İQTİDAR RUSİYAPƏRƏST QÜVVƏLƏRDƏN TƏMİZLƏNİR
DİA.AZ: - «Hakimiyyət daxilindəki Rusiyapərəst qüvvələrin qara günləri uzaqda deyil». Bu sözləri redaksiyamıza telefon açan və özünü Nazirlər Kabinetinin vəzifəlisi kimi təqdim edən şəxs söyləyib. Qeyd edək ki, onun DİA.AZ-a maraqlı açıqlamaları da olub.
Adının çəkilməməsi şərtilə açıqlama verən həmin vəzifəli şəxs bildirdi ki, yaxın günlərdə prezident iqtidar daxilindəki «rusiyapərəst qüvvələrə» (ifadə mənbəyə aiddir -red.) gözlənilməz, həm də şok effektli zərbəsini vuracaq:
«Onların güvəndikləri əsas adamlardan biri vəzifədən alınır. Onun kimliyini görəcəksiniz. Şok hadisə olacaq. Artıq Kremldə də bunu bilirlər və prezidentin iradəsinin qarşısını kimsə ala bilməyəcək».
Mənbəmiz onu da əlavə etdi ki, bunun ardından da daha bir neçə dövlət qurumunda ciddi təmizləmə əməliyyatı başlanılacaq: «Ola bilsin ki, məşhur «Qara kəmər» əməliyyatına bənzər, amma ondan daha da şiddətli bir əməliyyat həyata keçirilsin. Onlarla məmurun həbsi gözlənilir. Bu gün həmin məmurlar prezidentə yalan danışırlar. Vaxtilə Fərhad Əliyev də eyni qaydada yalan danışmışdı. Amma onun axırı nə oldu? Bu gün də yalan danışanların yeri həbsxana olacaq».
