövşənin yaxın dostu
Sadaladığımız bu adamlar hər ay Rövşənin hesabına 5-10 min manat qabağa düşürlər…
Bax, belə… Rövşənin son 3 ildə imza atdığı “uğurların” bir qismini dəyərli oxucularımızın diqqətinə çatdırdıq.
Amma sonda Azərbaycan Prezidenti İlham Əliyev yanvarın 12-də yerli televiziya kanallarına müsahibəsində dediyi fikirləri bir daha diqqətə çatdırmaq istəyirəm: “Mən dəfələrlə dövlət məmurlarına həm rəsmi qaydada, həm də görüşlər zamanı, onları vəzifəyə təyin edərkən təlimat verirdim ki, korrupsiya ilə, rüşvətxorluqla ciddi mübarizə aparılmalıdır və əgər bu və ya digər məmur bu çirkaba bulaşarsa, cəza çox sərt olacaq. Nəticə də onu göstərir – ən yüksək vəzifəli məmurlar bu gün istintaq qarşısında, məhkəmə qarşısında cavab verməli olublar və haqlı cəzalarını alıblar. Bir daha demək istəyirəm ki, heç kim bu məsuliyyətdən boyun qaçıra bilməz, heç kim qanundan üstün deyil, qanun qarşısında hamı bərabərdir, heç kimin əvvəlki xidmətləri nəzərə alınmayacaq. Xüsusilə bu əyri yola gedən insanların xidmətləri daha çox “ayı xidməti”nə bənzəyir. Ona görə hesab edirəm ki, bunu hər kəs artıq görüb və bilib. Ona görə bizim addımlarımız çox sərt olacaq, cəzalarımız da çox sərt olacaq”.
SURXAY ATAKİŞİYEV
“24 saat”
Geri qayıt