Mingəçevir şəhərində yaşayan Dürdanə Mirzəyeva 2008-ci ildən əlil kimi pensiya alır.
Onun sağ ayağında – bud çanaq nahiyəsində anadangəlmə çıxıq var.
Uşaq yaşlarında 2 ilə yaxın Bakıda müxtəlif xəstəxanalarda müalicə alsa da, nəticəsi olmayıb.
“Bunun adı işgəncə deyil, bəs nədir?”
DİA.AZ-ın məlumatına görə, 55 yaşlı Dürdanə Mirzəyeva Meydan TV-yə deyir ki, yaşa dolduqca ağrıları artıb, pilləkənləri qalxıb-düşmək, piyada yerimək onun üçün çətinləşib. Bundan sonra əlillik təyin olunması üçün lazımi dövlət orqanlarına üz tutub.
Ona 2008-ci ilin oktyabrında ikinci qrup əlillik təyin edilib, buna uyğun pensiya alıb.
2015-ci ildə növbəti yoxlamadan sonra yenə ona 5 il müddətinə ikinci qrup əlillik dərəcəsi təyin edilib. 5 ilin tamamında – 2021-ci ilin oktyabrında pensiyası kəsilib.
“Növbəti dövr üçün əlillik təyinatıyla bağlı işlərə başladım. Əslində isə bu proses əlillər üçün işgəncə mexanizmidir. Təsəvvür edin, məni – gəzməkdə çətinlik çəkən adamı aylarla süründürdülər. Bir xəstəxana deyir, müayinə etmək üçün travmatoloq yoxdur, bir başqasında aparat işləmir. Ağrıya-ağrıya saatlarla növbələrdə gözləmişəm. Ayağımın ağrısı fəqərələrimə vururdu. Gah Mingəçevirdə, gah Gəncədə, gah Bakıda müayinələrdən keçdim. Axırda da dedilər ki, həkim rəyi yarımçıq verib. Bunun adı işgəncə deyil, bəs nədir?”, – Dürdanə Mirzəyeva əlilliyi olan şəxslərə qarşı etinasızlıqdan şikayətlənir.
“Həkim rəyi yarımçıq yazıb, məni əlavə zülmə salıb”
Onun sözlərinə görə, təkcə, Mingəçevirdə travmatoloqun qəbuluna düşməyə 45 gün lazım olub.
Deyir ki, dekabrın 28-də Mingəçevirdə Tibbi Sosial Ekspert Komissiyasında ondan alınmış sənədləri 2 ay yarım sonra – 5 mart 2022-ci ildə sistemə daxil ediblər.
Martın 29-da isə “Forma-88 natamam doldurulub” əsasıyla sənədləri geri qaytarılıb:
“Mingəçevir Tibbi Sosial Ekspert Komissiyasından mənə dedilər ki, Travmatologiya İnstitutundan verilən arayış yarımçıq olub. Aprelin 26-dan 28-nə qədər dəfələrlə Elmi-Tədqiqat Travmatologiya və Ortopediya İnstitutuna getdim. Oranın bir neçə korpusu var. Biri o birinə göndərir. Həkimin yerini tapıb, 4 saat növbədə gözləmişəm. Axırda həkim əməliyyatdan çıxıb, gedirdi. Səs-küy saldım ki, insanı belə ələ salmaq olmaz. Rəyi siz yarımçıq yazmısınız, məni əlavə zülmə salmısınız. Dedi ki, yaxşı rəy istəyirsinizsə, sabah gəlin. Qayıdıb bir də ertəsi gün getdim”.
“Onu da deyim ki, Mingəçevirdə MRT-nin cavabının getməməsinə görə də məni günahkar çıxarmağa çalışırdılar. Yaxşı ki, bir az başım çıxır, savadım var, onlara dedim ki, necə olur, burada sənəddə əksini tapıb, amma kompüterlə Bakıya göndəriləndə yazılmayıb? Sonra boyunlarına aldılar ki, günah özlərində olub”, – deyə o vurğulayıb.
“Vəziyyətim ağırlaşıb, buna baxmayaraq, ikinci qrupu üç elədilər”
Son nəticədə Respublika Əlillərin Reabilitasiyası Mərkəzində Dürdanə Mirzəyevaya bildirilib ki, ona üçüncü qrup əlillik dərəcəsi təyin olunur.
O isə bunun ədalətsiz olduğunu düşünür:
“Onlara da dedim ki, mən 13 il ikinci qrup əlil kimi pensiya almışam. Qanunda da yazılıb ki, 10 il ardıcıl hansı qrupla alırsansa, o qrup olmalıdır. Məndə vəziyyət əksinə, ağırlaşıb, buna baxmayaraq, ikinci qrupu üç elədilər. Əslində, bu aylar ərzində şahidi olduqlarımdan, Respublika Əlillərin Reabilitasiyası Mərkəzində əlillərə, vəziyyəti ağır olan insanlara qarşı münasibətdən sonra onların bu hərəkətinə təəccüblənmirəm. Yarım saat ayaq üstə dura bilməyən, 10-15 addım gedib dayanan insan üçün bu süründürməçilikləri yaşamağın nə olduğunu təsəvvür etmək çətin deyil”.
“Reabilitasiya Mərkəzində vəziyyəti məndən də ağır olan xəstələr vardı, heç fikir vermirlər. Ağır vəziyyətdə olan müharibə iştirakçısı gətirmişdilər, dayana bilmirdi, heç veclərinə də olmadı”, – Dürdanə Mirzəyeva belə deyir.
“Göndəriş natamam doldurulmuşdu”
Dövlət Tibbi-Sosial Ekspertiza və Reabilitasiya Agentliyi isə vətəndaşa qarşı əsassız süründürməçilik iddiasıyla razılaşmır.
Bu qurumdan bildirilib ki, sənədlərin geri qaytarılması əsaslı olub. Çünki Dürdanə Mirzəyeva ilə bağlı xəstəxana tərəfindən rəsmiləşdirilmiş göndəriş natamam doldurulub:
“Ekspertiza üçün əhəmiyyətli olan patofunksional dəyişikliklər dəqiqləşdirilməmişdi. Mütəxəssis həkimlərin rəyi və köməkçi-diaqnostik müayinələr yetərli deyildi”.
