DİA.AZ: - Azərbaycan Texniki Universitetinin bir qrup müəllimi yenə də sözügedən ali təhsil ocağında yaşanılan neqativ olaylar haqqında həyəcan təbili çalmaqdadırlar. Xatırladaq ki, AzTU ilə bağlı buna qədər də ilginc faktları təqdim etmişdik, amma görünəni odur ki, hələ də aidiyyatı qurumlar susmağa üstünlük verirlər. Biz isə DİA.AZ-a göndərilən növbəti müraciəti təqdim edirik:
Əvvəli BURADA: Texniki Universitetdə NƏLƏR BAŞ VERİR? - İLGİNC FAKTLAR
"Əlbəttə ki, informasiya portalı tərəfindən doğrudan da belə bir sorğu keçirilsəydi və həmin saytda da qeyd edildiyi kimi, üç rektor həmin sorğunun qalibi olsaydı, birmənalı olaraq, portalın saytında mütləq üç rektorun adı göstərilərdi. Sual olunur, niyə həmin saytda üç rektorun qalib olduğu deyilir, ancaq onlardan yalnız birinin, Vilayət Vəliyevin adı açıqlanır, digər ikisinə qarşı isə tam etinasızlıq göstərilir? Buradan yalnız bir nəticə çıxarmaq olar, əslində heç bir sorğu keçirilməyib və bu, rektor V.Vəliyevin təşkil etdiyi növbəti şoudur. Çünki, həmin portalın və ya saytın cürəti çatmayıb ki, həqiqətdə keçirilməyən sorğunun saxta nəticəsi kimi bu məsələyə heç bir aidiyyəti və dəxli olmayan digər iki rektoru da bu işə qatsın və yalandan onları da qalib elan etsin və mükafatlandırsın. Budur bu sualın cavabı. Bəs bu şou kimə və nəyə lazım imiş? Əlbəttə ki, Vilayət Vəliyevin özünə. Görünür, o, bu yolla son vaxtlar universitetdə əməkdaşlar arasında yerdən-yerə düşmüş öz nüfuzunu az da olsa bərpa etmək istəyir və bu məqsədlə, həmin portalın təşkilatçıları ilə əlaqə yaradıb, bu saxtakarlığı təşkil edib, həmişə olduğu kimi, dərhal fotolar çəkdirib sayta qoyub. Universitet əməkdaşları isə buna istehza ilə gülürlər.
Hər gün AzTU saytını açanda ancaq onu görürük ki, V.Vəliyev yenə kiminləsə görüşüb, əməkdaşlıq haqqında müqavilə imzalayıb, şəklini çəkdirib, sayta qoydurub. Biz buna artıq adət etmişik və bir gün belə məlumat görməyəndə adam lap “darıxır”. V.Vəliyev artıq top modelə çevrilib.
Keçən yazılarımızın birində yazmışdıq ki, Vilayət Vəliyev ölkəmizin güclü təsir imkanlarına malik regional klanlarından birinə məxsus olmaqla, onun güclü bir himayədarı da var, buna görə də onun ölkəmizin ən böyük ali texniki məktəblərindən birini dağıtmasına göz yumulur. Yazmışdıq ki, onun himayədarı Nazirlər Kabinetində kifayət qədər yüksək vəzifə tutan şəxsdir, ancaq, kim olduğunu yazmamışdır. Çünki, həmin şəxs hal-hazırda vacib bir dövlət missiyasını yerinə yetirir, qonşu ölkələrlə danışıqlarda Azərbaycan nümayəndə heyətinə başçılıq edir və bizim ona böyük hörmətimiz olmaqla yanaşı, onun nüfuzuna xələl gətirmək istəmədik. Onun kimliyi V.Vəliyevin özünün yaxın adamlarına sızdırdığı informasiyadan bizə məlum olub və dəqiqdir. Keçən həftə rektor V.Vəliyev haqqında internet saytlarında dərc olunan materialların birində bizdən asılı olmadan, bu adamın adı açıqlandı və daha onu deməməyin mənası qalmayıb. Əlbəttə ki, bu, Baş Nazirin müavini Şahin Mustafayevdir. Biz şübhə etmirik ki, Şahin Mustafayev üçün Azərbaycanın mənafeyi, strateji əhəmiyyətə malik Azərbaycan texniki təhsilinin mənafeyi onun yerlisi (bəklə də qohumu) olan Vilayət Vəliyevin vəzifə ambisiyalarında daha yüksəkdir.
O ki, qaldı Vilayət Vəliyevin özünə, biz başa düşmürük, niyə bu adam gedib, bacardığı bir işin qulpundan yapışmır ki, Texniki Universiteti güdaza verir, ağlar günə qoyur? Ay qardaş, sən gərək elə rektor olasan? Get bacardığın işlə məşğul ol da. Sənin alnına rektor olmaq yazılıb? Görürsən ki, bu işi bacarmırsan, niyə özünü də incidirsən, onsuz da çox kövrək vəziyyətdə olan təhsil müəssisəsinə və təhsilimizə məhvedici zərbələr vurursan? Səni himayə edənlər bəlkə sənin səviyyəni yaxşı bilmirlər, heç olmasa özünün bir insafın olsun.
P.S.: Hər dəfə Vilayət Vəliyevin AzTU-dakı “fəaliyyəti” haqqında məqalə dərc olunduqda, universitetdə yeni repressiyalar dalğası başlayır. İndi də gözləniləndir ki, yeni repressiya dalğası, əməkdaşlara, müəllimlərə təzyiqlər başlanacaq və son günlər V.Vəliyevin kafedralara qəfil gəlişlərini xatırlasaq, güman etmək olar ki, yenə də o, kafedralardakı laborant qadınların üzərinə daha sərt şəkildə “hücum çəkərək”, onlardan işdən çıxmaq haqqında ərizə yazmalarını tələb edəcək. Buna görə biz onlardan çox üzr istəyirik".
İddia olunanlarl bağlı dia-az.life olaraq bütün maraqlı tərəfləri dinləməyə hazırıq...
