GORANBOY XANINA HƏBSXANADAN ŞOK İTTİHAMLAR
8-07-2013, 10:40
DİA.AZ: - Goranboyun icra başçısı Nizaməddin Quliyev tərəfindən şərlənərək həbs olunmuş iş adamı Müqayis Verdiyev növbəti dəfə Prezident İlham Əliyevə müraciət ünvanlayıb. Sahibkar bu müraciətində başına gətirilən oyundan və həbsdə olmasının hələ də səbəbini bilməməsindən bəhs edib.
DİA.AZ bildirir ki, Verdiyev müraciətində deyib ki, o, indiyə qədər ölkədə həyata keçirilən yenidənqurma və tikinti sahəsində gücü çatdığı qədər iştirak etməklə yanaşı, həm də köməkliyini göstərməyə çalışıb. «Cənub Prezident, mən uzun illərdir rayonlarımızın abadlaşdırılması və yenidənqurulması istiqamətində həyata keçirdiyiniz layihələrdə yaxından iştirak edirəm. Bu illər ərzində Yevlaxda abadlaşdırma və yenidənqurma işlərinə görə məni təqdir edərək, təşəkkürünüzü bildirmisiz. Eyni olay İmişli rayonunda da yaşanıb və Siz böyüklük göstərərək mənim gördüyüm işlərə ən yüksək qiymət vermisiniz. Lakin Goranboyda mənim deyil, icra başçısı Nizaməddin Quliyevin günahı üzündən işlər yarımçıq qaldı. Belə ki, o, mənim fəhlələrə verməli olduğum halal 156 min manatımı ödəməkdən imtina etdi. Həmin pulu mənimsədiyindən ört-basdır etmək üçün mənə şər ataraq, həbs etdirdi».
İş adamı daha sonra bildirib ki, Goranboyun icra başçısı Nizaməddin Quliyevin onu şərləməsinin əsas səbəbi oğlu Ramal Quliyevin əməlləri olub. O qeyd edib ki, icra başçısının oğlu Ramal Quliyev «Fəqan Xidmət» şirkətinin qeyri-rəsmi rəhbəridir. Eyni zamanda, Goranboyda həyata keçirilən tenderlərin də hamısı bu şirkətə həvalə olunub. «Amma Ramal Quliyev dəfələrlə atasını ciddi şəkildə borca salıb. Məsələn, hələ bir neçə il bundan əvvəl Ramal Quliyev Kapital Bankın Mingəçevir şəhər filalının rəhbəri olarkən 500 min manat pulu götürərək, xarici dövlətlərdən birində qərarlaşmışdı. Həmin pulu isə atası Nizaməddin Quliyev qaytarmalı olub. Bu dəfə də tenderin pullarını mənimsəyən oğul Quliyev atası üçün əlavə problem yaratmışdı ki, nəticədə həmin borcları bağlamaq zərurəti yaranmışdı. Oğlunun əməllərini brt-basdır etməyə çalışan Nizaməddin Quliyev müavini Baxış Abdullayevə göstəriş verərək, 5-6 fəhləni aldatmaq yolu ilə İcra Hakimiyyətinin binası qarşısına çıxararaq, onların aksiyasını təşkil etmişdi. Amma bununla da kifayətlənməyib, yuxarı dairələrə guya, mənim «iğtişaş» törətdiyim barədə məlumat ötürüblər. Halbuki bu işdən mənim qətiyyən xəbərim olmayıb. Üstəlik, həmin fəhlələr yazılı şəkildə müraciət edərək, mənimlə əlaqəli olmadıqlarını və Baxış Abdullayev tərəfindən öyrədildiklərini bildirmişdilər».
Müqayis Verdiyev daha sonra vurğulayıb ki, onun heç bir zaman ölkədə və ya ölkənin hansısa məntəqəsində iğtişaş törətmək niyyəti olmayıb. «Cənab Prezident, mən hər zaman atanız, Ümummilli Liderimiz Heydər Əliyevə və Sizə sədaqətli olmuşam. Bunu sözdə yox, əməldə də sübut etməyə çalışmışam. Hələ 1994-cü ildə Gəncədə Surət Hüseynov dövlət çevrilişinə cəhd edəndə mən onlara qarşı çıxmaqla yanaşı, həm də cənab Prezident Heydər Əliyevin şəhərə təyin etdiyi icra başçısını qoruyaraq, onun fəaliyyətini davam etdirməsinə yardımçı olmuşam. Həmin vaxt şəxsi maşınımı belə onun ixtiyarına vermişəm. Hətta bu hərəkətlərimə görə, Prezident Admnistrasiyasının rəhbəri Ramiz Mehdiyev cənabları da keçirilən müşavirədə adımı çəkərək, hamını dövlətçiliyə mənim kimi sədaqətli olmağa çağırıb. Həmin vaxt belə əlimdə yetərli qədər imkan olub ki, iğtişaşlar törədim. Amma mən dövlətimə, onun başçısına sədaqət nümayiş etdirmişəm. Bu gün də eyni mövqedəyəm və kimsə bunu dəyişə bilməz. Əgər bu gün kimsə Azərbaycandakı sabitliyi pozmağa cəhd edərsə, yenə də mən və mənim kimi Sizə sədaqətli insanlar onun qarşısını almaq üçün əlindən gələni edəcəklər».
Goranboyun icra başçısı Nizaməddin Quliyevin ona şər atdığını, haqqında qaldırılmış cinayət işinin isə qondarma olduğunu bildirən sahibkar qeyd edib ki, bu gün həbsdə günahsız yerə yatması ədalətsizlikdir və bu məsələ araşdırılmalıdır. «Mənim ən böyük «günahım» Goranboyda görülən işlərdə çalışan fəhlələrin əmək haqlarını icra başçısı Nizaməddin Quliyevdən istəməyimdir. Çünki onlar da ailə başçılarıdırlar və evlərinə bir tikə çörək aparmaq istəyirlər. Onların haqqını kəsmək haqsızlıq və ədalətsizlik olardı. Bunu Siz də müşavirələrdən birində qəti şəkildə bəyan etmisiniz ki, görülən işlərə görə bütün işçilərin haqları vaxtında və bütünlüklə verilməlidir. Əgər dövlətə və dövlətçiliyə görə həbsdə qalmaq lazımdırsa, buna hazıram. Lakin Goranboyun icra başçısı Nizaməddin Quliyevin oğlu ilə olan probleminin qurbanı olmaq mənə ağır gəlir. Belə icra başçıları əminliklə vurğulayıram ki, Sizin gördüyünüz işlərə kölgə salmaqla məşğuldur. Səbəb isə özlərinin büdcə pulları hesabına daha da varlanması üçün çalışmalarıdır».
Müqayis Verdiyev daha sonra vurğulayıb: «Cənab Prezident, əminəm ki, Siz tezliklə barəmdə qaldırılmış cinayət işinə xitam verilməsi barədə göstəriş verərək, ədaləti bərpa edəcəksiniz. Siz İmişli rayonunda sahibkarlarla bağlı yaranmış problemlə bağlı məsələyə müdaxilə etdikdən sonra böyük bir humanizm nümayiş etdirərək, ədaləti bərpa etmişdiniz. Həmin vaxt biz sahibkarlar bir daha əmin oluq ki, Prezident İlham Əliyev bizim dayağımız və köməyimizdir. Bu gün də həmin fikirdəyik və birmənalı olaraq vurğulayırıq ki, hər zaman Sizin siyasətinizi qəbul edib, onu dəstəkləmişik. Və bundan sonra da belə olacaq».
Geri qayıt