CƏNUB REGİONU UĞRUNDA BÖYÜK SAVAŞ
2-04-2012, 14:28
KƏRƏM HƏSƏNOV REGİONA SAHİBLƏNƏ BİLMƏSİ ÜÇÜN KİMLƏRƏ GÜVƏNİR?
DİA.AZ: - Sabiq iqtisadi inkişaf naziri Fərhad Əliyein sıradan çıxarılması «əməliyyatında» müstəsina xidmət göstərən və əvəzində öz qazanc imkanlarını dəfələrlə artırmağa nail olan Dövlət Əmlakının İdarə Edilmsi üzrə Dövlət Komitəsinin sədri Kərəm Həsənovun son zamanlar böyük var-dövlət sahibinə çevrilməsi barədə söz-söhbətlər getdikcə genişlənməkdədir. Gələn xəbərlərdə deyilir ki, ölkə prezidenti yanında etibar qazandıqdan sonra o, bütün özəlləşdirmə prosesini özünün şəxsi qazanc mənbəyinə çevirərək, qısa müddət ərzində ölkədə barmaqla sayılan külli miqdarda var-dövlət sahiblərindən birinə çevrilib.
Daşınmaz Əmlakın Dövlət Reystr Xidmətini əlinə keçirdikdən sonra K. Həsənov həmin xidmətin bütün strukturlarına özünün ən yaxın adamlarını yerləşdirməyə nail olub.
DİA.AZ-a daxil olan məlumata görə, adı çəkilən komitənin rəhbəri Kərəm Həsənov qanunu pozaraq, istədiyi dövlət qurumunun balansında olan istənilən ərazilərin fiziki və hüquqi şəxslər tərəfindən qanunsuz özəlləşdirilməsinə şərait yaradır. Bir müddət öncə Müdafiə Nazirliyinin balansında olan obyektin qanunsuz şəkildə Əmlak Məsələləri Dövlət Komitəsi tərəfindən özəlləşdirilməsi ilə bağlı qalmaqal məhkəməyə qədər qalxdı. Məhkəmənin hakimləri ilə «sıcaq» münasibətləri olan komitə rəhbərliyi qanunsuz əməllərinə «qanuni don geyindərməyi» bacarıb.
Komitə rəhbəri rəsmi baxımdan baş verən qanunsuzluqlardan qazandıqları hesabına artıq ölkə oliqarxları sırasına daxil olmaqdadır. Komitə sədrinin nəzarətində olan biznes sahələrindən biri də onun Birləşmiş Ərəb Əmirliklərində və başqa ölkələrdə çalışan müxtəlif müəssisələri, şirkətləri dəstəkləməsi və onlarla şərikli ticarat işi görməsidir. Məlumatlara görə K.Həsənov Çexiyada mineral suların istehsalı və qablaşdırılması ilə məşğul olan bir müəssisə açıb. Həmin müəssədə «Mattoni» mineral suaları istehsal olunur.Adıçəkilən su Azərbaycan telekanallarında da reklam olunur. Əldə etdiyimiz məlumata görə Kərəm Həsənov Çexiyada həm də meyvə şirəsi istehsal etdirir. Amma Azərbaycanda bu sahə fövqaladə hallar naziri Kəmaləddin Heydərovun nəzarətində olduğundan həmin məhsullar ölkəyə gətirilmir. Bir vaxtlar Fərhad Əliyevin himayəsində xırda fiqurlardan olan Kərəm Həsənov cənub bölgəsinin kuratoru olmaq iddiasındadır. Belə ki, uzun müddətdir ki, Cəlilabad rayonu Dövlət Əmlak Komitəsinin sədrinin kurasiyasındadır. Rayonun icra başçısı da Kərəm Həsənovun yaxın adamı və «sağ əli» olmaqla yanaşı, həm də komitə sədrinin rayondakı biznesinin rəhbəri kimi tanınır.
Məlumat üçün onu da bildirək Cəlilabad Rayon icra hakimiyyətinin başçısı Əziz Əzizov əslən Cəbrayıl rayonundandır. O, vaxtilə taxıl biznesilə məşğul olub. Bu gün də Cəlilabaddakı məhsuldar torpaqlarda Kərəm Həsənova məxsus olan hektarlarla taxıl sahələrinin becərilməsinə şəxsən özü rəhbərlik edir. Maraqlıdır ki, Ə.Əzizov biznes təcrübəsinə də malikdir. O əvvəllər Bakıda karamel satışıyla məşğul olub. İndi isə icra başçısının Xırdalanda mərmər sexi var ki, rayonda aparılan abadlıq işlərində Xırdalandakı sexin tullantılarından istifadə edilir. Nəticədə dövlətin külli miqdarda pulu təmir adıyla mənimsənilir. Biznes sahəsində belə geniş təcrübəyə malik olduğundandır ki, Əzizov komitə sədrinin rayondakı və ətraf ərazilərdəki obyektlərinə də nəzarət edir. K.Həsənovun bölgədəki obyektləri isə kifayət qədər çoxdur.
Bir müddət öncə komitə sədrinin Cəlilabad rayonundakı üzüm sahələrini də ələ keçirərək burda xaricdən gətirilmiş avadanlıq hesabına şərabçılıq zavodu tikdirməsi haqda yazmışdıq. Bundan başqa, minlərlə baş mal-qara saxlanması, dəyirmanlar, çörək sexləri də komitə sədrinin biznes sisteminə aiddir. Bunlarla kifayətlənməyən komitə sədri bu yaxınlarda Cəlilabadda, daha dəqiqi Bakı-Astara avtomagistralının üstündə - Qarazəncir kəndi yaxınlığında böyük bir makaron-vermişel fabrikinin tikintisinə başlayıb. Mənbəmizin sözlərinə görə bu tikintiyə Kərəm Həsənovun əmisi oğlu, Cəlilabad və ətraf rayonlarda komitə sədrinin qeyri-rəsmi səlahiyyətli nümayəndəsi olan İlqar Həsənov rəhbərlik edir. Mənbəmiz həmçinin onu da bildirdi ki, bu fabrik «Ləzzət» adı altında makaron və digər bu kimi məhsulların istehsalı üçün nəzərdə tutulub.
Kərəm Həsənovun cənub bölgəsində yaratdığı biznes sistemində xüsusi yeri isə restoranlar şəbəkəsi tutur. İstər Bakıda, istərsə də rayonlarda bahalı və geniş restoranlara sahib olan komitə sədrinin Bakı-Astara yolunun üzərində inşa edilmiş restoranları xüsusilə diqqəti cəlb edir. Məsələn, cənub istiqamətindəki magistiral yolun kənarında, ağacların ortasında inşa edilmiş «Karvan» restoranı Kərəm Həsənova məxsusdur. Amma bu da ilk və sonuncu iaşə obyekti deyil. Yol kənarında Kərəm Həsənovun daha bir neçə obyekti var. Cənub bölgəsindən Bakıya gələn avtobus və taksi sürücüləri ilə əldə edilmiş anlaşma nəticəsində onlar yol üstü dayanacaqlarını məhz bu restoranlara salırlar. Təbii ki, bunun qarşılığı da var. Həmin qarşılıq ondan ibarətdir ki, avtobus və taksi sürücüləri həmin restoranlarda istədikləri vaxt çörək yeyə bilərlər. Bu da onlara sərf etdiyindən adıçəkilən bölgədən gətirilən sərnişinlər «Karvan» və digər restoranlarda yemək yeməyə sövq edilir.
Maraqlıdır ki, adıçəkilən restoranların Kərəm Həsənova məxsus olması burda çalışanlar tərəfindən də açıq şəkildə dilə gətirilir. Bizdə olan məlumata görə komitə sədrinin göstərişi əsasında restoranlarda xidmət çox yüksək səviyyədə təşkil olunub və qiymətlər də ucuzdur. Məqsəd isə bölgə əhalisində K.Həsənov haqqında müsbət imic yaratmaq və bu bölgənin qubernatoru olmağa ictimai dəstək qazanmaq niyyətindədir. Çünki, hələ də bu zona da Fərhad Əliyev haqda müsbət rəy, xüsusilə də Kərəm Həsənovun ona qarşı fəaliyyəti unudulmayıb. Amma görünənlər komitə sədrinin bölgə qubernatoru iddiasını gerçəkləşdirməyə yaxın olduğunu düşünməyə əsas verir.
Geri qayıt